నామినేషన్ల స్వీకరణకు ఏర్పాట్లు

హనుమకొండ అర్బన్‌: జిల్లాలో గురువారం నుంచి మొదటి విడత పంచాయతీ ఎన్నికల నామినేషన్ల స్వీకరణ ప్రారంభమవుతుంది. మూడు విడతల్లో జరగనున్న గ్రామ పంచాయతీ ఎన్నికలకు సంబంధించి తొలి విడత ఏర్పాట్లు పూర్తయ్యాయి. బుధవారం కమలాపూర్‌ మండలంలోని గ్రామ పంచాయతీలను, పోలింగ్‌ కేంద్రాలను క్షేత్రస్థాయిలో పరిశీలించిన కలెక్టర్‌ అధికారులు తీసుకోవాల్సిన జాగ్రత్తలు, చేయాల్సిన ఏర్పాట్లపై స్పష్టమైన ఆదేశాలు ఇచ్చారు. అనంతరం కలెక్టరేట్‌లో సంబంధిత శాఖల అధికారులతో సమావేశం నిర్వహించి ఎన్నికల ప్రక్రియపై సమీక్ష చేపట్టారు. జిల్లాలో మొదటి విడతలో భీమదేవరపల్లి, ఎల్కతుర్తి, కమలాపూర్‌ మండలాల్లోని 69 గ్రామ పంచాయతీలు, 658 వార్డులకు ఎన్నికలు జరగనున్నాయి. వీటికి నామినేషన్ల స్వీకరణ ప్రక్రియ గురువారం అధికారికంగా ప్రారంభమవుతుందని కలెక్టర్‌ పేర్కొన్నారు. ఎన్నికల ప్రవర్తనా నియమావళి జిల్లా వ్యాప్తంగా అమల్లోకి వచ్చింది. సరిహద్దు ప్రాంతాల్లో చెక్‌పోస్టులు ఏర్పాటు చేసి వాహనాలు, వ్యక్తులపై తనిఖీలు కఠినతరం చేసినట్లు అధికారులు వివరించారు. మొత్తం మీద ఎన్నికల ప్రక్రియ పారదర్శకంగా, సజావుగా సాగేందుకు జిల్లా యంత్రాంగం అన్ని ఏర్పాట్లను పూర్తిచేసిందని కలెక్టర్‌ స్పష్టం చేశారు.

కలెక్టరేట్‌లో ఎన్నికల సహాయక కేంద్రం

గ్రామ పంచాయతీ ఎన్నికల నేపథ్యంలో కలెక్టరేట్‌లో ప్రత్యేక ఎన్నికల సహాయక కేంద్రం ఏర్పాటు చేసినట్లు జిల్లా ఎన్నికల అధికారి, కలెక్టర్‌ స్నేహ శబరీష్‌ తెలిపారు. ఈ సహాయక కేంద్రం మూడు విడతల ఎన్నికలు పూర్తయ్యేవరకు 24 గంటలు పనిచేస్తుందని పేర్కొన్నారు. ఎన్నికలకు సంబంధించిన సందేహాలు, సాంకేతిక సమస్యలు, ఫిర్యాదుల వంటి విషయాల కోసం ప్రజలు 7981975495 ఫోన్‌ నంబర్‌లో సంప్రదించవచ్చని సూచించారు.

24 క్లస్టర్లలో 24 నామినేషన్‌ కేంద్రాలు..

