నెలాఖరులో జిల్లా స్థాయి సైన్స్‌ ఎగ్జిబిషన్‌

Nov 19 2025 5:23 AM | Updated on Nov 19 2025 5:23 AM

కాళోజీ సెంటర్‌: జిల్లాలో ఈనెల చివరివారంలో జిల్లా స్థాయి సైన్స్‌ ఎగ్జిబిషన్‌, ఇన్‌స్పైర్‌ అవార్డ్స్‌ ఎగ్జిబిషన్‌ నిర్వహించనున్నట్లు డీఈఓ రంగయ్యనాయుడు తెలిపారు. మంగళవారం వరంగల్‌ ప్రభుత్వ పాఠశాలలో సన్నాహక సమావేశం నిర్వహించారు. ఈ సందర్భంగా డీఈఓ మాట్లాడుతూ జిల్లాలోని అన్ని ప్రభుత్వ, ప్రైవేట్‌ యాజమాన్య పాఠశాలల విద్యార్థులు ఈ అవకాశాన్ని సద్వినియోగం చేసుకోవాలన్నారు. విద్యార్థులకు ఎలాంటి ఇబ్బందులు కలుగకుండా ఏర్పాట్లు చేయాలన్నారు. కార్యక్రమంలో జిల్లా సైన్స్‌ అధికారి డాక్టర్‌ కట్ల శ్రీనివాస్‌, ఖిలా వరంగల్‌ ఎంఈఓ బి.ప్రసాద్‌, ఉపాధ్యాయులు కన్నం అరుణ, రిస్సోర్స్‌పర్సన్స్‌ కృష్ణారెడ్డి, కృష్ణమూర్తి, రాంగోపాల్‌ రెడ్డి, రమేష్‌, రాజు, పరమేశ్వర్‌ తదితరలు పాల్గొన్నారు.

రైతును రాజు చేయడమే లక్ష్యం

వర్ధన్నపేట: రైతును రాజు చేయడమే సీఎం రేవంత్‌రెడ్డి లక్ష్యమని కాంగ్రెస్‌ పార్టీ జిల్లా కిసాన్‌ సెల్‌ అధ్యక్షుడు బోంపెల్లి దేవేందర్‌రావు అన్నారు. మంగళవారం ఉప్పరపల్లిలో ఏర్పాటు చేసిన ధాన్యం కొనుగోలు కేంద్రాన్ని వర్ధన్నపేట మార్కెట్‌ కమిటీ చైర్మన్‌ నరుకుడు వెంకటయ్యతో కలిసి ప్రారంభించారు. ఈ సందర్భంగా ఆయన మాట్లాడుతూ రైతులు నాణ్యమైన ధాన్యాన్ని తీసుకువచ్చి మద్దతు ధర, బోనస్‌ పొందాలన్నారు. రైతులకు ఇబ్బందులు లేకుండా చూడాలని నిర్వాహకులను కోరారు. ఈ కార్యక్రమంలో నాయకులు అబ్బిడి రాజిరెడ్డి, పోశాల వెంకన్న, ఎద్దు సత్యనారాయణ, రైతులు పాల్గొన్నారు.

షరతులు లేకుండా యూరియా అందించాలి

దుగ్గొండి: రబీ సీజన్‌లో రైతుల అవసరాల మేరకు ఎలాంటి షరతులు లేకుండా యూరియా అందించాలని రైతు సంఘం జిల్లా అధ్యక్షుడు పుచ్చకాయల కృష్ణారెడ్డి కోరారు. మంగళవారం తహసీల్దార్‌కు వినతి పత్రం అందించారు. అనంతరం ఆయన మాట్లాడుతూ ఖరీఫ్‌ సీజన్‌లో యూరియా కొరతతో దిగుబడి తగ్గి రైతులు నష్టపోయారన్నారు. ప్రభుత్వం ముందస్తు ప్రణాళికతో రైతుల అవసరాల మేరకు యూరియా అందించాలన్నారు. ఈ కార్యక్రమంలో సంఘం మండల అధ్యక్షుడు చల్లా నర్సింహారెడ్డి, కార్యదర్శి అక్కెపల్లి సుధాకర్‌, రైతు నాయకులు గొర్రె సంజీవరెడ్డి, చల్లా సుభాష్‌ రెడ్డి, వేణువర్ధన్‌ రెడ్డి, నకిరబోయిన సదయ్య తదితరులు పాల్గొన్నారు.

మాదక ద్రవ్యాల నిర్మూలన అందరి బాధ్యత

వరంగల్‌: మాదక ద్రవ్యాల నిర్మూలన అందరి బాధ్యతని జిల్లా అదనపు కలెక్టర్‌ సంధ్యారాణి అన్నారు. నషా ముక్త్‌ భారత్‌ అభియాన్‌ 5వ వార్షికోత్సవాలను పురస్కరించుకొని మంగళవారం కాశిబుగ్గలోని నరేంద్రనగర్‌ జెడ్పీఎస్‌ ఎస్‌లో జిల్లా స్థాయిలో మాదక ద్రవ్యాలకు వ్య తిరేకంగా విద్యార్థులచే ప్రతిజ్ఞ చేయించారు. కార్యక్రమంలో జిల్లా సంక్షేమ శాఖ అధికారిని బి.రాజమణి, నార్కోటిక్‌ డిపార్ట్‌మెంట్‌ ఇన్‌స్పెక్టర్‌ రవీందర్‌, అధికారులు, ఉపాధ్యాయులు, విద్యార్థులు పాల్గొన్నారు.

వర్ధన్నపేట: మాదక ద్రవ్యాల నిర్మూలన అందరి బాధ్యతని వర్ధన్నపేట ఏసీపీ అంబటి నర్సయ్య పిలుపునిచ్చారు. మంగళవారం వర్దన్నపేట పట్టణంలోని అంబేడ్కర్‌ సెంటర్‌లో మాదక ద్రవ్యాల వినియోగం, అనర్థాలపై ప్రజలకు అవగాహన కల్పించారు. డ్రగ్స్‌ రహిత సమాజం కోసం అందరూ కృషి చేయాలన్నారు. సీఐ శ్రీనివాసరావు, ఎస్సైలు సాయిబాబు, రాజు, సిబ్బంది పాల్గొన్నారు.

మాదకద్రవ్యాలకు దూరంగా ఉండాలి

నర్సంపేట: విద్యార్థులు మాదకద్రవ్యాలకు దూరంగా ఉండాలని ప్రభుత్వ డిగ్రీ కళాశాల ప్రిన్సిపాల్‌ మల్లం నవీన్‌ సూచించారు. మంగళవారం ప్రభుత్వ డిగ్రీ కళాశాలలో సామూహి క ప్రతిజ్ఞ చేశారు. ఈ సందర్భంగా ప్రిన్సిపాల్‌ మాట్లాడారు. ఎన్‌ఎస్‌ఎస్‌ జిల్లా కో ఆర్డినేటర్‌ డాక్టర్‌ ఎం.రాంబాబు, సంధ్య, రాజీరు, అధ్యాపకులు, విద్యార్థులు పాల్గొన్నారు.