ఎన్నికలు పారదర్శకంగా నిర్వహించాలి

● జిల్లా ఎన్నికల పరిశీలకురాలు

బాలమాయదేవి

వరంగల్‌: గ్రామ పంచాయతీ ఎన్నికలను ప్రశాంత వాతావరణంలో, పారదర్శకంగా, పకడ్బందీగా నిర్వహించాలని గ్రామ పంచాయతీ ఎన్నికల సాధారణ పరిశీలకులు, రాష్ట్ర బీసీ సంక్షేమ శాఖ కమిషనర్‌ బాలమాయదేవి అన్నారు. కలెక్టరేట్‌లో కలెక్టర్‌ డాక్టర్‌ సత్యశారద, డీసీపీ అంకిత్‌ కుమార్‌, వ్యయ పరిశీలకులు సునయన చౌహన్‌తో కలిసి ఎన్నికల నోడల్‌ అధికారులతో ఎన్నికల నిర్వహణ, ఏర్పాట్లు, భద్రతా చర్యలు, తదితర అంశాలపై గురువారం సమీక్ష సమావేశం నిర్వహించారు. ఈ సందర్భంగా బాలమాయదేవి మాట్లాడుతూ నోడల్‌ అధికారులు, పోలీసు అధికారులు, సిబ్బంది అప్రమత్తంగా ఉంటూ సాంకేతిక నైపుణ్యాన్ని ఉపయోగించుకొని పనిచేయాలన్నారు. ప్రశాంత, స్వేచ్ఛాయుత వాతావరణంలో ఓటర్లు తమ ఓటు హక్కును ఉపయోగించుకొనే విధంగా తగు చర్యలను తీసుకోవాలని ఆదేశించారు. ఎన్నికల్లో ఓటర్లను అభ్యర్థులు ప్రలోభాలకు గురిచేయకుండా కట్టుదిట్టమైన వ్యవస్థ అమలు చేస్తూ ప్రత్యేకంగా ఎఫ్‌ఎస్‌టీ (ఫ్లైయింగ్‌ స్క్వాడ్‌ టీమ్‌), ఎస్‌ఎస్‌టీ (స్టాటిక్‌ సర్వైలైన్స్‌ టీమ్‌) బృందాలు నిరంతరం నిఘా ఉంచాలన్నారు. జిల్లాలో ఎన్నికల ఏర్పాట్లపై మూడు దశల్లో నిర్వహిస్తున్న గ్రామ పంచాయతీ ఎన్నికల ఏర్పాట్ల పూర్తి వివరాలను జిల్లా పరిశీలకులు బాలమాయదేవి, వ్యయ పరిశీలకులు సునయన చౌహన్‌కు కలెక్టర్‌ డాక్టర్‌ సత్యశారద అందించారు. సమావేశంలో అదనవు కలెక్టర్‌ సంధ్యారాణి, జెడ్పీ సీఈఓ రామిరెడ్డి, డీపీఓ కల్పన, జిల్లా నోడల్‌ అధికారులు, ఆర్డీఓలు, తదితరులు పాల్గొన్నారు.

అంకితభావంతో పని చేయాలి

రాయపర్తి / వర్ధన్నపేట / పర్వతగిరి: స్థానిక ఎన్నికలు సజావుగా జరిగేలా అధికారులు అంకితభావంతో పనిచేయాలని బాలమాయదేవి అధికారులకు సూచించారు. జిల్లా వ్యాప్తంగా పలు పోలింగ్‌ నామినేషన్ల కేంద్రాలు, పోలింగ్‌ సెంటర్లను కలెక్టర్‌ సత్యశారద, వ్యయ పరిశీలకులు సునయన చౌహన్‌తో కలిసి గురువారం సందర్శించి పరిశీలించారు. రాయపర్తి మండలంలోని రాయపర్తి, రాగన్నగూడెం, జేతురాం తండా, గణేష్‌కుంట తండా, మహబూబ్‌నగర్‌ గ్రామాల్లో ఏర్పాటు చేసిన నామినేషన్‌ కేంద్రాలను సందర్శించి రిటర్నింగ్‌ అధికారుల ట్రైనింగ్‌, నిర్వహణ, విధివిధానాలను అడిగి తెలుసుకున్నారు. కట్య్రాల క్లస్టర్‌ గ్రామ పంచాయతీని సందర్శించి రామోజీ కుమ్మరిగూడెం, కట్య్రాల గ్రామాల్లో నామినేషన్లపై ఆరా తీశారు. ఎలాంటి తప్పులు, పొరపాట్లు జరగకుండా తగు జాగ్రత్తలు తీసుకోవాలని చెప్పారు. పర్వతగిరి మండల కేంద్రంలోని నామినేషన్ల కేంద్రాన్ని సందర్శించి నామినేషన్ల స్వీకరణకు చేపట్టిన ఏర్పాట్లను పరిశీలించారు. అనంతరం, జిల్లా పరిషత్‌ ఉన్నత పాఠశాలలో ఏర్పాటు చేసిన పోలింగ్‌, కౌంటింగ్‌ కేంద్రాలను పరిశీలించారు. ఎన్నికల సందర్భంగా తీసుకోవాల్సిన చర్యలపై అధికారులకు పలు సూచనలు చేశారు. ఆయా కార్యక్రమాల్లో అదనపు కలెక్టర్‌ సంధ్యారాణి, జెడ్పీసీఈఓ ఇన్‌చార్జ్‌, డీఆర్‌డీఓ రాంరెడ్డి, డీపీఓ కల్పన, ఆర్డీఓ సుమ, జీఎం ఇండస్ట్రీయల్‌ అధికారి నర్సింహమూర్తి, తహసీల్దార్లు శ్రీనివాస్‌, విజయసాగర్‌, వెంకటస్వామి, ఎంపీడీఓలు వెంకటరమణ, గుగులోతు కిషన్‌నాయక్‌, శంకర్‌నాయక్‌, ఎంపీఓ ప్రకాష్‌, రిటర్నింగ్‌, అసిస్టెంట్‌ రిటర్నింగ్‌ అధికారులు పాల్గొన్నారు.

ఎన్నికలు పారదర్శకంగా నిర్వహించాలి