ఇందిరమ్మ ఇల్లు ప్రారంభం

ఇందిరమ్మ ఇల్లు ప్రారంభం

● ఎమ్మెల్యే రేవూరి ఎన్నికల కోడ్‌

ఉల్లంఘించారని విమర్శలు

గీసుకొండ: మండలంలోని ఎలుకుర్తిహవేలి గ్రామంలో పరకాల ఎమ్మెల్యే రేవూరి ప్రకాశ్‌రెడ్డి శుక్రవారం ఇందిరమ్మ ఇంటిని ప్రారంభించారు. గ్రామంలోని పల్లకొండ మమత–సతీశ్‌ దంపతులు ఇందిరమ్మ ఇంటిని నిర్మించుకున్నారు. మంచి రోజు కావడంతో గృహ ప్రవేశం చేసి పాలు పొంగించుకునే కార్యక్రమాన్ని చేపట్టారు. ఈ కార్యక్రమానికి హాజరైన ఎమ్మెల్యే రిబ్చన్‌ కట్‌ చేసి వారి ఇందిరమ్మ ఇంటిని ప్రారంభించారు. కార్యక్రమంలో మాజీ ఎంపీపీ భీమగాని సౌజన్య, కాంగ్రెస్‌ నాయకుడు గన్నోజు శ్రీనివాసాచారి తదితరులు పాల్గొన్నారు. స్థానిక ఎన్నికల కోడ్‌ అమలులో ఉండగా ఎమ్మెల్యే ఇందిరమ్మ ఇంటిని ప్రారంభించడం కోడ్‌ను ఉల్లంఘించడమేనని పలువురు విమర్శిస్తున్నారు. అయితే, నూతనంగా నిర్మించిన ఇంటిని ఎమ్మెల్యే పరిశీలించారని, ప్రారంభించలేదని స్థానిక కాంగ్రెస్‌ నాయకులు చెబుతున్నారు. ఈ విషయమై అధికారులను ‘సాక్షి’ వివరణ కోరగా తమకు సంబంధం లేదని, ఆ కార్యక్రమానికి వెళ్లలేదని తెలిపారు. కాగా, ఎమ్మెల్యే ఇందిరమ్మ ఇంటిని ప్రారంభించిన ఫొటోలు వాట్సాప్‌ గ్రూపుల్లో చక్కర్లు కొడుతున్నాయి.