TV
ఆదిలాబాద్‌ : ఆదిలాబాద్‌ పట్టణంలో సినీ నటీ రెజీనా సందడి చేసింది. బుధవారం జిల్లా కేంద్రంలోని సినిమా రోడ్‌లో ఏర్పాటు చేసిన శ్రీ వరసిద్ధి షాపింగ్‌ మాల్‌ను ప్రారంభించారు. ముందుగా జ్యోతిప్రజ్వలన చేసి షాపింగ్‌మాల్‌లో ఉన్న చీరలు, ఇతర డ్రెస్సులను వీక్షించారు. అనంతరం విలేకరులతో మాట్లాడారు. ఆదిలాబాద్‌కు రావడం సంతోషంగా ఉందని, మొదట హైదరాబాద్‌నుంచి ఇక్కడికి రావాలంటే దూరమవుతుందని ఆలోచించానని చివరకు ఇక్కడికి వచ్చిన తర్వాత అభిమానులను చూసి సంతోషంగా ఉందన్నారు.
వరసిద్ధి షాపింగ్‌మాల్‌ ప్రారంభించడం ద్వారా జిల్లాలో అందుబాటులోకి అన్ని రకాల వస్త్రాలు అందుబాటులోకి వచ్చాయన్నారు. ప్రస్తుతం సినిమా రంగంలో రాణించడం సంతోషంగా ఉందని, ప్రస్తుతం రెండు సినిమాల్లో నటిస్తున్నట్లు వివరించారు. కార్యక్రమం అనంతరం బయల్దేరే ముందు ఆమెకోసం ఉదయం నుంచి ఎదురుచూస్తున్న అభిమానులకు రెజీనా అభివాదం చేశారు. దీంతో పెద్ద ఎత్తున కేకలు ఈలలతో సినిమా రోడ్‌ మారుమోగిపోయింది. పెద్ద ఎత్తున తరలివచ్చిన జనాలతో వారిని కట్టడి చేయడం పోలీసులకు కష్టతరమైంది. మొదటి సారిగా జిల్లా కేంద్రానికి ఓ పాపులర్‌ హిరోయిన్‌ రావడంతో ఆమె అభిమానులతో పాటు జనాలు పెద్ద ఎత్తున తరలివచ్చారు. ఆమె వెంట జిల్లా ఎస్పీ ఎం. శ్రీనివాస్, మున్సిపల్‌ చైర్‌పర్సన్‌ రంగినేని మనీషా, షాపింగ్‌మాల్‌ యజమానులు అనిల్‌ చల్లావార్, సాయికృష్ణ చల్లావార్‌లు ఉన్నారు.
