మహిళలు అన్ని రంగాల్లో రాణించాలి

మహిళలు అన్ని రంగాల్లో రాణించాలి

● పరకాల ఎమ్మెల్యే రేవూరి ప్రకాశ్‌రెడ్డి

సంగెం: మహిళలు అన్ని రంగాల్లో రాణించేందుకు కాంగ్రెస్‌ ప్రజా ప్రభుత్వం పనిచేస్తోందని పరకాల ఎమ్మెల్యే రేవూరి ప్రకాశ్‌రెడ్డి అన్నారు. మండల కేంద్రంలోని రైతువేదిక, గీసుకొండ మండలం కొనాయమాకుల రైతువేదికలో స్వయం సహాయక సంఘాల మహిళలకు ఇందిరా మహిళాశక్తి చీరలను కలెక్టర్‌ సత్యశారదతో కలిసి ఆదివారం ఆయన పంపిణీ చేశారు. ఈ సందర్భంగా ఎమ్మెల్యే మాట్లాడుతూ ముఖ్యమంత్రి రేవంత్‌రెడ్డి ఆడబిడ్డలందరికీ సారె అందించి ఆత్మగౌరవం మరింత పెంచారన్నారు. పరకాల డెయిరీ మహిళల ఉజ్వల భవిష్యత్‌కు పునాదిగా నిస్తుందన్నారు. డెయిరీలో సభ్యులందరు సొసైటీలో రూ.1000 చెల్లించి సభ్యులుగా చేరాలని, వారి ఖాతాల్లో ప్రభుత్వం రూ.15 వేలు వేస్తుందని తెలిపారు. మూలధనంగా ఉన్న ఆ డబ్బులను విడిపించుకోవడానికి వీలుండదని, రెండేళ్ల తర్వాత ఒక వేళ తీసుకుంటే వడ్డీతో సహా బోనస్‌గా వస్తుందన్నారు. రెండేళ్ల వరకు నా బాధ్యతని, ఆ తర్వాత మేం ఎవరం దొరకమని, డెయిరీ మాత్రం ఎల్ల కాలం ఉంటుందని ఆయన స్పష్టం చేశారు. మండలంలో 13,655 మంది ఎస్‌హెచ్‌జీ మహిళలకు, 1,680 మంది ఇతర మహిళలకు ఇంటింటికి వచ్చి చీరలు అందజేస్తారని తెలిపారు. గత బీఆర్‌ఎస్‌ ప్రభుత్వంలో కేసీఆర్‌ చెప్పిన అబద్ధాలను నమ్మి జూబ్లీహిల్స్‌ ప్రజలు కాంగ్రెస్‌కు ఓట్లు వేయలేదని, మూడోసారి చెప్పిన అబద్ధాలను ప్రజలు నమ్మకుండా కాంగ్రెస్‌ పార్టీని గెలిపించారన్నారు. జెడ్పీ సీఈఓ, డీఆర్‌డీఓ రాంరెడ్డి, అదనపు డీఆర్‌డీఓ రేణుకాదేవి, తహసీల్దార్‌ రాజ్‌కుమార్‌, మండల సమాఖ్య అధ్యక్షురాలు గాయపు ఉమాదేవి, రాధిక డీపీఎం వరలక్ష్మి, ఏపీఎం ఈశ్వర్‌, కాంగ్రెస్‌ మండల అధ్యక్షులు మాధవరెడ్డి, శ్రీనివాస్‌ నాయకులు, మహిళలు పాల్గొన్నారు.