ఓజేటీతో ఉద్యోగావకాశాలు
కాళోజీ సెంటర్: ఇంటర్మీడియట్ కళాశాలల్లో నిర్వహించే ఆన్ జాబ్ ట్రైనింగ్ (ఓజేటీ)తో ఉద్యోగావకాశాలకు మార్గం చూపుతుందని ఇంటర్మీడియట్ విద్యాశాఖ జిల్లా అధికారి డాక్టర్ శ్రీధర్ సుమన్ అన్నారు. సోమవారం హన్మకొండలోని రోహిణి ఆస్పత్రి, నర్సింగ్ కళాశాలలో ఆర్డీఎఫ్ ఒకేషనల్ జూనియర్ కళాశాల పర్వతగిరి విద్యార్థినులు ఆన్ జాబ్ ట్రైనింగ్ కేంద్రాలను సందర్శించారు. ఈ సందర్భంగా విద్యార్థుల హాజరు, రోజు వారీగా నేర్చుకునే రికార్డులను పరిశీలించారు. అనంతరం ఆయన మాట్లాడుతూ ఇంటర్ బోర్డు నిబంధనల మేరకు ఒకేషనల్ విద్యార్థులు రెండు నెలల పాటు తప్పనిసరిగా వృత్యంతర శిక్షణ పొందాలన్నారు. వారి అనుభవాలు, రికార్డులను పరిశీలించి మార్కులు కేటాయిస్తున్నామన్నారు. జిల్లాలోని అన్ని ఒకేషనల్ కళాశాలలు తమ విద్యార్థులను వృత్తి విద్యలో రాణించేలా కృషి చేయాలన్నారు. డీఐఈఓ వెంట ప్రిన్సిపాల్ జనార్దన్, సిబ్బంది పాల్గొన్నారు.


