TV
కాంగ్రెస్‌ బలపరిచిన అభ్యర్థులనే గెలిపించాలి
● నర్సంపేట ఎమ్మెల్యే దొంతి మాధవరెడ్డి
దుగ్గొండి: స్థానిక ఎన్నికల్లో కాంగ్రెస్‌ బలపరిచిన అభ్యర్థులనే గెలిపించాలని నర్సంపేట ఎమ్మెల్యే దొంతి మాధవరెడ్డి పిలుపునిచ్చారు. గిర్నిబావిలోని జీఆర్‌బీ ఫంక్షన్‌హాల్‌లో శుక్రవారం జరిగిన కాంగ్రెస్‌ మండల విస్తృతస్థాయి కార్యకర్తల సమావేశంలో ఆయన మాట్లాడారు. పార్టీకి విధేయులుగా ఉండి, గ్రామాలను అభివృద్ధి చేయాలనే ఆశయం ఉన్నవారిని సర్పంచ్‌లు, వార్డు సభ్యులుగా ఎన్నుకోవాలని కోరారు. మొదటి నుంచి పార్టీ కోసం పనిచేసిన వారికి ప్రథమంగా అవకాశం ఇస్తామని ఆయన వెల్లడించారు. సమావేశంలో నర్సంపేట బ్లాక్‌ కాంగ్రెస్‌ అధ్యక్షుడు తోకల శ్రీనివాసరెడ్డి, పార్టీ మండల అధ్యక్షుడు చుక్క రమేశ్‌, మాజీ ఎంపీపీ బూరుగు రవీందర్‌, ఇంగోళి రాజేశ్వర్‌రావు, ఒలిగె నర్సింగరావు, వేముల ఇంద్రదేవ్‌ పాల్గొన్నారు.
డిసెంబర్‌ 5న నర్సంపేటలో సీఎం పర్యటన..
అభివృద్ధి పనుల్లో భాగంగా నర్సంపేటలో సీఎం రేవంత్‌రెడ్డి డిసెంబర్‌ 5న పర్యటించనున్నారని ఎమ్మెల్యే దొంతి మాధవరెడ్డి వెల్లడించారు. నర్సంపేట నుంచి వరంగల్‌ వరకు నాలుగు లేన్ల రహదారికి, నర్సంపేట వైద్య కళాశాలకు భవనం, ఇంటిగ్రేటేడ్‌ స్కూల్‌ భవన నిర్మాణ పనులకు శంకుస్థాపన చేస్తారని ఆయన తెలిపారు. సమావేశంలో మార్కెట్‌ కమిటీ చైర్మన్‌ పాలాయి శ్రీనివాస్‌, పీసీసీ మెంబర్‌ పెండెం రామానంద్‌, కిసాన్‌ సెల్‌ అధ్యక్షుడు దేవేందర్‌రావు, పులి అనిల్‌కుమార్‌, తోకల శ్రీనివాసరెడ్డి పాల్గొన్నారు.
