TV
పత్తి కొనుగోళ్లను వేగవంతం చేయాలి
● కలెక్టర్‌ స్నేహ శబరీష్‌
ఎల్కతుర్తి: పత్తి కొనుగోళ్లు మరింత వేగవంతం చేయాలని హనుమకొండ కలెక్టర్‌ స్నేహ శబరీష్‌ మార్కెటింగ్‌, సీసీఐ అధికారులు, మిల్లుల యాజమాన్యాన్ని ఆదేశించారు. శుక్రవారం ఎల్క తుర్తి మండలం ఇందిరానగర్‌ శివారులోని భవానీ కాటన్‌ ఇండస్ట్రీస్‌లో పత్తి కొనుగోళ్ల ప్రక్రియను కలెక్టర్‌ కొబ్బరికాయ కొట్టి ప్రారంభించారు. ఇక్కడున్న వే బ్రిడ్జి కాంటా వద్ద కలెక్టర్‌, జిల్లా మార్కెటింగ్‌ అధికారి సురేఖ, మార్కెట్‌ కమిటీ చైర్మన్‌ సంతాజీతో కలిసి ఆమె ప్రారంభించారు. ఇప్పటి వరకు ఎంత పత్తి వచ్చింది? ఇంకా ఎన్ని క్వింటాళ్లు వస్తుంది? పత్తిలో సగటున తేమ శాతం ఎంత? అనే వివరాలను అధికారులు అడిగి తెలుసుకున్నారు. జిన్నింగ్‌ మిల్లుకు పత్తిని విక్రయించేందుకు తీసుకొచ్చిన రైతు శ్రీనివాస్‌తో మాట్లాడి ఎన్ని ఎకరాల్లో పత్తి పంటను సాగు చేశారని, సాగుకు ఎంత ఖర్చు అయ్యింది? ఎంత దిగుబడి వచ్చింది? తదితర వివరాలు అడిగి తెలుసుకున్నారు. కార్యక్రమంలో ఆమె వెంట తహసీల్దార్‌ ప్రసాద్‌రావు, అశోక్‌, ఏఓ రాజ్‌కుమార్‌, సీసీఐ అధికారి పంకజ్‌, అధికారులు పాల్గొన్నారు.
