TV
అమ్మవారిని దర్శించుకున్న ఎలక్షన్‌ జనరల్‌ అబ్జర్వర్‌
హన్మకొండ కల్చరల్‌: భద్రకాళి దేవాలయాన్ని శుక్రవారం బీసీ వెల్ఫేర్‌ కమిషనర్‌, ఎలక్షన్‌ జనరల్‌ అబ్జర్వర్‌ బి.బాల మాయదేవి ఐఏఎస్‌ సందర్శించారు. ఆలయ ఈఓ రామల సునీత, ఆలయ ప్రధానార్చకుడు భద్రకాళి శేషు, ధర్మకర్తలు గాదె శ్రవణ్‌రెడ్డి, మోత్కురి మయూరి, ఓరుగంటి పూర్ణచందర్‌, అర్చకులు పూర్ణకుంభంతో ఆమెకు ఘనంగా స్వాగతం పలికారు. అమ్మవారిని దర్శించుకుని పూజలు నిర్వహించుకున్న అనంతరం బాల మాయదేవికి ఆలయ చరిత్రను వివరించి తీర్థప్రసాదాలు, శేషవస్త్రాలు, మహదాశీర్వచనం అందించారు.
హన్మకొండ: కేంద్ర బొగ్గు, గనులశాఖ మంత్రి జి.కిషన్‌ రెడ్డి శనివారం హనుమకొండ, వరంగల్‌ జిల్లాల పర్యటనకు వస్తున్నారు. రైల్వే స్టేషన్‌లో జరిగిన, జరుగుతున్న అభివృద్ధి పనులు పరిశీలిస్తారు. అనంతరం భద్రకాళి అమ్మవారిని దర్శించుకుని అక్కడినుంచి వేయి స్తంభాల దేవాలయానికి చేరుకుంటారు. రుద్రేశ్వరున్ని దర్శించుకుని పూజ కార్యక్రమాలు నిర్వహిస్తారు. ఆ తర్వాత హోటల్‌ హరిత కాకతీయలో కాకతీయ మెగా టెక్స్‌టైల్‌ పార్కు అధికారులతో సమావేశమవుతారు. ఉదయం 11.45 గంటలకు కాజీపేట అయోధ్యపురంలోని రైల్వే మ్యానుఫాక్చరింగ్‌ యూనిట్‌ను సందర్శిస్తారు. మధ్యాహ్నం ఒంటి గంటకు సీసీఐ, నేషనల్‌ హైవేస్‌, జీడబ్ల్యూఎంసీ అధికారులతో సమావేశమవుతారు. సాయంత్రం 4 గంటలకు విలేకరుల సమావేశంలో మాట్లాడుతారు.
కాళోజీ సెంటర్‌: ఇంటర్మీడియెట్‌ ద్వితీయ సంవత్సరం రెగ్యులర్‌ విద్యార్థులకు సకాలంలో ప్రయోగ సిలబస్‌ పూర్తి చేయాలని ఇంటర్మీడియెట్‌ విద్యాశాఖ వరంగల్‌ జిల్లా అధికారి (డీఐఈఓ) డాక్టర్‌ శ్రీధర్‌ సుమన్‌ ఆదేశించారు. నగరంలోని పలు కళాశాలల్లోని ప్రయోగశాలలను తనిఖీ చేశారు. జిల్లాలోని అన్ని కళాశాలలు బోర్డు నిబంధనల మేరకు ప్రయోగాలు, పరీక్షలు నిర్వహించాలని సూచించారు. తనిఖీలో కళాశాలల ప్రిన్సిపాళ్లు, అధ్యాపకులు, కార్యాలయ సిబ్బంది ఉన్నారు.
వరంగల్‌ స్పోర్ట్స్‌: హనుమకొండలోని జేఎన్‌ఎస్‌లో పీఎం శ్రీ పాఠశాల విద్యార్థులకు జిల్లా స్థాయి క్రీడా పోటీలు నిర్వహించారు. డైరెక్టర్‌ ఆఫ్‌ స్కూల్‌ ఎడ్యుకేషన్‌ తెలంగాణ ఆదేశాలతో రెండురోజుల పాటు జరగనున్న పోటీలను శుక్రవారం ఇన్‌చార్జ్‌ డీఈఓ వెంకట్‌రెడ్డి ముఖ్య అతిథిగా హాజరై ప్రారంభించారు. ఈసందర్భంగా ఆయన మాట్లాడుతూ.. ఈపోటీల్లో జిల్లాలోని 16 పీఎంశ్రీ పాఠశాలల నుంచి 900 మంది విద్యార్థులు పాల్గొంటున్నట్లు తెలిపారు. మొదటి రోజు ఫుట్‌బాల్‌, ఖోఖో, కబడ్డీ, వాలీబాల్‌, అథ్లెటిక్స్‌ క్రీడల్లో పోటీలు నిర్వహించారు. హనుమకొండ డీవైఎస్‌ఓ గుగులోత్‌ అశోక్‌కుమార్‌, సమగ్ర శిక్ష ప్లానింగ్‌ కో–ఆర్డినేటర్‌ బి.మహేశ్‌, ఎస్‌జీఎఫ్‌ అండర్‌– 14 జిల్లా కార్యదర్శి వి.ప్రశాంత్‌, పీఈటీల సంఘం జిల్లా బాధ్యులు ప్రభాకర్‌రెడ్డి, పార్థసారధి, సుధాకర్‌, పీఎం శ్రీ పాఠశాలల హెచ్‌ఎంలు, పీఈటీలు, కోచ్‌లు పాల్గొన్నారు.
కేయూ క్యాంపస్‌: కాంగ్రెస్‌ ప్రభుత్వం బీసీలను నమ్మించి మోసం చేసిందని బీసీ జేఏసీ ఉమ్మడి వరంగల్‌ జిల్లా అధ్యక్షుడు వడ్లకొండ వేణుగోపాల్‌ అన్నారు. శుక్రవారం కాకతీయ యూనివర్సిటీలోని దూరవిద్య కేంద్రంలోని మహాత్మాజ్యోతిరావు పూలే విగ్రహానికి పూలమాలలు వేసి నివాళులర్పించారు. ఈసందర్భంగా ఆయన మాట్లాడారు. కాంగ్రెస్‌, బీజేపీ నాటకాలు ఆపి బీసీలకు 42 శాతం రిజర్వేషన్లు కల్పించాలని డిమాండ్‌ చేశారు. కార్యక్రమంలో జేఏసీ నాయకులు చిర్రరాజు, దాడి మల్లయ్యయాదవ్‌, సంగాని మల్లేశ్వర్‌, బోనగాని యాదగిరి, శోభారాణి, భీమగాని యాదగిరి, అశోక్‌గౌడ్‌, అవినాశ్‌, సుగుణ, కిషోర్‌, ప్రమోద్‌, మానస తదితరులు పాల్గొన్నారు.
అమ్మవారిని దర్శించుకున్న ఎలక్షన్‌ జనరల్‌ అబ్జర్వర్‌
