యూరియా కోసం రైతుల బారులు

యూరియా కోసం రైతుల బారులు

● రైతువేదికల వద్ద పడిగాపులు

ఖానాపురం: యూరియా బస్తాల కోసం రైతులు ఎదురుచూస్తున్నారు. ఖరీఫ్‌లో వరి సాగుచేసిన రైతులు రాత్రి, పగలు తేడా లేకుండా పీఏసీఎస్‌లు, రైతు వేదికల వద్ద బారులు తీరి యూరియా బస్తాలను తీసుకెళ్లారు. ప్రస్తుతం మొక్కజొన్న పంట సాగు చేసిన రైతులు కూడా అదే పరిస్థితిని ఎదుర్కొంటున్నారు. మండల కేంద్రం, బుధరావుపేట, ధర్మరావుపేట, మంగళవారిపేట, అశోక్‌నగర్‌ గ్రామాలకు యూరియా బస్తాలు వచ్చాయి. ఖానాపురం, బుధరావుపేట, మంగళవారిపేట గ్రామాల్లో బుధవారం 444 బస్తాలను రైతులకు పంపిణీ చేశారు. యూరియా వస్తుందని తెలియడంతో రైతువేదికల వద్ద రైతులు పంట ఆరోగ్యకార్డులతో బారులు తీరారు. పలువురికి లభించకపోవడంతో వెనుదిరిగారు.

నేడు రెండు గ్రామాల్లో పంపిణీ..

మండలంలోని అశోక్‌నగర్‌, ధర్మరావుపేట గ్రామాలకు సైతం యూరియా బస్తాలు వచ్చాయి. అశోక్‌నగర్‌కు 222, ధర్మరావుపేటకు 222 బస్తాల నిల్వలు వచ్చాయి. దీంతో ఆయా గ్రామాల్లో రైతులకు గురువారం పంపిణీ చేయనున్నట్లు వ్యవసాయ అధికారి భోగ శ్రీనివాస్‌ తెలిపారు. కాగా, మొక్కజొన్న పంటల సాగు చేసిన రైతులకు యూరియా బస్తాలు లభించకపోవడంతో ఆందోళన చెందుతున్నారు. యూరియా నిల్వలు వస్తున్నాయని తెలియడంతో రైతువేదికల వద్దకు పరుగులు పెడుతున్న పరిస్థితి నెలకొంది. ఇప్పటికూనా అధికారులు, పాలకులు స్పందించి సరిపడా యూరియా అందించాలని రైతులు కోరుతున్నారు.