TV
‘మా కడుపులు కొట్టొద్దు’
వింజమూరు (ఉదయగిరి): అయ్యా.. మీ వ్యాపారాలకు మా భూములే దొరికాయా.. దయచేసి మా భూములు లాక్కొని, మా కడుపులు కొట్టొద్దు.. అంటూ ఎమ్మెల్యే కాకర్ల సురేష్‌, జాయింట్‌ కలెక్టర్‌ మొగిలి వెంకటేశ్వర్లు వద్ద గ్రామస్తులు విజ్ఞప్తి చేశారు. వింజమూరు మండల కేంద్రానికి అత్యంత సమీపంలో ఉన్న జీబీకేఆర్‌ ఎస్టీ కాలనీ సమీపంలో ఉన్న 94 ఎకరాల ప్రభుత్వ భూమిని నుడాకు కేటాయింపుపకు సంబంధించి శుక్రవారం జేసీ, ఎమ్మెల్యే ఆ భూముల పరిశీలనకు వచ్చారు. ఈ క్రమంలో అక్కడ సాగు చేస్తున్న ఎస్టీ కాలనీ వాసులు దీనిని తీవ్రంగా వ్యతిరేకించారు. ఈ భూములు నుడాకు ఇచ్చి మా భవిష్యత్తు అంధకారంలోకి నెట్టొద్దు అని వేడుకున్నారు. కాగా ఒకపక్క మీకు న్యాయం చేస్తామని చెబుతునే మరోపక్క అందరూ సహకరించాలి అని ఎమ్మెల్యే సురేష్‌ చెప్పడం పట్ల గిరిజనులు తీవ్ర అసంతృప్తితో ఉన్నారు. కార్యక్రమంలో ఆర్డీఓ వంశీకృష్ణ, తహసీల్దార్‌ హమీద్‌, ఎంపీడీఓ కె.శ్రీనివాసరెడ్డి ఉన్నారు.
