రుణాల పంపిణీకి ఏర్పాట్లు చేయాలి

● కలెక్టర్‌ సత్యశారద

న్యూశాయంపేట: జిల్లాలోని అన్ని అసెంబ్లీ నియోజకవర్గ కేంద్రాల్లో నేడు (మంగళవారం) స్వయం సహాయక మహిళా సంఘాలకు సుమారు రూ.6.52 కోట్ల వడ్డీలేని రుణాలు పంపిణీ చేయనున్నట్లు కలెక్టర్‌ సత్యశారద తెలిపారు. ఈ కార్యక్రమాన్ని అన్ని సెగ్మెంట్‌లలో ఏకకాలంలో పండుగ వాతావరణంలో జరిగేలా విస్తృత ఏర్పాట్లు చేయాలని సంబంధిత అధికారులను ఆదేశించారు. సోమవారం హైదరాబాద్‌లోని సచివాలయం నుంచి వీడియో కాన్ఫరెన్స్‌ ద్వారా పంచాయతీరాజ్‌ శాఖ మంత్రి దనసరి అనసూయ (సీతక్క) ప్రభుత్వ ప్రధాన కార్యదర్శి రామకృష్ణరావు, సెర్ఫ్‌ సీఈఓ దివ్య దేవరాజన్‌ తదితరులతో కలిసి ఉప ముఖ్యమంత్రి మల్లు భట్టి విక్రమార్క ఇందిరమ్మ చీరల పంపిణీ, వడ్డీ లేని రుణాల పంపిణీ తదితర కార్యక్రమాలపై అన్ని జిల్లాల కలెక్టర్‌లతో సమీక్షించారు. అన్ని సెగ్మెంట్‌లలో రుణాల పంపిణీ సజావుగా జరిగేలా చర్యలు తీసుకోవాలన్నారు. అనంతరం కలెక్టర్‌ సత్యశారద జిల్లా అధికారులతో మాట్లాడుతూ జిల్లాలో 10,357 ఎస్‌హెచ్‌జీ సంఘాలకు రూ.6.52 కోట్ల వడ్డీ లేని రుణాలు పంపిణీ చేయనున్నట్లు తెలి పారు. జెడ్పీ సీఈఓ, ఇన్‌చార్జ్‌ డీఆర్‌డీఓ రామిరెడ్డి, జిల్లా మహిళా సమాఖ్య ప్రతినిధులు ఉమ, రాధిక, ఐకేపీ అధికారులు పాల్గొన్నారు.