‘సాయికృప’కు జాతీయ పురస్కారం

‘సాయికృప’కు జాతీయ పురస్కారం

కమలాపూర్‌: మండల కేంద్రంలోని సాయికృప మండల సమాఖ్య జాతీయ స్థాయి ఉత్తమ పురస్కారం అందుకుంది. జాతీయ స్థాయి ప్రముఖ స్వచ్ఛంద సంస్థ ఏపీ మాస్‌ ఆధ్వర్యంలో హైదరాబాద్‌ జూబ్లీహిల్స్‌లోని డాక్టర్‌ మర్రి చెన్నారెడ్డి మానవ వనరుల అభివృద్ధి సంస్థ ప్రాంగణంలో శుక్రవారం సాయంత్రం జరిగిన అవార్డుల ప్రదానోత్సవంలో తెలంగాణ రాష్ట్ర ప్రణాళిక సంఘం వైస్‌ చైర్మన్‌ చిన్నారెడ్డి, ఎస్బీఐ చీఫ్‌ జనరల్‌ మేనేజర్‌ నారాయణ్‌ గోయల్‌, రిటైర్డ్‌ ఐఏఎస్‌ అధికారి కాకి మాధవరావు తదితరుల చేతుల మీదుగా జాతీయ స్థాయి ఉత్తమ అవార్డు కింద రూ.లక్ష, జ్ఞాపిక అందజేశారు. బ్యాంకు లింకేజీ రుణాల టార్గెట్‌ రీచ్‌ అయినందుకు, అదేవిధంగా మండలంలోని 41 ప్రభుత్వ పాఠశాలల్లో చదువుతున్న 2,428 మంది విద్యార్థులకు ఒక్కొక్కరికి రెండు జతల చొప్పున స్కూల్‌ యూనిఫామ్స్‌ కుట్టించి ఇచ్చినందుకు, 2024–25లో ఎనిమిది వరి ధాన్యం కొనుగోలు కేంద్రాల ద్వారా 1,750 మంది రైతుల నుంచి ధాన్యం కొన్నందుకు, పలు స్వయం సహాయక సంఘాల మహిళలకు చిన్న తరహా పరిశ్రమల ద్వారా ఉపాధి కల్పించినందుకు సాయికృప మండల సమాఖ్యను జాతీయ స్థాయి ఉత్తమ పురస్కారానికి ఎంపిక చేశారు. కార్యక్రమంలో సెర్ప్‌ డీపీఎం దయాకర్‌, సాయికృప మండల సమాఖ్య అధ్యక్షురాలు మంద సుజాత, కార్యదర్శి స్రవంతి, కోశాధికారి సృజన, పలువురు అధికారులు తదితరులు పాల్గొన్నారు.