గుంటూరు మెడికల్: వైద్య ఆరోగ్యశాఖ లక్ష్యాల సాధనకు ప్రత్యేక ప్రణాళికతో పనిచేస్తున్నామని, అందుకోసం మార్చి 2వ తేదీనుంచి జిల్లా వ్యాప్తంగా ప్రత్యేక మెడికల్ క్యాంపులు ఏర్పాటుచేసి కుటుంబనియంత్రణ ఆపరేషన్లు చేస్తున్నట్లు జిల్లా వైద్య ఆరోగ్యశాఖాధికారి డాక్టర్ తిరుమలశెట్టి పద్మజారాణి చెప్పారు. ఆమె సోమవారం సాక్షితో మాట్లాడారు. గుంటూరు ప్రభుత్వ సమగ్ర ఆస్పత్రిలోని పీపీ యూనిట్‌లో మార్చి2న డీపీఎల్ ట్యూబెక్టమీ ప్రత్యేక మెడికల్ క్యాంపు నిర్వహించామని, జీజీహెచ్‌లో మార్చి 9న, 16న ప్రత్యేక వైద్య శిబిరాలు ఉంటాయని తెలిపారు.  
 
 రేపల్లె సామాజిక ఆరోగ్య కేంద్రంలో మార్చి3న, మాచర్ల సామాజిక ఆరోగ్య కేంద్రంలో మార్చి30న, బాపట్ల ఏరియా హాస్పటల్‌లో మార్చి10న , అమరావతి సామాజిక ఆరోగ్య కేంద్రంలో 13న, నరసరావుపేట ఏరియా హాస్పటల్‌లో 17న, గురజాల సామాజిక ఆరోగ్య కేంద్రంలో 24న, తెనాలి జిల్లా ఆసుపత్రిలో 31న ప్రత్యేక వైద్యశిబిరాలు జరుగుతాయని వెల్లడించారు. ఆరోగ్య కార్యక్రమాల లక్ష్యసాధనలో ఈ ఏడాది మార్చి నాటికి 32,500 కుటుంబ నియంత్రణ ఆపరేషన్లు చేయాల్సి ఉండగా జనవరి నె ల వరకు 31,666 ఆపరేషన్లు చేసి 96.57 శాతం లక్ష్యాలను చేరుకున్నామని పేర్కొన్నారు.
 
 వ్యాధి నిరోధక టీకాల కార్యక్రమంలో భాగంగా వివిధ రకాల టీకాలను 78,321 మందికి వేయాల్సి ఉండగా నూరుశాతం లక్ష్యాలను ఇప్పటికే సాధించినట్లు తెలిపారు. మార్చి నెలాఖరులోగా ప్రభుత్వం తమకు నిర్ధే శించిన అన్ని లక్ష్యాలను నూరుశాతం సాధించి జిల్లాను ప్రథమ స్థానంలో నిలిపేందుకు కృషి చేస్తామన్నారు. మాతాశిశు వైద్యసేవల ఆన్‌లైన్ ప్రక్రియలో గతంలో జిల్లా 9వ స్థానంలో ఉండగా జనవరి నాటికి మూడోస్థానంలోకి వచ్చిందని, మార్చి నెలాఖరుకల్లా మొదటిస్థానంలోకి వచ్చేలా పనిచేస్తామని చెప్పారు.
 
 రాష్ట్ర విభజన అనంతరం తొలిసారిగా జరిగే వైద్య ఆరోగ్యశాఖ లక్ష్యసాధన అవార్డుల కార్యక్రమంలో జిల్లాను రాష్ట్రంలో ప్రథమస్థానంలో నిలబెడతామన్నారు. డీఎంహెచ్‌ఓగా తాను గత ఏడాది నవంబర్ 24న బాధ్యతలు తీసుకున్నానని, మూడు నెలల కాలంలో జిల్లా అంతటా పర్యటించి లక్ష్యాల సాధనకు అనుసరించాల్సిన విధి విధానాలపై వైద్య సిబ్బందితో సమన్వయం చేసుకుంటూ పనిచేస్తున్నట్లు వెల్లడించారు.


