పత్తి సేకరణ!

హైదరాబాద్‌లో సఫలమైన చర్చలు.. పత్తి కొనుగోళ్లపై వీడిన సందిగ్ధం

బంద్‌

విరమణ..

సాక్షిప్రతినిధి, వరంగల్‌: పత్తి కొనుగోళ్లపై 48 గంటల ప్రతిష్టంభనకు తెరపడింది. కాటన్‌, జిన్నింగ్‌ మిల్లుల అసోసియేషన్‌, మార్కెటింగ్‌, సీసీఐ, వ్యవసాయశాఖల మంత్రులు, అధికారుల చర్చలు సఫలమయ్యాయి. ప్రభుత్వం, సీసీఐల నుంచి స్పష్టమైన హామీ రావడంతో బుధవారం నుంచి పత్తి కొనుగోలు చేయనున్నట్లు మంగళవారం కాటన్‌, జిన్నింగ్‌ మిల్లుల అసోసియేషన్‌ రాష్ట్ర నాయకత్వం ప్రకటన విడుదల చేసింది. ఈమేరకు వరంగల్‌ ఏనుమాముల మార్కెట్‌ అధికారులు సైతం రైతులు పత్తి విక్రయాల కోసం రావొచ్చని ప్రకటించారు. ఎకరానికి ఏడు క్వింటాళ్లు, ఎల్‌–1, ఎల్‌–2, ఎల్‌–3 నిబంధనల్ని సడలించాలన్న డిమాండ్‌తో రెండు రోజుల పాటు కొనుగోళ్లు నిలిచిపోగా.. మంగళవారం హైదరాబాద్‌లో జరిగిన చర్చలు సఫలం కావడంతో బుధవారం నుంచి కొనుగోళ్లు యథావిధిగా సాగనున్నాయి.

60 కేంద్రాలకు 39 ప్రారంభం

ఈ సీజన్‌లో పత్తి కొనుగోలు చేసేందుకు సీసీఐ, మార్కెటింగ్‌, వ్యవసాయశాఖలు 60 జిన్నింగ్‌ మిల్లులను నోటిఫై చేశారు. అందులో ఈ నెల 15 నాటికి 39 ఓపెన్‌ కాగా, 1,74,289.78 క్వింటాళ్ల పత్తిని సీసీఐ, ప్రైవేట్‌ వ్యాపారులు కొనుగోలు చేసినట్లు అధికారుల రికార్డులు చెబుతున్నాయి. ఇందులో ఒక్క ఏనుమాముల మార్కెట్‌లో 1,60,644 క్వింటాళ్లు కొనుగోలు చేశారు. ఇందులో సీసీఐ 39,182 క్వింటాళ్లు మాత్రమే కొనుగోలు చేసింది. మిగిలిన పత్తి 1,21,462 క్వింటాళ్లను ప్రైవేట్‌ వ్యాపారులు కొన్నారు. అదే విధంగా ఉమ్మడి వరంగల్‌ వ్యాప్తంగా 39 కాటన్‌, జిన్నింగ్‌ మిల్లుల ద్వారా 9,053 మంది రైతుల నుంచి 13,645.78 క్వింటాళ్లు కొనుగోలు చేసినట్లు మార్కెటింగ్‌ శాఖ అధికారులు తెలిపారు. ఈ నెల 15 నుంచి కొనుగోళ్లు నిలిచిపోగా.. బుధవారం నుంచి మళ్లీ జరగనున్నాయి. మిగిలిన 21 జిన్నింగ్‌, కాటన్‌ మిల్లుల్లో సైతం కొనుగోళ్లు ప్రారంభించనున్నట్లు అధికారులు ప్రకటించారు.

కనీస మద్దతు ధరపైనే రైతుల ఆశలు

ఉమ్మడి వరంగల్‌ వ్యాప్తంగా రైతులను మోంథా తుపాను నిండా ముంచింది. 24 గంటల వర్షం ఆరుగాలం కష్టాన్ని ఊడ్చుకెళ్లింది. అకాలవర్షం, వరదలతో చాలాచోట్ల పత్తి జాలుబట్టిపోగా, మరికొన్ని చోట్ల తెగులు సోకి దిగుబడి సగానికి తగ్గిపోయింది. ఎకరానికి 10–15 క్వింటాళ్ల వరకు వస్తుందని ఆశిస్తే.. 6–7 క్వింటాళ్లు కూడా రాలేదని రైతులు వాపోతున్నారు. ఆ కాస్త పత్తిని మార్కెట్‌కు తరలించి అమ్ముకుందామంటే 8–12 శాతం తేమ నిబంధనలు ప్రతిబంధకంగా మారాయంటున్నారు. కనీస మద్దతు ధర క్వింటాకు రూ.8,110లకు బదులు తేమ పేరుతో శనివారం కనిష్టంగా రూ.3,969, గరిష్టంగా రూ.7,195లే ఇచ్చారని రైతులు చెబుతున్నారు. అది కూడా అన్ని లాట్లకు ఇవ్వలేదని, జెండా పాట కొందరి కొన్ని లాట్లకు గరిష్ట ధర ఇచ్చినట్లు చెబుతున్నారు. ఇలాగైతే పెట్టుబడులు రాక, అప్పుల పాలు కావాల్సిందేనని రైతులు ఆవేదన వ్యక్తం చేస్తున్నారు.

ఉమ్మడి వరంగల్‌లో 60 కేంద్రాల ప్రతిపాదన

39 చోట్ల కొనుగోళ్లు షురూ

9,053 రైతుల నుంచి 13,645.78 క్వింటాళ్ల కొనుగోలు

ఏనుమాముల మార్కెట్‌లో 1,60,644 క్వింటాళ్లు

మరో 21 కేంద్రాలపై కసరత్తు

నేటి నుంచి మళ్లీ కొనుగోళ్లు