TV
నాయకుడిని కాదు సేవకుడిని
● చీరల పంపిణీలో వర్ధన్నపేట ఎమ్మెల్యే కేఆర్‌ నాగరాజు
వర్ధన్నపేట: ప్రజలకు నాయకుడిగా కాకుండా సేవకుడిగా తాను ఎల్లప్పుడు సేవలందిస్తానని వర్ధన్నపేట ఎమ్మెల్యే కేఆర్‌ నాగరాజు అన్నారు. వర్ధన్నపేట మున్సిపల్‌ కార్యాలయ సమావేశపు హాలులో ఇందిర మహిళా శక్తి చీరలను కలెక్టర్‌ సత్యశారదతో కలిసి శనివారం మహిళలకు పంపిణీ చేశారు. ఈ సందర్భంగా ఆయన మాట్లాడుతూ సీఎం రేవంత్‌రెడ్డి సమక్షంలో మంత్రులు సీతక్క, కొండా సురేఖ, ఐఏఎస్‌ అధికారి శైలజ కలిసి చీరలను ఎంపికచేశారని తెలిపారు. కోటి మంది మహిళలను కోటీశ్వరులను చేయడమే లక్ష్యంగా ముందుకు సాగుతున్నామని తెలిపారు. కలెక్టర్‌ సత్యశారద మాట్లాడుతూ జిల్లాలో 1.24 లక్షల మంది మహిళలకు చీరలు పంపిణీ చేస్తామని, ఇంకా 42 వేల మంది మహిళలకు చీరలు రావాల్సి ఉందని తెలిపారు. మెప్మా ద్వారా మున్సిపాలిటీల్లోని మహిళలకు అందించడానికి మరికొంత సమయం పడుతుందని పేర్కొన్నారు. టెస్కాబ్‌ చైర్మన్‌ మార్నేని రవీందర్‌రావు మాట్లాడుతూ పొదుపు సంఘాల మహిళలు తీసుకున్న రుణాలను సకాలంలో తీరుస్తూ అభివృద్ధి చెందుతున్నారని తెలిపారు. అదనపు కలెక్టర్‌ సంధ్యారాణి, జెడ్పీ సీఈఓ రాంరెడ్డి, తహసీల్దార్‌ విజయసాగర్‌, మున్సిపల్‌ కమిషనర్‌ సమ్మయ్య, మార్కెట్‌ కమిటీ చైర్మన్‌ నరుకుడు వెంకటయ్య, ఐనవోలు ఆలయ కమిటీ చైర్మన్‌ కమ్మగోని ప్రభాకర్‌గౌడ్‌ తదితరులు పాల్గొన్నారు.
కేటీఆర్‌ అరెస్టు కావడం ఖాయం
పర్వతగిరి: మహిళలను ఉన్నతులుగా తీర్చిదిద్దడమే కాంగ్రెస్‌ ప్రభుత్వ ధ్యేయమని వర్ధన్నపేట ఎమ్మెల్యే కేఆర్‌ నాగరాజు అన్నారు. ఎండీపీఓ కార్యాలయంలో శనివారం చీరలు పంపిణీ చేసి ఆయన మాట్లాడారు. మహిళలకు నాణ్యమైన చీరలను ప్రభుత్వం పంపిణీ చేస్తోందని తెలిపారు. ఫార్ములా ఈ రేసు కేసులో కేటీఆర్‌ అరెస్టు కావడం ఖాయమని అన్నారు. అనంతరం ఎస్టీ గురుకులాన్ని తనిఖీ చేశారు. కలెక్టర్‌ సత్యశారద, అదనపు కలెక్టర్‌ సంధ్యారాణి, డీఆర్‌డీఓ రాంరెడ్డి, తహసీల్దార్‌ వెంకటస్వామి, ఎంపీడీఓ శంకర్‌, ఏపీఎం రాజీరు, కాంగ్రెస్‌ జిల్లా ఉపాధ్యక్షుడు పిన్నింటి అనిల్‌రావు, మండల అధ్యక్షుడు జాటోత్‌ శ్రీనివాస్‌నాయక్‌, మామునూరు ఏసీపీ వెంకటేశ్‌, పర్వతగిరి సీఐ రాజగోపాల్‌, ఎస్సై బోగం ప్రవీణ్‌ పాల్గొన్నారు.
