ఎంజీఎం వైద్యసేవల్లో నిర్లక్ష్యం

ఎంజీఎం వైద్యసేవల్లో నిర్లక్ష్యం

సాక్షి, వరంగల్‌: ఎంజీఎం ఆస్పత్రిలో అత్యవసర వైద్య సేవలపై నిర్లక్ష్యం ఉందని మహబూబాబాద్‌ ఎంపీ పోరిక బలరాంనాయక్‌ అన్నారు. కలెక్టరేట్‌ సమావేశ మందిరంలో ఎంపీ అధ్యక్షతన జిల్లా అభివృద్ధి సమన్వయ పర్యవేక్షణ కమిటీ (దిశ) సమావేశం శుక్రవారం జరిగింది. ఈ సందర్భంగా ఎంపీ పోరిక బలరాంనాయక్‌ మాట్లాడుతూ రాత్రి వేళ అత్యవసర కేసులు వస్తే ఎంజీఎం ఆస్పత్రి వైద్యసేవల్లో అలసత్వం ఉందని పేర్కొన్నారు. తమ ప్రాంతం నుంచి వచ్చిన వారికి వైద్యం కోసం గత ఎంజీఎం ఉన్నతాధికారిని ఫోన్‌లో సంప్రదిస్తే స్విచ్ఛాఫ్‌ అని కొన్నిసార్లు, మరికొన్నిసార్లు స్పందించలేదని గుర్తు చేశారు. అందుకే అత్యవసర కేసుల కోసం ప్రత్యేక కౌంటర్‌ను ప్రారంభించి, షిఫ్ట్‌ పద్ధతిలో వైద్యులు, సిబ్బంది అందుబాటులో ఉండేలా చూడాలని సూపరింటెండెంట్‌ హరీశ్‌చంద్రారెడ్డిని కోరారు. ఆస్పత్రి పరిశుభ్రంగా ఉంచేందుకు, వైద్య పరికరాల కోసం ముఖ్యమంత్రి రేవంత్‌రెడ్డితో మాట్లాడుతామని ఆయన పేర్కొన్నారు. కార్పొరేట్‌ సోషల్‌ రెస్పాన్స్‌బిలిటీ (సీఎస్‌ఆర్‌) కింద నిధులు ఇప్పించే ప్రయత్నం చేస్తామని, మీరు కూడా దాతలను సంప్రదించి ఎంజీఎం ఆస్పత్రి అభివృద్ధిలో భాగస్వాములు కావాలని సూచించారు. అలాగే, రామప్ప నుంచి లక్నవరం, పాకాల, గూడూరు, మహబూబాబాద్‌, గంగారం, బయ్యారం మీదుగా దేవాదుల ప్రాజెక్టుకు సంబంధించిన డీపీఆర్‌ విషయంలో అధికారులు సరైన సమాధానమివ్వకపోవడంతో అసహనం వ్యక్తం చేశారు. త్వరలో సీఎంతో సమావేశం ఉందని, ఈ ప్రాజెక్టుకు సంబంధించిన పూర్తి వివరాలు అందిస్తే మాట్లాడి క్లియర్‌ చేస్తానని చెప్పారు. గతంలో ఎకరాకు రూ.రెండు లక్షలు నష్టపరిహారం నిర్వాసితులు తీసుకోకపోవడంతో ఈ ప్రాజెక్టు పనులు కావడం లేదని అధికారులు వివరించారు. 275వ ఆర్టికల్‌ కింద గిరిజన అభివృద్ధికి కేంద్రం నిధులు అందుబాటులో ఉన్నాయని, అంగన్‌వాడీ కేంద్రాల అభివృద్ధికి కూడా నిధులున్నాయని, ఇందుకు ప్రతిపాదనలు పంపిస్తే కేంద్రం నుంచి నిధులు వచ్చేలా చూస్తానన్నారు. వేడి నీటి కోసం గీజర్లు లేని హాస్టళ్ల జాబితాను పంపిస్తే ఏర్పాటు చేయిస్తానని ఆయన హామీనిచ్చారు. నిరుద్యోగ యువతకు ఉపాధి కల్పించేందుకు ప్రభుత్వం వద్ద ఖాళీగా ఉన్న భూములను కూరగాయల సాగుకు లీజు ఇవ్వాలని సూచించారు.

అక్షయపాత్ర సేవలు విస్తరించాలి...

వర్ధన్నపేట ఎమ్మెల్యే కేఆర్‌ నాగరాజు మాట్లాడుతూ వరంగల్‌, ఖిలావరంగల్‌ మండలాల్లోని 119 ప్రభుత్వ పాఠశాలల్లో భోజనం అందిస్తున్న అక్షయపాత్ర.. నియోజకవర్గపరిధిలోని 14, 43 డివిజన్లు, పర్వతగిరి, వర్ధన్నపేట మండలాల ప్రభుత్వ పాఠశాలల్లో అక్షయపాత్ర భోజనం అందించేందుకు కలెక్టర్‌ చర్యలు తీసుకోవాలని కోరారు. పిల్లలు చదువుతోపాటు క్రీడల్లో పట్టు ఉండాలని, ఇందుకోసం జిల్లాలో క్రీడా ప్రత్యేక అధికారిని నియమించి మండలాల వారీగా పర్యవేక్షణ ఉండేలా చూడాలని చెప్పారు. కిశోర రక్షా హెల్త్‌కార్డులు అన్ని పాఠశాలల్లో విద్యార్థులకు జారీ చేసేలా చూడాలన్నారు. ఎమ్మెల్సీ బస్వరాజు సారయ్య మాట్లాడుతూ మహిళలు, రైతులు, ఆరోగ్యం, విద్య రంగం అభివృద్ధిపై ప్రభుత్వం ప్రత్యేక దృష్టి పెట్టిందని, ఈ మేరకు అధికారులు పనిచేయాలన్నారు. దక్షిణ భారతదేశంలో జల సంరక్షణ కేటగిరీ– 2లో జిల్లా తొలి స్థానంలో నిలిచింది. కేంద్ర మంత్రి సీఆర్‌పాటిల్‌ చేతుల మీదుగా అవార్డు అందుకున్న కలెక్టర్‌ డాక్టర్‌ సత్యశారదను సమావేశంలో అభినందించారు. తూర్పు ఎమ్మెల్యే, మంత్రి కొండా సురేఖ, నర్సంపేట ఎమ్మెల్యే దొంతి మాధవరెడ్డి, పరకాల ఎమ్మెల్యే రేవూరి ప్రకాశ్‌రెడ్డి సమావేశానికి హాజరుకాలేదు.

రాత్రి వేళ ఎమర్జెన్సీ కేసుల్లో అలసత్వం

ఆస్పత్రిలో ప్రత్యేక కౌంటర్‌

ఏర్పాటు చేయాలి

స్పెషలిస్టు డాక్టర్లను అందుబాటులో ఉంచాలి

దిశ సమావేశంలో మహబూబాబాద్‌ ఎంపీ బలరాంనాయక్‌