తరలి వెడలె తిరువనంతపురానికి!

తరలి వెడలె తిరువనంతపురానికి!

సాక్షి, విశాఖపట్నం : నేవీడే వస్తుందంటే చాలు.. యావత్‌ భారతావని చూపు విశాఖ బీచ్‌వైపే ఉండేది. పది రోజుల ముందు నుంచే నేవీ సిబ్బంది కళ్లు చెదిరే యుద్ధ విన్యాసాలతో అదరగొట్టేవారు. 1971లో పాకిస్తాన్‌తో యుద్ధంలో భారత నౌకాదళం ప్రదర్శించిన ప్రతిభా పాటవాలు, వ్యూహాలు, ధైర్యసాహసాలకు గుర్తుగా ఏటా డిసెంబర్‌ 4వ తేదీని భారత నౌకాదళ దినోత్సవంగా నిర్వహిహిస్తున్నారు. ఆ రోజున తూర్పు నౌకాదళం ఆధ్వర్యంలో సాగర తీరంలో ఆర్‌కే బీచ్‌ వద్ద విన్యాసాలు జరుగుతుంటాయి. ఇందుకోసం నవంబర్‌ నుంచే నౌకాదళ సిబ్బంది తీవ్ర కసరత్తులు చేస్తుంటారు. యుద్ధనౌకలు, హైస్పీడ్‌ బోట్లు, జెమినీ బోట్లు యుద్ధ విమాన విన్యాసాలు, హెలికాఫ్టర్లు, స్కై డైవర్లు.. శత్రు స్థావరాలపై విరుచుకుపడే మైరెన్‌ కమాండోలు.. ఇలా కళ్లు చెదిరే విన్యాసాలతో కదన రంగాన్ని తలపించే ఆరోజు కోసం విశాఖ ప్రజలే కాదు దేశమంతా ఎదురు చూస్తుంటుంది. అయితే వరుసగా రెండో సారి భారత నేవీ శక్తి సామర్థ్యాలను ప్రత్యక్షంగా వీక్షించే అదృష్టం నగర వాసులకు లేకపోయింది. ఈసారి తిరువనంతపురంలో నౌకాదళ దినోత్సవం జరగనుంది. గతేడాది పూరీలో నిర్వహించిన సంగతి తెలిసిందే. అయితే 4వ తేదీన విశాఖ తీరం కేవలం విద్యుత్‌ వెలుగుల్లో యుద్ధ నౌకల ప్రదర్శనకే పరిమితం కానుంది.

షంగుముగం బీచ్‌లో విన్యాసాలు!

ఏటా నౌకాదళ దినోత్సవాలు విశాఖ వేదికగా జరుగుతాయి. ముఖ్య అతిథిగా కేంద్ర రక్షణ మంత్రితో పాటు భారత నౌకాదళాధిపతి, రాష్ట్ర మంత్రులు, నౌకాదళాధికారలు హాజరవుతుంటారు. పశ్చిమ నౌకాదళంలోనూ నేవీ డే నిర్వహించినా.. ప్రధాన వేడుకలు మాత్రం తూర్పు నౌకాదళ ప్రధాన కేంద్రమైన విశాఖపట్నంలోనే జరిగేవి. నేవీ డే విన్యాసాల వేదికలను మార్పు చేయాలని 2023లో నిర్ణయించినా దాన్ని పశ్చిమ నౌకాదళంలోనే అమలు చేయాలనుకున్నారు. కానీ.. చంద్రబాబు ప్రభుత్వం వచ్చిన తర్వాత అంటే 2024 నుంచి ఈఎన్‌సీలోనూ అమలుకు నిర్ణయించారు. తొలిసారిగా విశాఖ వేదికని రద్దు చేసి.. ఒడిశా రాష్ట్రంలోని పూరీలో వేడుకలు నిర్వహించారు. ఈసారి కేరళ రాష్ట్రానికి విన్యాసాల వేదికను తరలించేశారు. తిరువనంతపురంలోని షంగముగం బీచ్‌లో ఆపరేషన్‌ డిమాన్‌స్ట్రేషన్‌ నిర్వహించేందుకు ఏర్పాట్లు చేస్తున్నారు. తూర్పు నౌకాదళానికి చెందిన యుద్ధ నౌకలు, జలాంతర్గాములు, యుద్ధ విమానాలు, హెలికాఫ్టర్లు మొత్తం.. ఇప్పటికే బ్యాచ్‌ల వారీగా తిరువనంతపురం వైపు పయనమయ్యాయి.

విశాఖలో జరగకపోవడం

నాలుగోసారి!

బంగాళాఖాతం వేదికగా ఏటా నౌకాదళ దినోత్సవాన్ని నిర్వహించడం ఆనవాయితీ.. పాక్‌కి చెందిన ఘాజీ జలాంతర్గామిని విశాఖ తీరానికి సమీపంలో మట్టుబెట్టారు. ఈ కారణంగానే నేవీ డేని ఇక్కడ నిర్వహిస్తున్నారు. అయితే 2012లో ఒకసారి నేవీడే వేడుకలు జరగలేదు. ఆ సమయంలో మాజీ ప్రధాని ఐకే గుజ్రాల్‌ మరణించడంతో.. ఆయన సంతాప దినంలో భాగంగా నేవీడే ఉత్సవాల్ని పూర్తిగా నిర్వహించలేదు. కరోనా కారణంగా 2020లో వేడుకలు రద్దయ్యాయి. 2024లో పూరీలో నిర్వహించారు. ఈసారి కేరళకు విన్యాసాల వేదికని మార్చడంతో విశాఖవాసులు నిరాశ చెందుతున్నారు. అయితే డిసెంబర్‌ 4న ఏటా మాదిరిగా ఉదయం 7.30 గంటలకు బీచ్‌రోడ్‌లోని విక్టరీ ఎట్‌ సీ స్మారక స్థూపం వద్ద అమరులకు నౌకాదళాధికారులు పుష్పగుచ్ఛాలు ఉంచి శ్రద్ధాంజలి ఘటిస్తారు. అనంతరం గౌరవ వందనం నిర్వహిస్తారు. సాయంత్రం 6 గంటల తర్వాత ఆర్‌కే బీచ్‌కి సమీపంలో యుద్ధనౌకలు ప్రదర్శనకు ఉంచి.. చీకటి పడిన వెంటనే.. విద్యుత్‌ వెలుగుల్లో యుద్ధనౌకల ప్రదర్శన నిర్వహించాలని అధికారులు భావిస్తున్నారు. దీనిపై త్వరలోనే నిర్ణయం వెలువడనుందని తూర్పు నౌకాదళ వర్గాలు వెల్లడించాయి.