‘‘దేవుని సృష్టిలో ఆడ, మగ మాత్రమే కాదు, మూడో తెగ కూడా ఉంది. వాళ్లను రకరకాల పేర్లతో పిలుస్తోంది సమాజం. వాళ్లను మనుషుల్లో ఒకరిగా గుర్తించని పరిస్థితి దశాబ్దాలుగా నెలకొంది. హిజ్రాలూ మనుషులే, వారికీ మనోగతాలుంటాయి... వ్యథలుంటాయి... ఆత్మాభిమానాలుంటాయని తెలిపే కథాంశంతో మేం తెరకెక్కించిన సినిమానే ‘థర్డ్ మేన్’’ అని హెచ్.ఎం.ఇమ్రాన్ (ఇంద్రమోహన్) చెప్పారు. ఆయన స్వీయ దర్శకత్వంలో నిర్మించిన ఈ చిత్రంలో నటుడు పృధ్వీ హిజ్రాగా కీలక పాత్ర పోషించారు. దేశంలోని పలు ప్రాంతాలకు చెందిన 80 మంది హిజ్రాలు ఈ చిత్రంలో నటించడం విశేషం.
  
  ఇంద్రమోహన్ మాట్లాడుతూ -‘‘హిజ్రాలకు కూడా చట్ట సభల్లో సమాన హక్కు కల్పించిన ఈ శుభ సందర్భంలో మా సినిమా విడుదలవుతుండటం ఆనందంగా ఉంది. ఇందులో మూడు పాటలు కూడా ఉంటాయి. ఇది నేను ఆత్మసంతృప్తి కోసం మాత్రమే తీసిన సినిమా. దీనికి ప్రభుత్వం నుంచి కూడా తగు గుర్తింపు లభిస్తుందని ఆశిస్తున్నాను. ఈ నెల రెండోవారంలో చిత్రాన్ని విడుదల చేస్తాం’’ అని చెప్పారు. అలైఖ్య, పూజా, యాన, మల్లిక, షమ, రేష్మ, శ్రీదేవి, టీనా తదితర హిజ్రాలు కీలక పాత్రలు పోషించిన ఈ చిత్రానికి మాటలు: ఘటికాచలం, సంగీతం: బొంబాయి బోలే, కెమెరా: ప్రసాద్ కొల్లి.
  


  సమాజంలో హిజ్రాలకు ఎదురవుతున్న సమస్యలను ప్రధానాంశంగా చేసుకుని కేపీ లక్ష్మయ్యచారి నిర్మిస్తున్న చిత్రం ‘థర్డ్ మేన్’. ఇంద్రమోహన్ దర్శకత్వం వహిస్తున్న ఈ చిత్రంలో రాణక్క పాత్రను పృథ్వీ చేశారు. ‘బొమ్మకాదు బొరుసు కాదు’ అనేది ఉపశీర్షిక. బొంబాయి భోలే స్వరపరచిన ఈ చిత్రం పాటలను హైదరాబాద్‌లో విడుదల చేశారు. ‘‘అందరితో పాటు హిజ్రాలకు సమాన హక్కులు ఉంటాయని చాలామందికి తెలియదు. కానీ, దేశంలో వారికి ఎక్కడా స్వతంత్రం లేదు. త్వరలోనే వారికి పూర్తి స్వేచ్ఛ దక్కుతుందని ఆశిస్తున్నా’’ అని పృథ్వీ చెప్పారు. వినోదంతో కూడిన సందేశాత్మక చిత్రం ఇదని, నిజమైన హిజ్రాలు కూడా నటించారని దర్శక, నిర్మాతలు అన్నారు. ఇందులో కంట తడిపెట్టించే సన్నివేశాలుంటాయని సంభాషణల రచయిత ఘటికాచలం చెప్పారు.