కాంగ్రెస్‌ను బొందపెట్టడానికి బీసీలంతా సిద్ధం

మల్కాజ్‌గిరి ఎంపీ ఈటల రాజేందర్‌

కమలాపూర్‌: స్థానిక సంస్థల ఎన్నికల్లో బీసీలకు 42శాతం రిజర్వేషన్లు ఇస్తామని కామారెడ్డి డిక్లరేషన్‌లో చెప్పి రెండేళ్లుగా రకరకాల డ్రామాలాడి బీసీల కళ్లల్లో మట్టికొట్టిన కాంగ్రెస్‌ పార్టీని బొందపెట్టడానికి బీసీలంతా సిద్ధమతున్నారని మల్కాజ్‌గిరి ఎంపీ, బీజేపీ జాతీయ కార్యవర్గ సభ్యుడు ఈటల రాజేందర్‌ అన్నారు. కమలాపూర్‌లోని తన నివాసంలో గ్రామ పంచాయతీ ఎన్నికల్లో పోటీ చేసే అభ్యర్థులు, నాయకులతో శుక్రవారం ఆయన సమావేశమమై ఎన్నికలపై చర్చించారు. అనంతరం ఏర్పాటు చేసిన మీడియా సమావేశంలో ఆయన మాట్లాడుతూ.. కొన్ని జిల్లాల్లో 17 శాతం, ఇంకొన్ని జిల్లాల్లో 21 శాతం మాత్రమే బీసీలకు రిజర్వేషన్లు దక్కాయని, స్థానిక సంస్థల ఎన్నికలకు సంబంధించి ప్రభుత్వం సరైన ఏర్పాట్లు చేయలేదని, సర్వర్లు పనిచేయడం లేదని, అభ్యర్థులకు అవసరమైన సర్టిఫికెట్లు ఇవ్వడం లేదని ఆరోపించారు. గ్రామాల్లో గతంలో పనిచేసిన సర్పంచులకు ఇప్పటివరకు బిల్లులు ఇవ్వలేదని, అనేకమంది సర్పంచులు ఆత్మహత్యలు చేసుకున్నారని, దీంతో ఎన్నికల్లో మళ్లీ పోటీ చేయడానికి భయపడుతున్నారన్నారు. గ్రామ పంచాయతీలకు రాష్ట్ర ప్రభుత్వ నిధులు లేవని, కేంద్రం నిధులు మాత్రమే వస్తున్నాయన్నారు. దీంతో కాంగ్రెస్‌ పార్టీపై ప్రజల్లో వ్యతిరేకత ఉందని, బీఆర్‌ఎస్‌కు ప్రజలు ఓట్లేసే పరిస్థితి లేదన్నారు.

నా కోసం కష్టపడ్డ వాళ్లందరినీ గెలిపించుకుంటా..

తన కోసం కష్టపడ్డ వాళ్లందరినీ స్థానిక సంస్థల ఎన్నికల్లో గెలిపించుకుంటానని ఈటల రాజేందర్‌ హామీ ఇచ్చారు. 25 ఏళ్లుగా నియోజకవర్గంలో అన్ని ఎన్నికల్లో అన్ని పదవులు తామే గెలుచుకుంటూ వస్తున్నామన్నారు. మీరు మెచ్చిన, నచ్చిన అభ్యర్థులను మాత్రమే ఎంపిక చేస్తామని, వారిని గెలిపించాలని విజ్ఞప్తి చేశారు. నామినేషన్ల విత్‌డ్రాలు పూర్తయ్యాక మా వారిని గెలిపించండని, మీ ఆశీర్వాదంతో మళ్లీ మీకు సేవ చేసే అవకాశం కల్పించాలని తానే స్వయంగా వచ్చి ఓట్లు అడుగుతానన్నారు. సమావేశంలో బీజేపీ నాయకులు వేణుగోపాల్‌రెడ్డి, గౌతంరెడ్డి, బండి కళాధర్‌, రవికుమార్‌, పబ్బు సతీశ్‌, కొండం శ్రీనివాస్‌, తుమ్మ శోభన్‌, నాయకులు, కార్యకర్తలు పాల్గొన్నారు.