రైతులకు ఇబ్బందులు లేకుండా చూడాలి

నర్సంపేట: ప్రభుత్వ నిబంధనలకు అనుగుణంగా ఉన్న ధాన్యాన్ని మాత్రమే నిర్వాహకులు కొనుగోలు చేయాలని అదనపు కలెక్టర్‌ సంధ్యారాణి సూచించారు. ఈ మేరకు నర్సంపేట రైతు వేదికలో నర్సంపేట డివిజన్‌స్థాయి ధాన్యం కొనుగోలు కేంద్రాల నిర్వాహకులకు సోమవారం శిక్షణ ఇచ్చారు. ఈ సందర్భంగా ఆమె మాట్లాడుతూ ధాన్యంలో తేమ 17 శాతం లేదా అంతకన్నా తక్కువ మాత్రమే ఉండాలని రైతులకు సూచించారు. బ్లోయర్‌ ఆన్‌లో ఉంచి హార్వెస్టర్‌ స్పీడ్‌ 18 నుంచి 20 ఉంచి ఎలాంటి తాలు లేకుండా ధాన్యం కోయాలని కోరారు. ఎట్టి పరిస్థితుల్లో రైతులకు అడ్వాన్స్‌గా గన్నీ సంచులు ఇవ్వకూడదన్నారు. సెంటర్‌ నిర్వాహకులు ఎప్పటికప్పుడు మిల్లుల్లో అన్‌లోడ్‌ అయిన ధాన్యానికి సంబంధించిన ట్రక్‌ షీట్లు, టోకెన్లు తెప్పించుకొని 24 గంటల్లోపు ఓపీ ఎంఎస్‌లో నమోదు చేయాలని ఆదేశించారు. నిర్వాహకులు ఎలాంటి అవకతవకలు లేకుండా సజావుగా ధాన్యం కొనుగోళ్లు చేపట్టాలని తెలిపారు. రైతులకు ఇబ్బందులు లేకుండా చూడాలని కోరారు. సహాయ వ్యవసాయ సంచాలకులు దామోదర్‌రెడ్డి, జిల్లా సహకార అధికారి నీరజ, రెవెన్యూ డివిజనల్‌ అధికారి పి.ఉమారాణి, అదనపు డీఆర్‌డీఓ రేణుక, సివిల్‌ సప్లయీస్‌ సివిల్‌ సప్లయీస్‌ జిల్లా అధికారి కిష్టయ్య పాల్గొన్నారు.