మీ సంతకమే ఆయుధం

మీ సంతకమే ఆయుధం

సాక్షి, విశాఖపట్నం: ప్రభుత్వ మెడికల్‌ కళాశాలల ప్రైవేటీకరణ నిర్ణయాన్ని చంద్రబాబు ప్రభుత్వం వెనక్కి తీసుకునేలా ఒత్తిడి తీసుకొద్దామని వైఎస్సార్‌ సీపీ ఉత్తరాంధ్ర రీజినల్‌ కో–ఆర్డినేటర్‌ కురసాల కన్నబాబు ప్రజలకు పిలుపునిచ్చారు. ప్రైవేటీకరణకు వ్యతిరేకంగా వైఎస్సార్‌ సీపీ చేపట్టిన ‘కోటి సంతకాల సేకరణ’ కార్యక్రమంలో మీరు పెట్టే ఒక్కో సంతకం చంద్రబాబు సర్కార్‌ మెడలు వంచుతుందని ఆయన పేర్కొన్నారు. విశాఖ తూర్పు లోని ఇసుకతోట రజకవీధి సంఘం భవనం వద్ద నియోజకవర్గ సమన్వయకర్త మొల్లి అప్పారావు ఆధ్వర్యంలో శుక్రవారం రచ్చబండ–కోటి సంతకాల కార్యక్రమం నిర్వహించారు. ఈ కార్యక్రమానికి పార్టీ జిల్లా అధ్యక్షుడు కేకే రాజుతో కలిసి కన్నబాబు ముఖ్య అతిథిగా హాజరయ్యారు.

హామీలకు తూట్లు.. వైద్యం దూరం

ఈ సందర్భంగా కన్నబాబు మాట్లాడుతూ.. ‘చంద్రబాబు ప్రభుత్వం అధికారం చేపట్టి నేటికి 18 నెలలు కావస్తున్నా, ఎన్నికల హామీలు అమలు చేయలేదు. రాష్ట్రంలో విద్యా, వైద్య, వ్యవసాయ రంగాలను ఈ ప్రభుత్వం పూర్తిగా నిర్లక్ష్యం చేసింది’అని మండిపడ్డారు. గత వైఎస్సార్‌ సీపీ ప్రభుత్వ హయాంలో వైఎస్‌ జగన్‌మోహన్‌రెడ్డి రాష్ట్ర చరిత్రలో ఎన్నడూ లేని విధంగా 17 ప్రభుత్వ మెడికల్‌ కళాశాలలను మంజూరు చేస్తే, వాటిలో ఇప్పటికే ఐదు కళాశాలలు పూర్తయ్యాయని గుర్తుచేశారు. మిగిలిన కళాశాలలను పీపీపీ పద్ధతిలో ప్రైవేటీకరించేందుకు చంద్రబాబు కుట్ర చేస్తున్నారని ధ్వజమెత్తారు. ఈ నిర్ణయానికి వ్యతిరేకంగా చేపట్టిన కోటి సంతకాల ఉద్యమంలో ప్రజలు భాగస్వాములవుతున్నారని, చంద్రబాబు తన నిర్ణయాన్ని వెనక్కి తీసుకునేలా చేయాల్సిన బాధ్యత మనందరిపై ఉందని కన్నబాబు అన్నారు. పార్టీ జిల్లా అధ్యక్షుడు కేకే రాజు, సమన్వయకర్త మొల్లి అప్పారావు మాట్లాడుతూ.. గత నెల రోజులుగా తూర్పు నియోజకవర్గంలో చేపడుతున్న కోటి సంతకాల సేకరణకు ప్రజలు, యువత, విద్యార్థులు, మేధావుల నుంచి విశేష స్పందన లభిస్తోందన్నారు. వారంతా స్వచ్ఛందంగా ముందుకు వచ్చి ప్రైవేటీకరణకు వ్యతిరేకంగా సంతకాలు చేస్తున్నారని తెలిపారు. ప్రజా వ్యతిరేక పాలన సాగిస్తున్న చంద్రబాబు ప్రభుత్వానికి తగిన బుద్ధి చెప్పేందుకు ప్రజలు సిద్ధంగా ఉన్నారని హెచ్చరించారు. విశాఖ తూర్పు, ఉత్తర నియోజకవర్గాల పరిశీలకుడు చింతకాయల సన్యాసిపాత్రుడు, మాజీ మేయర్‌ గొలగాని హరివెంకట కుమారి, మాజీ ఎమ్మెల్యే చింతలపూడి వెంకటరామయ్య, సీఈసీ సభ్యుడు సతీష్‌ వర్మ, కార్పొరేటర్లు పాల్గొన్నారు.

మెడికల్‌ కళాశాలల ప్రైవేటీకరణను అడ్డుకుందాం