మహిళా శక్తిని బలోపేతం చేస్తాం

మహిళా శక్తిని బలోపేతం చేస్తాం

● నర్సంపేట ఎమ్మెల్యే దొంతి మాధవరెడ్డి

నర్సంపేట: తెలంగాణలో మహిళా శక్తిని మరింత బలోపేతం చేసేందుకు కాంగ్రెస్‌ ప్రభుత్వం కృషి చేస్తోందని నర్సంపేట ఎమ్మెల్యే దొంతి మాధవ రెడ్డి అన్నారు. పట్టణంలోని ఎమ్మెల్యే క్యాంపు కార్యాలయంలో మహిళా సంఘం సభ్యులకు ఇందిరా మహిళా శక్తి చీరలతోపాటు లబ్ధిదారులకు కల్యాణలక్ష్మి చెక్కులను కలెక్టర్‌ డాక్టర్‌ సత్యశారదతో కలిసి ఆదివారం ఆయన పంపిణీ చేశారు. ఈ సందర్భంగా ఎమ్మెల్యే మాట్లాడుతూ ప్రభుత్వం అందిస్తున్న పథకాలు, రుణాలు, ఆర్థిక సాయాన్ని సద్వినియోగం చేసుకోవాలని, మహిళలు తమకు అనుభవం ఉన్న రంగాల్లో రాణించాలని కోరారు. కోటి మంది మహిళలను కోటీశ్వరులను చేయాలనే లక్ష్యంతో ప్రభుత్వం అనేక సంక్షేమ, అభివృద్ధి పథకాలను అమలు చేస్తూ మహిళా శక్తిని బలోపేతం చేస్తుందన్నారు. నియోజకవర్గంలో వివిధ మండలాలకు చెందిన 317 మంది లబ్ధిదారులకు మొత్తం రూ.3.17 కోట్ల విలువైన కల్యాణలక్ష్మి, షాదీముబారక్‌ చెక్కులను పంపిణీ చేసినట్లు తెలిపారు. జెడ్పీ సీఈఓ రాంరెడ్డి, ఏపీడీ రేణుకాదేవి, నర్సంపేట మార్కెట్‌ కమిటీ చైర్మన్‌ పాలాయి శ్రీనివాస్‌, పీఏసీఎస్‌ చైర్మన్‌ రమణారెడ్డి పాల్గొన్నారు.

మత్స్యకారులు ఆర్థికాభివృద్ధి చెందాలి

నర్సంపేట రూరల్‌: మత్స్యకారులు ఆర్థికాభివృద్ది చెందేందుకు ప్రభుత్వం ఉచిత చేప పిల్లల పంపిణీ కార్యక్రమాన్ని చేపట్టిందని నర్సంపేట ఎమ్మెల్యే దొంతి మాధవరెడ్డి, కలెక్టర్‌ సత్యశారద అన్నారు. నర్సంపేట మండలంలోని మాదన్నపేట చెరువులో ఆదివారం చేప పిల్లలను విడుదల చేసి వారు మాట్లాడారు. మాదన్నపేట చెరువు మత్స్య సహకార సంఘంలోని ప్రతి సభ్యుడు చేపల పెంపకంలో నైపుణ్యం పెంపొందించుకోవాలని, ప్రైవేట్‌ వ్యక్తులకు అప్పగించకుండా సభ్యులే నిర్వహించుకోవాలని కోరారు. రూ. 11.50 లక్షల విలువైన 6.81 లక్షల చేప పిల్లలను అందించినట్లు తెలిపారు. కార్యక్రమంలో డీఆర్‌డీఓ రాంరెడ్డి, మత్స్యశాఖ జిల్లా అధికారి శ్రీపతి, నర్సంపేట వ్యవసాయ మార్కెట్‌ కమిటీ చైర్మన్‌ పాలాయి శ్రీనివాస్‌, ప్రజాప్రతినిధులు తదితరులు పాల్గొన్నారు.