 
      కన్నంపేటను పీడిస్తున్న విషజ్వరాలు
 
      ఒకరు మృతి
 
      సర్పంచ్ ఇంటిలో అందరూ బాధితులే
 
 రావికమతం : జిల్లాలో ఏజెన్సీతోపాటు, మైదానం వాసులను జ్వరాలు పీడిస్తున్నాయి. కన్నంపేటలో విషజ్వరాలు విజృంభించాయి. ఒకరిని పొట్టన పెట్టుకోగా,ప్రతి ఇంటా ఇద్దరు ముగ్గురు బాధితులు ఉన్నారు. రోలుగుంట మండలం వడ్డిపలోనూ ఇదే పరిస్థితి. కొద్ది రోజులుగా రెండు గ్రామాలను జ్వరాలు వీడడం లేదు. కన్నంపేటలో సుమారు 150 మంది మంచానపడి విలవిల్లాడుతున్నారు. 15 రోజుల క్రితం గ్రామంలో 40 మందికి జ్వరాలు సోకాయి.
 
 అప్పట్లో కొత్తకోట పీహెచ్‌సీ వైద్యాధికారి ప్రత్యేక వై ద్యశిబిరం నిర్వహించారు. అప్పట్లో అదుపులోకి వచ్చిన జ్వరా లు ఇప్పుడు మళ్లీ కోరలు చాస్తున్నాయి. గ్రామానికి చెందిన చింతల రామునాయుడు (58) తీవ్ర జ్వరంతో సోమవారం రాత్రి మృతిచెందాడు. కొన్ని రోజులుగా జ్వరం, కీళ్లనొప్పులతో బాధపడుతున్నాడు. సరైన వైద్యం చేయించుకోలేదు.
 
 ఈ క్రమంలో బాగా నీరసించిపోయి మృతిచెందాడని ఎంపీటీసీ స భ్యుడు బంటు శ్రీను, సర్పంచ్ దంట్ల అరుణ తెలిపారు. సమాచారమిచ్చినా వైద్యసిబ్బంది స్పందించడం లేదని ఆరోపిం చారు. గ్రామంలో పైల శ్రీనివాసరావు, మట్టా రాజారావు , దంట్ల బుల్లిబాబు, మొలిపాక రామునాయుడు, ఉగ్గిన చిరంజీవిలతోపాటు సుమారు 150 మంది మంచానపడ్డారన్నారు.
 
 వమ్మవరం కాలనీకి చెందిన చెల్లిబోయిన దేముడమ్మ, అప్పికొండ శ్రీను, గల్లా నానాజి జ్వరంతో బాధపడుతూ ఆర్‌ఎంపీ వైద్యుడి వద్ద సేవలు పొందుతున్నా తగ్గడం లేద న్నారు. గతేడాదీ ఇదే దుస్థితి. అప్పట్లో జ్వరాలకు తాగునీరే కారణమని అధికారులు గుర్తించారు. గ్రామస్తులు తాగే బావినీటి శాంపిళ్లను తీసుకెళ్లారు. వాటి నివేదిక ఇప్పటికీరాలేదని సర్పంచ్, ఎంపీటీసీ సభ్యుడు ఆరోపించారు. కాగా వడ్డిపలో సర్పంచ్‌తోపాటు అంగన్వాడీ కార్యకర్త మంచాన పడ్డారు. పరిస్థితి ఆందోళనకరంగా ఉంది.
  
 కివర్లలో జ్వరాలు  
  
 అనంతగిరి : మండలంలోని మారుమూల పంచాయతీ కివర్ల పంచాయతీ పరిధిలో జ్వరాలు పీడిస్తున్నాయని కివర్ల ఎంపీటీసీ సభ్యురాలు   దురియా ఈశ్వరమ్మ తెలిపారు. మంగళవారం ఆ మే మాట్లాడుతూ పంచాయతీలోని అన్నిగ్రామాల్లో గిరిజనులు జ్వరాలతో బాధపడుతున్నారన్నారు. వైద్యశిబిరం ఏర్పాటు చేయాలని కోరినా వైద్యసిబ్బంది పట్టించుకోలేదన్నారు. గిరిజనులప్రాణాలు గాలిలో కలిసి పోక ముందె వైద్య ఆరోగ్యశాఖ ఉన్నతాధికారులు స్పందించాలని డిమాండ్ చేశారు.