అందని భోజన బిల్లులు

అందని భోజన బిల్లులు

దుగ్గొండి: ప్రభుత్వ పాఠశాలల్లో చదువుతున్న విద్యార్థులకు పౌష్టికాహారం అందించేందుకు కేంద్ర, రాష్ట్ర ప్రభుత్వాలు సంయుక్తంగా మధ్యాహ్న భోజన పథకాన్ని అమలు చేస్తున్నాయి. సకాలంలో బిల్లులు అందకపోవడంతో భోజనం వండే ఏజెన్సీ మహిళలు అప్పుల పాలవుతున్నారు. జిల్లా వ్యాప్తంగా 529 ప్రభుత్వ పాఠశాలలు ఉన్నాయి. వీటిలో ఒకటి నుంచి 10 తరగతులకు చెందిన 29,135 మంది విద్యార్థులు చదువుతున్నారు. 529 ఏజెన్సీల ద్వారా ప్రభుత్వం వీరికి మధ్యాహ్నం భోజనం అందిస్తోంది. ఇందుకోసం ప్రభుత్వమే నేరుగా బియ్యం సరఫరా చేస్తున్నాయి. వంట సామగ్రి ఏజెన్సీలే సమకూర్చుకుంటున్నాయి. ఒకటి నుంచి ఐదో తరగతి చదువుతున్న ఒక్కో విద్యార్థికి 6.78, రూపాయలు, 6, 7, 8 తరగతి చదువుతున్న ఒక్కో విద్యార్థికి 10.17 రూపాయలు, 9, 10 తరగతి చదువుతున్న ఒక్కో విద్యార్థికి రూ.10.65 చొప్పున ప్రభుత్వం చెల్లిస్తోంది. దీంతో పాటు గడ్డు ఇచ్చినందుకు అదనంగా రూ.3 కలిపి అందిస్తోంది. అదేవిధంగా పీఎం పోషణ్‌ పథకంలో భాగంగా ఒక్కో ఏజెన్సీకి కేంద్ర ప్రభుత్వం నెలకు రూ.వెయ్యి, మరో రూ.రెండు వేలను రాష్ట్ర ప్రభుత్వం గౌరవ వేతనం కింద జమచేస్తోంది.

ధరలు పెంచిన ప్రభుత్వం..

ఏజెన్సీలు నాణ్యమైన భోజనం అందించడానికి ప్రభుత్వం ధరలు పెంచింది. అయితే బిల్లులు పెండింగ్‌లో ఉండడంతో వారు ఆందోళన చెందుతున్నారు. ఒకటి నుంచి 8 తరగతుల విద్యార్థులకు వండిపెట్టిన బిల్లులు గత జూలై వరకు మాత్రమే వచ్చాయి. 9, 10 తరగతుల విద్యార్థులకు సంబంధించి మే నెల వరకు మాత్రమే చెల్లించారు. గుడ్డు బిల్లు ఫిబ్రవరి నుంచి ఒక్కరూపాయి చెల్లించలేదు. రాష్ట్ర ప్రభుత్వం అందించే రూ.రెండు వేల గౌరవ వేతనం 2024 నవంబర్‌ నుంచి రావడం లేదు. దీంతో బిల్లులు, వేతనాలు అందక అప్పులు తెచ్చి వండిపెట్టాల్సి వస్తోందని భోజన ఏజెన్సీల నిర్వాహకులు ఆవేదన వ్యక్తం చేస్తున్నారు. ఇప్పుటికై నా కేంద్ర, రాష్ట్ర ప్రభుత్వాలు సకాలంలో బిల్లులు చెల్లించాలని వారు కోరుతున్నారు..

సంవత్సరం నుంచి గౌరవ వేతనం పెండింగ్‌

త్వరగా చెల్లించాలని కోరుతున్న ఏజెన్సీలు

జిల్లాలో 529 ప్రభుత్వ పాఠశాలలు..

29,135 మంది విద్యార్థులు

1/1

అందని భోజన బిల్లులు