ఇంటింటికీ ఇందిరమ్మ చీరలు

Nov 21 2025 6:52 AM | Updated on Nov 21 2025 6:52 AM

హన్మకొండ అర్బన్‌: జిల్లాలోని మహిళా సంఘాల సభ్యులకు చీరల పంపిణీ కార్యక్రమం డిసెంబర్‌ 9లోగా పూర్తి చేసేందుకు జిల్లా యంత్రాంగం అన్ని ఏర్పాట్లు చేస్తోంది. ఈవిషయంలో ముఖ్యమంత్రి స్వయంగా వీడియో కాన్ఫరెన్స్‌ నిర్వహించడంతో పాటు కలెక్టర్‌ స్నేహ శబరీష్‌ అధికారులతో సమీక్షించి పంపిణీకి సంబంధించి దిశానిర్దేశం చేశారు. ఎక్కడా ఇబ్బందులు రాకుండా పంపిణీ పూర్తి చేయాలని ఆదేశించారు. ప్రస్తుతం మహిళా సంఘాలకు సెర్ప్‌, మెప్మా ద్వారా యూనిఫామ్‌ పేరుతో ప్రభుత్వం చీరలు అందజేయనుంది. ఇప్పటికే జిల్లా కేంద్రానికి చేరుకున్న చీరలు అధికారులు గ్రామస్థాయిలో పంపిణీకి ఏర్పాట్లు ప్రారంభించారు. గ్రామాల్లో పంపిణీ ప్రారంభించి డిసెంబర్‌ 9 నాటికి పూర్తి చేయాలని లక్ష్యంగా పెట్టుకున్నారు. గత ప్రభుత్వం పంపిణీ చేసిన దసరా చీరల ధర సుమారు రూ.260 వరకు ఉండేది. నాణ్యత లోపించిందని విమర్శలు వచ్చాయి. కానీ, ప్రస్తుతం పోచంపల్లి కోట చీరలు ఒక్కోటి రూ.800 ధరకు ప్రభుత్వం కొనుగోలు చేస్తోంది. సంవత్సరానికి రెండు చీరలు మహిళా సంఘాల సభ్యులకు యూనిఫామ్‌ పేరుతో అందజేస్తున్నారు.

జిల్లాకు 2.90 లక్షల చీరలు

జిల్లాలో అర్బన్‌, రూరల్‌ ప్రాంతాల్లో కలిపి సుమారు 3 లక్షల మంది వరకు మహిళా సంఘాల్లో సభ్యులుగా ఉన్నట్లు డీఆర్డీఏ, మెప్మా అధికారులు లెక్కలు అందజేశారు. మెప్మా పరిధిలో 1,71,604 మంది సభ్యులు ఉండగా, మిగతావారు డీఆర్డీఏ పరిధిలో ఉన్నారు. ఆ లెక్కల ఆధారంగా ప్రభుత్వం జిల్లాకు చీరల కోటా అందజేశారు

9, 6 మీటర్ల చీరలు

తూతూ మంత్రంగా చీరల పంపిణీ కాకుండా నాణ్యతతో కూడుకున్న చీరలు మహిళలు వారి వయసు అర్బన్‌, రూరల్‌ ప్రాంతాల వారు సంప్రదాయాల ప్రకారం ధరించే చీరలనే ప్రభుత్వం ప్రత్యేక శ్రద్ధతో తయారు చేయించింది. అందులో భాగంగా.. జిల్లాలోని గ్రామీణ ప్రాంతాల్లో సుమారు 1,800కు పైగా మహిళల కోసం 9 మీటర్ల చీరలను సిద్ధం చేయించారు. అదేవిధంగా అర్బన్‌ ప్రాంతాల్లో మహిళల కోసం 6.3 మీటర్ల చీరలు పంపిణీకి సిద్ధం చేశారు. చీరల నాణ్యత విషయంలో కూడా రాజీ లేకుండా ఏర్పాటు చేశారు.

పంపిణీకి ప్రత్యేక అధికారులు

చీరల పంపిణీ గతంలో మాదిరిగా రేషన్‌ డీలర్లకు అప్పగించకుండా ఈసారి గ్రామస్థాయిలో ప్రతీ గ్రామానికి ప్రత్యేక అధికారిని నియమించాలని ముఖ్యమంత్రి ఆదేశాల ప్రకారం కలెక్టర్‌ సూచనలతో అధికారులు ఏర్పాట్లు చేశారు. ప్రస్తుతం గ్రామ పంచాయతీలకు ప్రత్యేక అధికారులుగా ఉన్నవారికే చీరల పంపిణీ బాధ్యతలు అప్పగించారు. మహిళా సంఘాలతో సమన్వయం చేసుకుంటూ ఎలాంటి ఇబ్బందులు రాకుండా పంపిణీ చేసే బాధ్యత వీరిపై మోపారు. అదేవిధంగా గ్రామస్థాయి కమిటీలను మహిళా సంఘాలతో ఏర్పాటు చేశారు.

సంవత్సరంలో రెండుసార్లు

గతంలో ఇచ్చినట్లు దసరా చీరలు పండగ కానుక మాదిరిగా కాకుండా యూనిఫామ్‌ పేరుతో ప్రస్తుతం ఇస్తున్న ఈ చీరలు సంవత్సరానికి రెండు సార్లు ఇవ్వాలని నిర్ణయించిన ప్రభుత్వం ప్రస్తుతం డిసెంబర్‌ 9 నాటికి మొదటి విడత పూర్తి చేసి తర్వాత ఏప్రిల్‌ ఆ తర్వాత మాసాల్లో రెండో విడత కోసం ఏర్పాటు చేస్తున్నట్లు సమాచారం.

ఏర్పాట్లు చేశాం..

జిల్లాలో డిసెంబర్‌ 9 నాటికి మహిళా సంఘాలకు చీరలు పంపిణీ చేయాలని కలెక్టర్‌ స్పష్టంగా ఆదేశించారు. అందుకు తగినట్లుగా జిల్లా కేంద్రానికి చేరిన చీరలను గ్రామాలకు తరలించి పంపిణీ ప్రారంభిస్తున్నాం. ఎలాంటి అవాంతరాలు లేకుండా పంపిణీ పూర్తి చేసేందుకు యంత్రాంగం సిద్ధంగా ఉంది. ప్రత్యేక అధికారులే చీరల పంపిణీకి గ్రామస్థాయిలో బాధ్యులుగా ఉంటారు. మహిళా సంఘాల సమన్వయంతో పంపిణీ పూర్తి చేస్తారు. – మేన శ్రీను, డీఆర్డీఓ పీడీ

డిసెంబర్‌ 9లోగా

చీరల పంపిణీ

ఇప్పటికే జిల్లా కేంద్రానికి రాక

ఇందిరాగాంధీ జయంతి

సందర్భంగా పంపిణీ

అవసరాలకు అనుగుణంగా

9, 6 మీటర్ల..

మహిళా సంఘాలు, పంచాయతీ

కార్యదర్శులకు పంపిణీ బాధ్యతలు