వృద్ధులు ఆరోగ్యంపై శ్రద్ధ వహించాలి

● డిప్యూటీ డీఎంహెచ్‌ఓ ప్రకాశ్‌

గీసుకొండ: వృద్ధులు ఆరోగ్యంగా ఉండేలా వైద్య సిబ్బంది కృషి చేయాలని డిప్యూటీ డీఎంహెచ్‌ఓ డాక్టర్‌ ప్రకాశ్‌ సూచించారు. జిల్లా వైద్య, ఆరోగ్యశాఖ కార్యాలయంలో ‘వృద్ధుల మానసిక ఆరోగ్యంపై జాగ్రత్తలు’ అనే విషయంపై ఆశ, ఆరోగ్య కార్యకర్తలు, పల్లె దవాఖాన వైద్యాధికారులకు గురువారం ఏర్పాటు చేసిన అవగాహన కార్యక్రమంలో ఆయన మాట్లాడారు. వృద్ధుల ఆరోగ్య స్థితిని గమనిస్తూ ఎప్పటికప్పుడు తగిన మందులు ఇవ్వాలని, అవసరమైన సూచనలు చేయాలని ఆదేశించారు. మానసిక వైద్యుడు శ్రీధర్‌రాజు మాట్లాడుతూ వృద్ధాప్యంలో కుంగుబాటు, ఒత్తిడి, జ్ఞాపకశక్తి తగ్గిపోవడం వంటి లక్షణాలు వస్తాయని, వాటిని అధిగమించేలా తగు జాగ్రత్తలు పాటించాలని ఆయన వివరించారు. వైద్య ఆరోగ్యశాఖ, వరంగల్‌ సీనియర్‌ సిటిజన్‌ అసోసియేషన్‌, హైదరాబాద్‌ హెల్పేజ్‌ ఇండియా ఆధ్వర్యంలో నిర్వహించిన అవగాహన సదస్సులో డిప్యూటీ డెమో అనిల్‌కుమార్‌, హెల్పేజ్‌ ఇండియా కోఆర్డినేటర్‌ రమేష్‌, సీనియర్‌ సిటిజన్‌ వెల్ఫేర్‌ జిల్లా అధ్యక్షుడు కొన్రెడ్డి మల్లారెడ్డి, ఉపాధ్యక్షుడు సత్యనారాయణ, సంయుక్త కార్యదర్శి రాజేంద్రప్రసాద్‌, వైద్య సిబ్బంది, తదితరులు పాల్గొన్నారు.