పొగ మంచుతో జరభద్రం

పొగ మంచుతో జరభద్రం

సంగారెడ్డి జోన్‌: వారం రోజులుగా చలి తీవ్రతతో పాటు పొగ మంచు విపరీతంగా పెరుగుతోంది. ఈనెల ప్రారంభం నుండే పెరిగిన చలి తీవ్రత పెరిగింది. దట్టంగా పొగ మంచు కురుస్తుంది. వేకువ జామున సమయంలో ప్రయాణాలు సాగించే వాహనదారులతోపాటు వ్యాపారస్తులు ఉద్యోగులు తీవ్ర ఇబ్బందులు ఎదుర్కొంటున్నారు. శీతాకాలం కావడంతో ఉదయం సమయంలో కురుస్తున్న పొగ మంచు రహదారులను పూర్తిగా కమ్మేస్తుంది. ఉదయం 8:00 దాటిన పొగ మంచు తగ్గటం లేదు. దీంతో రాకపోకలు సాగించేవారు తీవ్ర ఇబ్బందులకు గురవుతున్నారు. ఉదయం సమయంలో వివిధ పరిశ్రమలకు వెళ్లే ఉద్యోగస్తులు, వ్యాపారాలు నిర్వహించే వర్తక, వాణిజ్యదారులు ప్రయాణాలు సాగించక తప్పడం లేదు. ఈ క్రమంలోనే దగ్గరకు వచ్చేంతవరకు వాహనాలు కనిపించకపోవడంతో ప్రమాదాలు చోటు చేసుకుని స్వల్ప గాయాల పాలవుతున్నారు. తప్పని పరిస్థితులలో తమ వాహనాలకు లైట్లు వేసుకొని వెళ్తున్నారు. జాగ్రత్తలతో సురక్షిత ప్రయాణాలు చేయాలని, రాత్రి ప్రయాణాలు తగ్గించుకోవాలని పోలీసు అధికారులు సూచిస్తున్నారు. రాత్రుల సమయం నుండే పొగ మంచు దట్టంగా కురవడంతో దూర ప్రయాణాలు సాగించే కంటైనర్లు, లారీలు రహదారుల పక్కనే నిలబెట్టుకుంటున్నారు.

పోలీసుల సూచనలు

● ప్రజలు పొగ మంచులో ప్రయాణాలను వాయిదా వేసుకోవాలని, అత్యవసరమైతే తప్ప ప్రయాణాలు చేయకూడదు.

● పొగమంచు దట్టంగా కమ్ముకోవటంతో రహదారులపై ఎదురుగా వచ్చే వాహనాలు కనిపించని పరిస్థితులు ఏర్పడుతాయి. ఈ సమయంలో ప్రమాదాలు జరిగే అవకాశం ఎక్కువగా ఉంటాయి.

● పరిమిత వేగంతో ప్రయాణిస్తే ప్రమాదాలు జరగకుండా నివారించుకునే అవకాశం ఉంటుంది. అధిక వేగంతో ప్రయాణిస్తూ సడన్‌ బ్రేక్‌ వేయడం వల్ల బోల్తా పడడం, ఇతర వాహనాలను ఢీకొట్టడం వంటి ప్రమాదాలు జరిగే అవకాశం ఉంటుంది. పరిమిత వేగంలో ఉంటే ఎదురుగా వచ్చే వాహనాన్ని గుర్తించి అప్రమత్తంగా ఉండే అవకాశం ఉంటుంది.

● వాహనాలు నడుపేటప్పుడు హెడ్‌లైట్లు, ఇండికేటర్లు తప్పనిసరిగా ఆనన్‌లో ఉంచాలి. అత్యవసరమైతే తప్ప రాత్రులలో, పొగమంచు తీవ్రంగా ఉన్న సమయాల్లో ప్రయాణాలు చేయకుండా ఉండాలి. వాహనదారులు తప్పనిసరిగా హెల్మెట్‌, సెట్‌ బెల్ట్‌ ధరించాలి.

● కారులో ప్రయాణించేటప్పుడు హీటర్‌ ఉపయోగించాలి. దీంతో ముందు అద్దాలు ఆవిరిపట్టకుండా ఎదుటి వాహనాలను సరిగ్గా గమనించేందుకు వీలు ఉంటుంది.

కనిష్ట సాయికి పడిపోతున్న ఉష్ణోగ్రతలు

ఉదయం 9గంటల వరకు తగ్గని పొగ మంచు

జాగ్రత్తలు పాటించాలని అధికారుల సూచన

జాగ్రత్తలు పాటిస్తూ ప్రయాణం చేయాలి

ప్రస్తుతం శీతాకాలం కావడంతో ప్రతిరోజు విపరీతంగా దట్టమైన పొగ మంచు కురుస్తుంది. రహదారులపై మంచు కురవడంతో అత్యవసర సమయంలో మాత్రమే జాగ్రత్తలు పాటిస్తూ ప్రయాణాలు చేయాలి. ప్రమాదాలు చోటు చేసుకోకుండా ప్రతి ఒక్కరూ అప్రమత్తంగా ఉండాలి. –పరితోష్‌ పంకజ్‌, ఎస్పీ, సంగారెడ్డి

1/2

పొగ మంచుతో జరభద్రం

2/2

పొగ మంచుతో జరభద్రం