TV
వర్ధన్నపేట ఆస్పత్రిలో రోగి మృతి
వర్ధన్నపేట: వర్ధన్నపేట ఏరియా ఆస్పత్రిలో ఓ రోగి మృతి చెందాడు. డాక్టర్ల నిర్లక్ష్యంతోనే మృతి చెందాడని ఆరోపిస్తూ కుటుంబ సభ్యులు, బంధువులు ఆందోళన చేశారు. కుటుంబ సభ్యుల కథనం ప్రకారం.. హనుమకొండ జిల్లా ఐనవోలు మండలంలోని గర్నెపెల్లి గ్రామానికి చెందిన మల్లయ్య (65) తీవ్ర అనారోగ్యానికి గురికావడంతో కుటుంబ సభ్యులు బుధవారం రాత్రి ఏరియా ఆస్పత్రికి తీసుకొచ్చారు. ఆస్పత్రిలో ఈసీజీ పరికరం లేకపోవడం, డ్యూటీ డాక్టర్‌ ఆలస్యంగా రావడంతో బంధువులు, కుటుంబ సభ్యులు తీవ్ర ఆగ్రహం వ్యక్తం చేశారు. డాక్టర్‌ ఈసీజీ యంత్రాన్ని ప్రైవేట్‌ ఆస్పత్రి నుంచి తెప్పించగా అప్పటికే మల్లయ్య మృతి చెందాడు. ఈసీజీ లేకపోవడంతో మల్లయ్య ప్రాణం పోయిందని కుటుంబ సభ్యులు ఆందోళనకు దిగారు. సమాచారం అందుకున్న పోలీసులు ఆస్పత్రికి చేరుకున్నారు. పరిస్థితిని చక్కదిద్ది కేసు నమోదు చేసినట్లు పోలీసులు తెలిపారు. ఆస్పత్రికి తీసుకొచ్చే సమయానికి మల్లయ్య ఆరోగ్య పరిస్థితి విషమించిందని డాక్టర్లు తెలిపారు.
డాక్టర్ల నిర్లక్ష్యమే కారణమని కుటుంబ సభ్యుల ఆందోళన
ఈసీజీ పరికరం అందుబాటులో లేకపోవడంతో ఆగ్రహం
