TV
6న దేవరకొండకు ముఖ్యమంత్రి రాక
నల్లగొండ : ముఖ్యమంత్రి రేవంత్‌రెడ్డి డిసెంబర్‌ 6వ తేదీన దేవరకొండకు రానున్నారు. జిల్లాల పర్యటనలో భాగంగా ఆయన దేరకొండకు వస్తున్నారు. దేవరకొండ మున్సిపాలిటీలో వివిధ అభివృద్ధి కార్యక్రమాలకు ప్రారంభోత్సవాలు, శంకుస్థాపనలు చేయనున్నారు. అనంతరం మున్సిపాలిటీల్లో జరిగే బహిరంగ సభల్లో ఆయన పాల్గొననున్నారు. సీఎం పర్యటన షెడ్యూల్‌ అధికారంగా వెలువడాల్సి ఉంది.
సురక్షితంగా గమ్యస్థానాలకు చేర్చాలి
దేవరకొండ : ఆర్టీసీ బస్సుల్లో ప్రయాణికులను సురక్షితంగా వారి గమ్య స్థానాలకు చేర్చాలని ఆర్టీసీ హైదరాబాద్‌ జోన్‌ ఎగ్జిక్యూటివ్‌ డైరెక్టర్‌ ఖుస్రో షాఖాన్‌ సూచించారు. శుక్రవారం దేవరకొండ డిపో, రెండు బస్‌ స్టేషన్లతోపాటు కొండమల్లేపల్లి బస్‌స్టేషన్‌ను ఆయన తనిఖీ చేశారు. ఈ సందర్భంగా ఆర్టీసీ కార్మికులతో మాట్లాడుతూ ఉద్యోగులంతా సమష్టిగా పనిచేసి డిపోను రాష్ట్రస్థాయిలో ముందంజలో ఉంచేందుకు కృషి చేయాలన్నారు. బస్‌ స్టేషన్‌ ఆవరణ పరిశుభ్రంగా ఉంచాలని, కార్మికుల ఆరోగ్యంపై జాగ్రత్తలు తీసుకోవాలని అధికారులను ఆదేశించారు. ఆయన వెంట ఆర్‌ఎం కె.జాన్‌రెడ్డి, దేవరకొండ డిపో ఇన్‌చార్జి మేనేజర్‌ సైదులు, పలువురు ఉద్యోగులు పాల్గొన్నారు.
చెర్వుగట్టు హుండీ ఆదాయం రూ.42,87,544
నార్కట్‌పల్లి : చెర్వుగట్టు శ్రీపార్వతీ జడల రామలింగేశ్వర స్వామి దేవస్థానంలో హుండీలను శుక్రవారం లెక్కించారు. 49 రోజులకు గాను రూ.42,87,544 ఆదాయం వచ్చినట్లు ఆలయ కార్యనిర్వహణ అధికారి మోహన్‌బాబు తెలిపారు. హుండీలో అమోరికా డాలర్స్‌ 39. కెనెడా డాలర్స్‌ 5, శ్రీలంక రూపీ 10 ఉన్నట్లు తెలిపారు. అన్నదానం కార్యక్రమానికి భక్తులు సమర్పించిన హుండీని లెక్కించగా రూజ42,374 వచ్చినట్లు వెల్లడించారు. కార్యక్రమంలో దేవాదాయ ధర్మాదాయ శాఖ పరిశీలకురాలు సుమతి, ప్రధాన అర్చకుడు రామలింగేశ్వరశర్మ, సీనియర్‌ అసిస్టెంట్‌ ఇంద్రసేనారెడ్డి, సిబ్బంది శ్రీనివాస్‌రెడ్డి, నర్సిరెడ్డి, వెంకటయ్య, రాజలక్ష్మి, నరేష్‌, మహేందర్‌రెడ్డి, తదితరులు పాల్గొన్నారు.
30న ఉమ్మడి జిల్లాస్థాయి ఆర్చరీ ఎంపిక పోటీలు
భువనగిరి : ఉమ్మడి నల్లగొండ జిల్లా స్థాయి ఆర్చరీ ఎంపిక పోటీలు ఈ నెల 30న నిర్వహిస్తున్నట్లు ఆర్చరీ అసోసియేషన్‌ ఉమ్మడి నల్లగొండ జిల్లా అధ్యక్ష, కార్యదర్శులు శ్రీగిరి విజయకుమార్‌రెడ్డి, తునికి విజయసాగర్‌ శుక్రవారం ఒక ప్రకటనలో తెలిపారు. సంస్థాన్‌ నారాయణపురం మండలం సర్వేల్‌లో నిర్వహించే పురుషులు, మహిళల ఎంపీక పోటీలకు ఆసక్తి కలిగిన క్రీడాకారులు తమ వెంట ఆధార్‌కార్డుతో పాటు జనన ధ్రువీకరణ పత్రాలను తీసుకుని ఉదయం 10 గంటలకు వరకు హాజరై వివరాలను నమోదు చేసుకోవాలని తెలిపారు. మరిన్ని వివరాలకు కోచ్‌ సంపత్‌ను 9182842387లో సంప్రదించాలని కోరారు.
6న దేవరకొండకు ముఖ్యమంత్రి రాక
6న దేవరకొండకు ముఖ్యమంత్రి రాక
