యాసంగి సాగుకు సమాయత్తం

యాసంగి సాగుకు సమాయత్తం

యాసంగి సీజన్‌లో రైతులకు విత్తనాలు, ఎరువుల కొరత లేకుండా ముందస్తు చర్యలు తీసుకుంటున్నాం. ఇప్పటికే రైతులకు అవసరమైన విత్తనాలు, ఎరువుల కోసం ప్రభుత్వానికి ఇండెంట్‌ పెట్టాం. రైతులు అవసరం మేరకే ఎరువులను వాడుకోవాలి తప్ప అధిక మోతాదులో వాడితే నష్టం జరిగే ప్రమాదముంది.

– శ్రవణ్‌కుమార్‌,

జిల్లా వ్యవసాయ అధికారి నల్లగొండ

నల్లగొండ అగ్రికల్చర్‌ : యాసంగిలో పంటల సాగు కోసం రైతులు సన్నద్ధమవుతున్నారు. ఓ వైపు వానాకాలం ధాన్యం అమ్మకాలు, మరోవైపు యాసంగి సాగుకు పొలం దున్నకం, వరి నార్లు పోసుకునే పనుల్లో రైతులు బిజీబిజీగా ఉన్నారు. జిల్లా వ్యాప్తంగా యాసంగిలో 6,57,229 ఎకరాల్లో పంటలు సాగవుతాయని వ్యవసాయ శాఖ అంచనా వేసింది. అందుకు తగ్గట్టుగా ఎరువులు, విత్తనాలను సిద్ధం చేసింది.

5,64,678 ఎకరాల్లో వరి..

వానాకాలంలో పెద్ద ఎత్తున వర్షాలు కురవడంతో చెరువులు, కుంటలు, ప్రాజెక్టుల్లో పెద్ద ఎత్తున నీటి నిల్వలు ఉన్నాయి. భూగర్భ జలాలు కూడా పెరగడంతో యాసంగిలో వరి పెద్ద ఎత్తున సాగయ్యే అవకాశం ఉంది. జిల్లా వ్యాప్తంగా యాసంగిలో వరి 5,64,678 ఎకరాల్లో సాగు కానున్నట్లు వ్యవసాయ శాఖ అంచనా వేసింది. రైతులు వరి నార్లు పోసుకుని డిసెంబరు రెండో వారం నుంచి వరి నాట్లు వేసుకునేలా సిద్ధమవతున్నారు.

విత్తనాలు సిద్ధం చేసిన వ్యవసాయ శాఖ

జిల్లాలో యాసంగి సీజన్‌కు అవసరమైన వరి విత్తనాలను నందిపహాడ్‌ విత్తనాభివృద్ధి సంస్థ సిద్ధంగా ఉంచింది. వరి బీపీటీ (5204) రకం 326 క్వింటాళ్లు, ఆర్‌ఎన్‌ఆర్‌ (15048) 22 క్వింటాళ్లు, కేఎన్‌ఎం(118) 36 క్వింటాళ్లు, కేఎన్‌ఎం (1638) 369 క్వింటాళ్లు, జేజీఎల్‌ (24423) 2 క్వింటాళ్లు, జీజీఎల్‌ (27356) 127 క్వింటాళ్లు, ఉలవలు (జేజీ11) 12 క్వింటాళ్లు, మినుము (టీయు 31) 4 క్వింటాళ్లు, వేరుశెనగ (కె6) 20 క్వింటాళ్లు అందుబాటులో ఉంచింది. ప్రైవేట్‌ సంస్థలకు చెందిన వివిధ రకాల విత్తనాలు జిల్లా వ్యాప్తంగా డీలర్ల వద్ద అందుబాటులో ఉన్నాయి.

ఫ 6,57,299 ఎకరాల్లో సాగు అంచనా

ఫ దున్నకాలు, వరి నారు పోసుకునే పనుల్లో నిమగ్నమైన రైతులు