నేటి విద్యార్థులే రేపటి శాస్త్రవేత్తలు

● డీఈఓ రంగయ్యనాయుడు

● జిల్లాస్థాయి ఇన్‌స్పైర్‌, బాల వైజ్ఞానిక ప్రదర్శన ప్రారంభం

ఖిలా వరంగల్‌: నేటి విద్యార్థులే రేపటి శాస్త్రవేత్తలని, విద్యార్థులు శాసీ్త్రయ దృక్పథాన్ని అలవర్చుకోవాలని జిల్లా విద్యాశాఖ అధికారి బి.రంగయ్యనాయుడు, ఆర్జేడీ సత్యనారాయణ రెడ్డి సూచించారు. వరంగల్‌ హంటర్‌ రోడ్డులోని తాళ్ల పద్మావతి ఇంటర్నేషనల్‌ స్కూల్‌ ప్రాంగణంలో జిల్లా విద్యాశాఖ, వరంగల్‌ జిల్లా సైన్స్‌ అధికారి డాక్టర్‌ కట్ల శ్రీనివాస్‌ ఆధ్వర్యంలో గురువారం నుంచి శనివారం వరకు జరగనున్న జిల్లాస్థాయి ఇన్‌స్పైర్‌, బాల వైజ్ఞానిక ప్రదర్శన 2025 –26 మేళా గురువారం అట్టహాసంగా ప్రారంభమైంది. జిల్లా నలుమూలల నుంచి 2వేలకు పైగా ప్రభుత్వ, ప్రైవేట్‌ పాఠశాలల విద్యార్థులు హాజరై సుమారు 395 ఎగ్జిబిట్లు, 164 ఇన్‌స్పైర్‌ ప్రాజెక్టులను ప్రదర్శించారు. ముఖ్యఅతిథులు వారు హాజరై తాళ్ల పద్మావతి విద్యాసంస్థల చైర్మన్‌ తాళ్ల మల్లేశం, డైరెక్టర్లు వంశీ, వరుణ్‌తో కలిసి జ్యోతి ప్రజ్వలన చేశారు. కేయూ యూనివర్సిటీ అధ్యాపకులు జడ్జీలుగా వ్యహరించి విద్యార్థులు ప్రదర్శించిన ఎగ్జిబిట్లను పరిశీలించారు.

ఆకట్టుకున్న సాంస్కృతిక నృత్యాలు

జిల్లా స్థాయి సైన్స్‌ ఫెయిర్‌, బాలల వైజ్ఞానిక ప్రదర్శన వేడుకలు ఘనంగా ప్రారంభమయ్యాయి. చెన్నారావు పేట మండలం ఉప్పరపల్లి జిల్లా పరిషత్‌ ఉన్నత పాఠశాల విద్యార్థినులు, తాళ్ల పద్మావతి ఇంటర్నేషనల్‌ స్కూల్‌ విద్యార్థిని ప్రదర్శించిన సాంస్కృతిక నృత్యాలు అలరించాయి. కేజీబీవీ ఖానాపూర్‌ విద్యార్థి, తాళ్ల పద్మావతి విద్యార్థులు ప్రదర్శించిన సిందూర్‌ ఆపరేషన్‌ నృత్యాలు ఆకట్టుకున్నాయి. కార్యక్రమంలో జిల్లా సెక్టోరియల్‌ అధికారులు ఇండ్రాతి సుజన్‌ తేజ, కొల్లూరి ఫ్లోరెన్స్‌, విజయ్‌ కుమార్‌, డీసీఈబీ సెక్రటరీ గారె కృష్ణమూర్తి, ఏసీజీఈ అరుణ, ఎంఈఓ బి.ప్రసాద్‌, ప్రిన్సిపాల్‌ డాక్టర్‌ జె.వెంకటేశ్వర రావు, కన్వీనర్లు, తదితరులు పాల్గొన్నారు.

నేటి విద్యార్థులే రేపటి శాస్త్రవేత్తలు