పేదల కోసం పోరాడేది సీపీఐ

పేదల కోసం పోరాడేది సీపీఐ

ఎల్కతుర్తి: పేద, బడుగు బలహీన వర్గాల హక్కుల కోసం నిరంతరం పోరాటం చేసేదే సీపీఐ అని ఆ పార్టీ నేత, మాజీ ఎమ్మెల్యే చాడ వెంకట్‌రెడ్డి అన్నారు. భారత కమ్యూనిస్ట్‌ పార్టీ శతాబ్ది ఉత్సవాల సందర్భంగా కుమురంభీం జిల్లా జోడేఘాట్‌ నుంచి ఈనెల 15న ప్రారంభమైన బస్సు జాతా మంగళవారం భీమదేవరపల్లి, ఎల్కతుర్తి మండలాలకు చేరుకుంది. నాయకులు ఆయనకు ఘనస్వాగతం పలికారు. భీమదేవరపల్లి మండలం ముల్కనూరులోని అంబేడ్కర్‌ విగ్రహానికి పూల మాల వేసి నివాళులర్పించారు. పేదల సమస్యల పరిష్కారానికి, కార్మిక హక్కుల సాధనకు సీపీఐ ఎల్లప్పుడూ ముందుంటుందని పేర్కొన్నారు. కమ్యూనిస్ట్‌ పార్టీ అధికారంలో ఉన్న చోట ప్రజా సమస్యలు పరిష్కారమవుతాయని చెప్పారు. గౌరవెల్లి, దేవాదుల ప్రాజెక్టులపై అధికారుల నిర్లక్ష్యం ఉందని విమర్శించారు. స్థానిక ఎమ్మెల్యే ప్రజా సమస్యలపై శ్రద్ధ చూపాలని సూచించారు. డిసెంబర్‌ 26న ఖమ్మం జిల్లా భద్రచలంలో జరుగనున్న సీపీఐ వందేళ్ల ముగింపు సభకు బడుగు, బలహీన వర్గాలు తరలివచ్చి విజయవంతం చేయాలని పిలుపునిచ్చారు. కార్యక్రమంలో పార్టీ రాష్ట్ర సహాయ కార్యదర్శి తక్కళ్లపల్లి శ్రీనివాస్‌రావు, రాష్ట్ర కార్యవర్గ సభ్యుడు కలవేన శంకర్‌, జిల్లా కార్యదర్శి కర్రె భిక్షపతి, మారుపాక అనిల్‌కుమార్‌, ఆదరి శ్రీనివాస్‌, మంచాల రమాదేవి, ఉట్కూరి రాములు ఉన్నారు.

హిడ్మా ఎన్‌కౌంటర్‌ బూటకం

ఏపీలోని మారేడుమిల్లి అటవీ ప్రాంతంలో మావోయిస్టు అగ్రనేత హిడ్మా, అతడి భార్య రాజక్కతోపాటు మరో ఐదుగురిని ఎన్‌కౌంటర్‌ చేయడం బూటకమన్నారు. ‘లొంగిపోండి లేదా ఎన్‌కౌంటర్‌ చేస్తాం’ అనే తీరుతో కేంద్రం వ్యవహరిస్తోందని విమర్శించారు. ఈ ఎన్‌కౌంటర్‌పై న్యాయ విచారణ జరిపించాలని డిమాండ్‌ చేశారు.

సీపీఐ నేత చాడ వెంకట్‌రెడ్డి

చలో ఖమ్మం బహిరంగ సభను

విజయవంతం చేయాలి