గుట్టలను మింగేస్తున్నారు..

గుట్టలను మింగేస్తున్నారు..

రాయపర్తి: పెద్దపెద్ద గుట్టలు, ఎస్సారెస్పీ కట్టలను మింగేస్తున్నారు భూబకాసురులు. ప్రకృతి సంపదను కొల్లగొడుతున్నారు. ఆదివారం, సెలవు రోజు వచ్చిందంటే చాలు.. జేసీబీ, హిటాచీ వాహనాలతో టిప్పర్లు, ట్రాక్టర్లలో మట్టిని తరలిస్తూ సొమ్ము చేసుకుంటున్నారు. ఇంత జరుగుతున్నా.. అధికారులు చూసీచూడనట్లు వ్యవహరిస్తున్నారనే స్థానికులు ఆరోపిస్తున్నారు. ప్రభుత్వ సొమ్మును ఆసరాగా చేసుకుని మట్టి వ్యాపారులు రాయపర్తి, తొర్రూరు, వరంగల్‌ పట్టణాలకు తరలిస్తున్నారు.

ఇందిరమ్మ ఇళ్ల పేరు చెప్పి..

ఇందిరమ్మ ఇళ్ల పేరు చెప్పి మట్టిని యథేచ్ఛగా తరలిస్తున్నారు. ప్రభుత్వ భూములు, చెరువులు, కుంటలను ఆసరాగా చేసుకొని మట్టివ్యాపారులు రెచ్చిపోతున్నారు. సంబంధిత అధికారులకు ఫోన్‌ చేసినా పట్టించుకోవడంలేదనే ఆరోపణలు వినిపిస్తున్నాయి.

వరామపురం శివారులో గుట్టను తొలుస్తున్న జేసీబీ

జోరుగా మట్టి వ్యాపారం

సెలవుల్లోనే ఎక్కువగా తరలింపు

‘ఇందిరమ్మ ఇళ్ల’కంటూ..

బుకాయిస్తున్న భూబకాసురులు

పట్టించుకోని అధికారులు

కరిగిపోతున్న గుట్టలు, మాయమవుతున్న ఎస్సారెస్పీ కట్టలు

ఎక్కడెక్కడంటే..

రాయపర్తి మండలకేంద్రంలోని గుబ్బెడుబోడుకిందితండా ఎస్సారెస్పీ కెనాల్‌ కట్టలు, సన్నూరు, శివరామపురం, వెంకటేశ్వరపల్లి శివారు గుట్టలతోపాటు, చెరువులు, కుంటల్లో మొరంమట్టిని తరలిస్తూ సొమ్ము చేసుకుంటున్నారు. రూ.లక్షల్లో అధికారులకు ముట్టచెబుతున్నట్లు వినిపిస్తున్నాయి. ఇప్పటికై నా ప్రభుత్వ సొమ్మును కాపాడాలని, లేదంటే ఉన్నతాధికారులకు ఫిర్యాదు చేయనున్నట్లు స్థానికులు వాపోతున్నారు.