కంఠమహేశ్వర స్వామికి జలాభిషేకం

నర్సంపేట రూరల్‌: చెన్నారావుపేట మండలంలోని కోనాపురం గ్రామంలో గౌడ సంఘం ఆధ్వర్యంలో సోమవారం గ్రామదేవతలకు ప్రత్యేక పూజలు నిర్వహించారు. గౌడ కులస్తుల ఆరాధ్య దైవం కంఠమహేశ్వరస్వామికి జలాభిషేకం నిర్వహించారు. డప్పుచప్పుళ్లు, నీటి బిందెలతో ఊరేగింపుగా వచ్చి స్వామివారికి జలాభిషేకం నిర్వహించారు. అనంతరం గౌడ కులస్తులు ప్రత్యేక పూజలు నిర్వహించారు. గౌడ కులస్తులు, గ్రామస్తులు, తదితరులు పాల్గొన్నారు.

పథకాలను సద్వినియోగం చేసుకోవాలి

నర్సంపేట రూరల్‌: ప్రభుత్వ పథకాలను ప్రజలు సద్వినియోగం చేసుకోవాలని జిల్లా మహిళా అధ్యక్షురాలు కర్నాటి పార్వతమ్మ అ న్నారు. నర్సంపేట మండలం గుంటూరుపల్లి, పాత ముగ్ధుంపురం గ్రామాల్లో ఇందిరమ్మ చీరలను పంపిణీ చేశారు. ఈ సందర్భంగా ఆమె మాట్లాడుతూ మహిళాభివృద్ధికి ప్రభుత్వం కృషి చేస్తుందన్నారు. ఈ కార్యక్రమంలో మండల అధ్యక్షుడు కత్తి కిరణ్‌, దౌడు భాస్కర్‌, రాజు, సాంబలక్ష్మీ, రమాదేవి, రాజేశ్వరీ, సీసీ వనమ్మ, సునీత, తదితరులు పాల్గొన్నారు. అలాగే చెన్నారావుపేట మండలంలోని అక్కల్‌చెడ గ్రామంలో మహిళలకు ఇందిరమ్మ చీరలను భూక్య గోపాల్‌నాయక్‌ పంపిణీ చేశారు.

గడువు తీరిన సరుకులు తిరిగి పంపించాలి

న్యూశాయంపేట: గడువు తీరిన సరుకుల తిరిగి పంపించాలని అదనపు కలెక్టర్‌ జి.సంధ్యారాణి తెలిపారు. సోమవారం కలెక్టరేట్‌ సమావేశ హాలులో కలెక్టర్‌ సత్యశారద ఆదేశాల మేరకు ఫుడ్‌ సేఫ్టీ అధికారి కృష్ణమూర్తి, డీబీసీడీఓ పుష్పలత, డీఈఓ రంగయ్యనాయుడు, డీఏఓ అనురాధ, భాగ్యలక్ష్మితో పాటు జిల్లాలోని హాస్టల్స్‌ ప్రిన్సిపాల్స్‌తో సమీక్ష సమావేశం నిర్వహించారు. ఈ సందర్భంగా అదనపు కలెక్టర్‌ మాట్లాడుతూ గుడ్ల టెండర్స్‌ సప్‌లై చేసిన వెంటనే పరిశీలించి ఎప్పటికప్పుడు గ్రేడింగ్‌ చేయాలన్నారు. కుళ్లిపోయిన కూరగాయలను పరిశీలించి జాగ్రత్తలు తీసుకోవాలన్నారు. రైస్‌బ్యాగ్స్‌ను నేల మీద కాకుండా ఎత్తులో పెట్టినట్లయితే బియ్యం నాణ్యత కోల్పోకుండా ఉంటాయన్నారు. ప్రిన్సిపాల్స్‌, హాస్టల్‌ వార్డెన్స్‌, స్టోర్‌ ఇన్‌చార్జ్‌లు పిల్లల ఆరోగ్యంపై జాగ్రత్తలు పాటించాలని వారు తెలిపారు.

గిర్నిబావిలో జిల్లాస్థాయి సాంస్కృతిక సంబురాలు

దుగ్గొండి: మండలంలోని గిర్నిబావిలోని మహాత్మా జ్యోతిబా పూలే గురుకుల విద్యాలయంలో పూలే బాలురు గురుకుల పాఠశాలల జిల్లా స్థాయి సాంస్కృతిక సంబురాలను సోమవారం నిర్వహించారు. జిల్లాస్థాయిలో 18 పాఠశాలల నుంచి 250 మంది విద్యార్థులు పోటీలో పాల్గొన్నారు. సంబురాల్లో వ్యాసరచన, ఉపన్యాసం, డిబేట్‌, మిమిక్రీలు నిర్వహించి జిల్లాస్థాయి విజేతలను రాష్ట్రస్థాయికి ఎంపిక చేశారు. ఈ కార్యక్రమంలో ప్రిన్సిపాల్స్‌ వెంకటేశ్వర్లు, శ్రీలత, రాజేశ్వరి న్యాయ నిర్ణేతలుగా పనిచేయగా ఉపాధ్యాయులు, విద్యార్థులు పాల్గొన్నారు.

యూనిటీ మార్చ్‌కు గణేశ్‌

రాయపర్తి: సర్ధార్‌ వల్లబాయ్‌ పటేల్‌ 150వ జయంతి సందర్భంగా కేంద్ర ప్రభుత్వం దేశవ్యాప్తంగా నిర్వహిస్తున్న యూనిటీ మార్చ్‌కు రాయపర్తి మండలకేంద్రానికి చెందిన పెండ్యాల గణేశ్‌ ఎన్నికయ్యారు. ఈ మేరకు జనగామ జిల్లా కలెక్టర్‌ ఇటీవల ఉత్తర్వులు జారీ చేశారు. ఈ మేరకు ఆదివారం హైదరాబాద్‌లోని బీజేపీ రాష్ట్ర కార్యాలయం నుంచి యూనిటీ మార్చ్‌ ప్రారంభమై నాగపూర్‌, బైతులు, ఇండోర్‌ మీదుగా గుజరాత్‌లోని ఐక్యత విగ్రహం వద్ద ఈ నెల 28న ముగియనుంది. ఈ సందర్భంగా గణేష్‌ మాట్లాడుతూ తన ఎన్నికకు సహకరించిన జనగామ బీజేపీ జిల్లా అధ్యక్షుడు సౌడ రమేశ్‌, పాలకుర్తి నియోజకవర్గ ఇన్‌చార్జ్‌ లేగ రామ్మోహన్‌రెడ్డి, భాగాల నవీన్‌రెడ్డి, నూనె అనిల్‌, ఎనగందుల శ్రావణ్‌కుమార్‌కు గణేశ్‌ కృతజ్ఞతలు తెలిపారు.

కంఠమహేశ్వర స్వామికి జలాభిషేకం

కంఠమహేశ్వర స్వామికి జలాభిషేకం

కంఠమహేశ్వర స్వామికి జలాభిషేకం