మీ చందా ఎంత?

సార్‌ బర్త్‌ డేకి..
ప్రభుత్వ విభాగాలు, ప్రైవేట్‌ దుకాణాలు, మద్యం షాపులు, బార్లు, బంగారు దుకాణాలే టార్గెట్‌ బిల్డర్లకు రూ.5 లక్షల నుంచి రూ.10 లక్షలు ఫిక్స్‌ చేసి హెచ్చరికలు ముక్కు పిండి మరీ వసూళ్లు చేస్తున్న ప్రజాప్రతినిధి అనుచరగణం రూ.3 కోట్లు వసూలే లక్ష్యం

సాక్షి ప్రతినిధి, విశాఖపట్నం :

నగరానికి చెందిన ఓ ప్రజాప్రతినిధి బర్త్‌ డే వేడుకలను గ్రాండ్‌గా నిర్వహించేందుకు అనుచరులు ప్లాన్‌ చేశారు. అంతే తమ పరిధిలోని అన్ని విభాగాలకు హుకుం జారీ చేశారు. జీవీఎంసీలోని టౌన్‌ ప్లానింగ్‌, రెవెన్యూ, ఇంజినీరింగ్‌ విభాగాలతో పాటు జీవీఎంసీ కాంట్రాక్టర్లు, వీఎంఆర్డీఏ, రెవెన్యూ, ఎకై ్సజ్‌, పోలీస్‌, సబ్‌ రిజిస్ట్రార్‌ కార్యాలయ ఉద్యోగులతోపాటు బిల్డర్లు, బార్‌, వైన్‌ షాప్‌ యజమానులకు బర్త్‌ డే టార్గెట్‌ ఫిక్స్‌ చేసినట్లు సమాచారం.

‘చెప్పినంతా ఇవ్వాల్సిందేనని లేదంటే మీ సీట్లలో మీరుండరు.. కొత్తవాళ్లొస్తారు’ అంటూ బెదిరిస్తున్నట్లు ఆరోపణలు వినిపిస్తున్నాయి. మొత్తంగా బర్త్‌ డే వేడుకలకు అన్ని విభాగాల నుంచి రూ.3 కోట్లకు పైగానే వసూలు చేయనున్నట్లు తెలుస్తోంది. ఈ వసూళ్ల పర్వమంతా సదరు ప్రజాప్రతినిధికి చెందిన అధికారిక, అనధికారిక పీఏల ఆధ్వర్యంలో జరుగుతున్నట్లు సమాచారం.

సార్‌ కోసం రూ.10 లక్షలు పంపించలేవా.?

ఓ బిల్డర్‌కి సదరు ప్రజాప్రతినిధి పీఏలు కాల్‌ చేసి.. సార్‌ బర్త్‌ డ్‌ ఉంది.. రూ. 10 లక్షలు పంపించాలని ఆదేశించినట్లు తెలుస్తోంది. వాళ్ల మాటలు విన్న బిల్డర్‌ ఒక్కసారిగా హతాశుతుడయ్యాడు. అదేవిధంగా మరో నలుగురైదుగురు బిల్డర్లకు ఒక్కొక్కరికీ రూ.5 లక్షలు ఇవ్వాల్సిందేనంటూ ఆదేశాలు జారీ అయినట్లు తెలుస్తోంది. బర్త్‌ డే కోసం ఆమాత్రం ఖర్చు పెట్టాల్సిందేనంటూ బిల్డర్లకు రేట్‌ ఫిక్స్‌ చేయడంతో ఏం చేయాలో పాలుపోక బంధువుల వద్ద వారంతా వాపోతున్నట్లు సమాచారం.

ఒకప్పుడు వినాయక చవితి, దసరా మహోత్సవాలకు నిర్వాహకులు చందాలు వసూలు చేసేవారు. చంద్రబాబు ప్రభుత్వం వచ్చాక నాయకుల పుట్టినరోజు వేడుకలకు, ఇతర కార్యక్రమాలకు చందాల వసూళ్ల దందా మితిమీరిపోతోంది. జిల్లాలోని ఓ ప్రజాప్రతినిధి పుట్టినరోజు వేడుకలు ఉన్నాయంటూ ఆయన అనుచరగణం నగరంపై పడ్డారు. ‘సార్‌ బర్త్‌ డే ఉంది.. మీ చందా ఇంత అని ఫిక్స్‌ చేశాం.. ఇవ్వాల్సిందే’ అంటూ ప్రభుత్వ విభాగాలు, షాపింగ్‌ మాల్స్‌, బార్లు, వైన్‌ షాపులు.. ఇలా దొరికిన చోటల్లా దండేస్తున్నారు. ఇంతకీ వీళ్ల టార్గెట్‌ ఎంతంటే రూ.3 కోట్ల పైమాటేనట.

గతంలోనూ వసూళ్ల ‘గానం!’

చంద్రబాబు ప్రభుత్వానికి చెందిన ప్రజాప్రతినిధులకు ఈ తరహా వసూళ్ల దందా కొత్తేంకాదు. గతంలోనూ అధికార పార్టీకి చెందిన ఓ ప్రజాప్రతినిధి ఇంట్లో విషాద కార్యక్రమానికి కూడా ఈ తరహా వసూళ్ల దందా నడిచింది. నగరానికి చెందిన ఓ ప్రజాప్రతినిధి తండ్రి మృతి చెందిన సమయంలో ఆయన బంధువు అని తిరిగే ఓ వ్యక్తి వసూళ్ల ‘గానం’ చేశారు. దీనిపై చంద్రబాబు కార్యాలయానికి నేరుగా ఫిర్యాదులు వెళ్లాయి. పార్టీ అధిష్టానం ఈ వ్యవహారంపై సీరియస్‌ అయింది. దీంతో సదరు ప్రజాప్రతినిధి వసూళ్ల ‘గానం‘ చేసిన వ్యక్తిని దూరం పెట్టారు. అయినా.. సదరు వ్యక్తి అన్ని విభాగాల్లో తలదూర్చుతూ ఇప్పటికీ పైరవీలు చేస్తూ.. భారీగా వసూళ్లు రాబట్టుకుంటున్నట్లు తెలుస్తోంది. అదే విధంగా గతంలో ఓ మంత్రి ప్రైవేట్‌ పీఏ ఇలాంటి వసూళ్లకే పాల్పడుతున్నట్లు ఆరోపణలు రావడంతో ఆయనతో రాజీనామా చేయించారు. ఇలా వసూళ్ల పర్వాలు బట్టబయలై.. అబాసుపాలవుతున్నా.. అధికార పార్టీకి చెందిన ప్రజాప్రతినిధులు తమ వ్యవహారశైలి మార్చుకోకపోవడంతో ఇబ్బందులకు గురవుతున్నామంటూ బాధిత విభాగాలకు చెందిన వారంతా ఆవేదన వ్యక్తం చేస్తున్నారు.