మహిళలను కోటీశ్వరులు చేయడమే లక్ష్యం

మహిళలను కోటీశ్వరులు చేయడమే లక్ష్యం

ఎల్కతుర్తి: కోటి మంది మహిళలను కోటీశ్వరులు చేయడమే ప్రభుత్వ లక్ష్యమని రవాణా, బీసీ సంక్షేమ శాఖ మంత్రి పొన్నం ప్రభాకర్‌గౌడ్‌ అన్నారు. ఎల్కతుర్తి మహిళా శక్తి భవనం ఆవరణలో, భీమదేవరపల్లి మండలం ముల్కనూరులోని రైతు వేదికలో ఇందిరా మహిళా శక్తి చీరల పంపిణీ కార్యక్రమంలో ఆయన మాట్లాడారు. సిరిసిల్లలో నాణ్యమైన చీరలు తయారు చేయించి రాష్ట్ర ప్రభుత్వం మహిళలకు పంపిణీ చేస్తోందని పేర్కొన్నారు. కాంగ్రెస్‌ ప్రభుత్వం మహిళలకు అనేక పథకాలు అమలు చేస్తోందని తెలిపారు. పెంట్రోల్‌ బంకులు, సోలార్‌ పవర్‌ ప్లాంట్లు, ఆర్టీసీ బస్సులకు యజమానులు అవుతున్నారని స్పష్టం చేశారు. బీఆర్‌ఎస్‌ ప్రభుత్వం వడ్డీలేని రుణాలు ఇవ్వలేదన్నారు. కాంగ్రెస్‌ ప్రభుత్వం వచ్చాక మహిళలు ఆర్థికంగా అభివృద్ధి చెందేందుకు వడ్డీలేని రుణాలు ఇస్తూ ప్రోత్సహిస్తోందని పేర్కొన్నారు. ఉన్నత చదువులు చదివిన వారు ఉంటేనే ఆ కుటుంబం అన్ని విధాలుగా అభివృద్ధి చెందుతుందన్నారు. తల్లిదండ్రులు తమ పిల్లలను ఉన్నత చదువులు చదివించాలని, వారి బంగారు భవిష్యత్‌కు బాటలు వేయాలని మంత్రి పొన్నం సూచించారు. భీమదేవరపల్లి, ఎల్కతుర్తి సెరికల్చర్‌ హబ్‌ మరింత అభివృద్ధి చెందేలా అన్ని చర్యలు చేపట్టనున్నట్లు స్పష్టం చేశారు. వరంగల్‌కు వెళ్లకుండా రైతులకు అందుబాటులో ఉండేవిధంగా ఎల్కతుర్తి, భీమదేవరపల్లి మధ్య కాటన్‌ మార్కెట్‌ ఏర్పాటు చేశామన్నారు. కలెక్టర్‌ స్నేహ శబరీష్‌ మాట్లాడుతూ మహిళల ఆర్థిక ప్రగతికి రాష్ట్ర ప్రభుత్వం వివిధ పథకాలు అమలు చేస్తోందని తెలిపారు. జిల్లాలో సెరికల్చర్‌ యూనిట్లను మహిళా సమాఖ్యల ద్వారా ప్రారంభిస్తున్నామని పేర్కొన్నారు. అనంతరం మహిళలకు బొట్టు పెట్టి చీరలు అందజేశారు. కార్యక్రమంలో మార్కెట్‌ కమిటీ చైర్మన్‌ సంతాజీ, డీఆర్డీఓ మేన శ్రీను, తహసీల్దార్లు రాజేశ్‌, ప్రసాద్‌రావు, ఎంపీడీఓలు విజయ్‌కుమార్‌, వీరేశం, ఏఓలు ఎల్‌.పద్మ, రాజ్‌కుమార్‌, అధికారులు, కాంగ్రెస్‌ నాయకులు, మహిళలు పాల్గొన్నారు.

రాష్ట్ర రవాణా, బీసీ సంక్షేమ శాఖ

మంత్రి పొన్నం ప్రభాకర్‌

ఎల్కతుర్తి, భీమదేవరపల్లి మండలాల్లో చీరల పంపిణీ