క్షేత్ర సందర్శనలో నూతన ఎంపీఓలు

ఎల్కతుర్తి: గ్రామాలకు అనుబంధంగా పని చేస్తున్న అధికారులు తప్పనిసరిగా ఫీల్డ్‌ విజిట్‌ చేయాలని హనుమకొండ జిల్లా పంచాయతీ అధికారి లక్ష్మీరమాకాంత్‌ సూచించారు. మంగళవారం భీమదేవరపల్లి మండలం ముల్కనూరులో కొత్తగా నియమితులైన ఎంపీఓల గ్రామ సందర్శనను ఆయన పరిశీలించారు. అనంతరం మాట్లాడుతూ.. అధికారులు గ్రామస్థాయిలో నెలకొనే సమస్యల పరిష్కారంలో మందుండాలని, ప్రజలతో సమష్టిగా పని చేయాలని సూచించారు. ప్రతీ అధికారి గ్రామాల్లో పర్యటించి పంచాయతీ పనితీరు అభివృద్ధి కార్యక్రమాల పురోగతిని స్వయంగా పరిశీలించాలన్నారు. అనంతరం ఎంపీఓలు గ్రామంలోని పన్ను వసూళ్లు, తాగునీటి సంరక్షణ, పంచాయతీ కార్మికుల విధుల నిర్వహణ, సెగ్రిగేషన్‌ షెడ్లు, డ్రెయినేజీ వ్యవస్థ, అంగన్‌వాడీ సెంటర్ల స్థితిగతులను పరిశీలించారు. కార్యక్రమంలో పరకాల డీఎల్పీఓ రవిబాబు, ఎంపీఓ నాగరాజు, పంచాయతీ కార్యదర్శి పూర్ణచందర్‌, నూతన ఎంపీఓలు మార్గవి, యోగితతో పాటు పంచాయతీ సిబ్బంది పాల్గొన్నారు.

కేయూ క్యాంపస్‌: కాకతీయ యూనివర్సిటీ పరిధి ఉమ్మడి వరంగల్‌, ఖమ్మం, ఆదిలాబాద్‌ జిల్లాల్లో డిగ్రీ కోర్సుల బీఏ, బీకాం, బీబీఎం, బీఎస్సీ తదితర కోర్సుల మొదటి, ఐదో సెమిస్టర్‌ పరీక్షలు మంగళవారం ప్రారంభమయ్యాయి. తొలిరోజు హనుమకొండలోని రెండు పరీక్ష కేంద్రాలను పరీక్షల నియంత్రణాధికారి ఆచార్య కె.రాజేందర్‌, అదనపు పరీక్షల నియంత్రణాధికారి డాక్టర్‌ వెంకటయ్య పరీక్షల తీరును పరిశీలించారు. ఈనెల 19న డిగ్రీ కోర్సుల మూడో సెమిస్టర్‌ పరీక్షలు ప్రారంభమవుతాయని వారు తెలిపారు.

విద్యార్థుల గైర్హాజరుపై అదనపు కలెక్టర్‌

అసంతృప్తి

హసన్‌పర్తి: విద్యార్థులు పాఠశాలకు గైర్హాజరైతే ఫలితాలు ఎలా సాధ్యమవుతాయని అదనపు కలెక్టర్‌, ఇన్‌చార్జ్‌ డీఈఓ వెంకటరెడ్డి హసన్‌పర్తిలోని జిల్లా పరిషత్‌ బాలుర, బాలికల పాఠశాల హెచ్‌ంను ఆదేశించారు. నషా ముక్త్‌ కార్యక్రమంలో భాగంగా, మంగళవారం పాఠశాలలో జరిగిన కార్యక్రమానికి ఆయన హాజరై పాఠశాలల్లోని రికార్డులు పరిశీలించారు. బాలుర పాఠశాలలో విద్యార్థుల నమోదు శాతంపై అసంతృప్తి వ్యక్తం చేశారు. నాలుగు రోజులుగా గ్యాస్‌ సిలిండర్లు సరఫరా కాకపోవడం వల్ల కట్టెలపైనే వంట చేస్తున్నట్లు బాలుర పాఠశాలలో మధ్యాహ్న భోజనం నిర్వహిస్తున్న మహిళా సంఘాలు సభ్యులు వెంకటరెడ్డి దృష్టికి తీసుకొచ్చారు. ఈసందర్భంగా ఆయన మాట్లాడుతూ.. ప్రభుత్వ పాఠశాలల్లో శిక్షణ పొందిన ఉపాధ్యాయులతో నాణ్యమైన విద్యనందిస్తున్నట్లు తెలిపారు. విద్యార్థులు డ్రగ్స్‌కు దూరంగా ఉండాలని సూచించారు. వారిచే ప్రతిజ్ఞ చేయించారు. కార్యక్రమంలో ఏఎంఓ ఇన్‌చార్జ్‌ డీఈఓ వెంకట్‌, వన్మోహన్‌, ప్రధానోపాధ్యాయులు సుమాదేవి, విజయలక్ష్మి, ఉపాధ్యాయులు తదితరులు పాల్గొన్నారు.

విద్యారణ్యపురి: హనుమకొండ జిల్లాలో బడిబయటి పిల్లల సర్వే అమలుపై జిల్లా స్థాయి కీలక సమావేశాన్ని కలెక్టరేట్‌లో ఈనెల 19న మధ్యాహ్నం 3 గంటలకు నిర్వహించనున్నారు. సమావేశానికి ఎంఈఓలు, స్కూల్‌ కాంప్లెక్స్‌ హెచ్‌ఎంలు, సీఆర్పీలు, ఐఈఆర్పీలు, ఎంఐఎస్‌ కో–ఆర్డినేటర్లు, కంప్యూటర్‌ ఆపరేటర్లు, కేజీబీవీలు, యూఆర్‌ఎస్‌లు, కార్మిక, మహిళా శిశుసంక్షేమ, పోలీస్‌వంటి అధికారులు హాజరు కావాల్సి ఉంటుందని హనుమకొండ అదనపు కలెక్టర్‌, ఇన్‌చార్జ్‌ డీఈఓ ఎ.వెంకటరెడ్డి, జిల్లా క్వాలిటీ కో–ఆర్డినేటర్‌ బండారు మన్మోహన్‌ మంగళవారం తెలిపారు. సర్వే చేపట్టడంలో అనుసరించాల్సిన మార్గదర్శకాలు, మండల స్థాయిలో, జిల్లా స్థాయిలో డేటా ఎంట్రీ, ధ్రువీకరణకు సంబంధించిన అంశాలు ఈ సమావేశంలో చర్చించనున్నారు. సంబంధిత అఽధికారులు సమగ్ర వివరాలతో విధిగా సమావేశానికి హాజరు కావాల్సి ఉంటుంది.

క్షేత్ర సందర్శనలో నూతన ఎంపీఓలు