మొదటి విడత పంచాయతీ ఎన్నికల నామినేషన్ల స్వీకరణకు అన్ని ఏర్పాట్లు పూర్తి చేసినట్లు కలెక్టర్‌ స్నేహ శబరీష్‌ తెలిపారు. రాష్ట్ర ఎన్నికల సంఘం కమిషనర్‌ రాణికుముదిని బుధవారం హైదరాబాద్‌ నుంచి అన్ని జిల్లాల కలెక్టర్లతో నిర్వహించిన వీడియో కాన్ఫరెన్స్‌లో హనుమకొండ జిల్లాకు సంబంధించిన ఏర్పాట్లను కలెక్టర్‌ వివరించారు. ఈ సందర్బంగా కలెక్టర్‌ మాట్లాడుతూ భీమదేవరపల్లి, ఎల్కతుర్తి, కమలాపూర్‌ మండలాల్లో మొత్తం 24 క్లస్టర్లలో 24 నామినేషన్‌ కేంద్రాలు ఏర్పాటు చేశామని తెలిపారు. గురువారం నుంచి ప్రారంభమయ్యే సర్పంచ్‌, వార్డు సభ్యుల నామినేషన్ల స్వీకరణ కోసం సంబంధిత కేంద్రాల వద్ద పోలీస్‌ బందోబస్తు, అవసరమైన ఎన్నికల సామగ్రి, సిబ్బంది నియామకాలు పూర్తిచేశామని చెప్పారు. మొదటి విడత తర్వాత రెండో విడతలో ఐదు మండలాలు, మూడో విడతలో నాలుగు మండలాలకు ఎన్నికల ఏర్పాట్లు చేస్తున్నట్లు పేర్కొన్నారు. సెంట్రల్‌ జోన్‌ డీసీపీ దారా కవిత, అదనపు కలెక్టర్‌ వెంకట్‌రెడ్డి, ఆర్డీఓలు రాథోడ్‌ రమేశ్‌, డాక్టర్‌ కన్నం నారాయణ, జిల్లా పంచాయతీ అధికారి లక్ష్మీ రమాకాంత్‌, జెడ్పీ సీఈఓ రవి, ఎంసీసీ నోడల్‌ అధికారి ఆత్మారాం పాల్గొన్నారు.

కమలాపూర్‌: సర్పంచ్‌, వార్డు స్థానాల నామినేషన్ల స్వీకరణకు ఏర్పాట్లు పకడ్బందీగా ఉండాలని కలెక్టర్‌ స్నేహ శబరీష్‌ అధికారులను ఆదేశించారు. కమలాపూర్‌ అంబాల గ్రామ పంచాయతీ కార్యాలయంలో నామినేషన్ల స్వీకరణ ఏర్పాట్లను కలెక్టర్‌ బుధవారం పరిశీలించారు. కమలాపూర్‌ ఎంపీడీఓ కార్యాలయంలో ఆయా క్లస్టర్లకు తరలించేందుకు సిద్ధంగా ఉన్న ఎన్నికల సామగ్రిని కలెక్టర్‌ పరిశీలించారు. ఎలక్షన్‌ నోటీస్‌, ఓటర్ల జాబితా, నామినేషన్‌ పత్రాలు, ఎన్నికల ప్రవర్తనా నియమావళికి సంబంధించిన పత్రాలతో పాటు పోటీ చేసే అభ్యర్థుల కోస ముద్రించిన కరదీపికను కలెక్టర్‌ క్షుణ్ణంగా పరిశీలించారు. మండలంలోని 10 క్లస్టర్లు, 24 గ్రామ పంచాయతీలకు సంబంధించిన వివరాలు ఎంపీడీఓను అడిగి తెలుసుకున్నారు. ఈసందర్భంగా కలెక్టర్‌ మాట్లాడుతూ నామినేషన్‌ కేంద్రాల్లో సర్పంచ్‌, వార్డు స్థానాలకు అభ్యర్థులు సమర్పించే నామినేషన్‌ పత్రాలు అన్నీ సరిగ్గా ఉన్నాయా లేదా? అని రిటర్నింగ్‌ అధికారులు సరిచూసుకోవాలన్నారు. నామినేషన్‌ పత్రాలకు ఏయే పత్రాలు జత చేయాల్సి ఉంటుందో చెక్‌ లిస్ట్‌ ఇవ్వాలన్నారు. నామినేషన్‌ కేంద్రాల వద్ద అన్ని ఏర్పాట్లతోపాటు పోలీస్‌ బందోబస్తు ఏర్పాటు చేయాలని ఆదేశించారు.

మొదటి విడత భీమదేవరపల్లి,

ఎల్కతుర్తి, కమలాపూర్‌

మండలాల్లో ఎన్నికలు

69 గ్రామ పంచాయతీలు,

658 వార్డులకు పోలింగ్‌

నిర్వహించనున్న అధికారులు