ఏకవీర ఆలయ పునరుద్ధరణకు కృషి

● ఎంపీ కడియం కావ్య, ఎమ్మెల్యే రేవూరి

గీసుకొండ: గ్రేటర్‌ వరంగల్‌ నగరం 15వ డివిజన్‌ మొగిలిచర్లలోని పురాతన ఏకవీర దేవాలయ పునరుద్ధరణకు ప్రభుత్వం చర్యలు తీసుకుంటోందని, ఇందుకు అవసరమైన నిధుల మంజూరుకు కృషి చేస్తామని వరంగల్‌ ఎంపీ కడియం కావ్య, పరకాల ఎమ్మెల్యే రేవూరి ప్రకాశ్‌రెడ్డి అన్నారు. సోమవారం చారిత్రక ప్రాధాన్యం కలిగి శిథిలావస్థలో ఉన్న ఏకవీర ఆలయాన్ని కలెక్టర్‌ సత్యశారద, పురావస్తు శాఖ సంచాలకులు అర్జున్‌రావుతో కలిసి పరిశీలించారు. ఈ సందర్భంగా ఎంపీ, ఎమ్మెల్యే మాట్లాడుతూ రాబోయే వందేళ్లను దృష్టిలో పెట్టుకుని అవసరమైన మాస్టర్‌ ప్లాన్‌ను రూపొందించి ఆలయానికి పక్కనే ఉన్న ప్రభుత్వ భూమిని అదనంగా తీసుకుని గార్డెనింగ్‌, ల్యాండ్‌ స్కేపింగ్‌ పనులు చేయిస్తామన్నారు. కలెక్టర్‌ సత్యశారద మాట్లాడుతూ గతంలో సుమారు 30 విగ్రహాలను ఆలయ ఆవరణలో ఏర్పాటు చేశామని, వాటికి పీఠాలు ఏర్పాటు చేసి అమరుస్తామన్నారు. రాష్ట్ర పురావస్తుశాఖ సంచాలకులు అర్జున్‌రావు మాట్లాడుతూ ఆలయ ప్రాచీనతను కాపాడే చర్యలు చేపడుతామన్నారు. ఎంపీ, ఎమ్మెల్యే, కలెక్టర్‌తో పాటు సంబంధించిన అధికారులు రాతిని తొలచి నిర్మించిన గుహలతో పాటు ఇటీవల గ్రామం నుంచి సేకరించిన శిల్పాలు, శాసనాలను ఏర్పాటు చేసిన ప్రాంతాలను పరిశీలించారు. శ్రీకుడాశ్రీ చైర్మన్‌ ఇనుగాల వెంకట్రాంరెడ్డి, పురావస్తుశాఖ ఏడీ బుజ్జి, డీఆర్‌ఓ విజయలక్ష్మి, జిల్లా పర్యాటక శాఖ అధికారి శివాజీ, గీసుకొండ తహసీల్దార్‌ ఎండీ. రియాజొద్దీన్‌, టార్స్‌ సంస్థ ప్రతినిధి అరవింద్‌ ఆర్యా, ఆలయ కమిటీ చైర్మన్‌ ఆడెపు రమేశ్‌, నాయకులు పాల్గొన్నారు.