లీడర్‌.. కేడర్‌

లీడర్‌.. కేడర్‌

పంచాయతీ ఎన్నికల్లో గెలుపే లక్ష్యంగాపార్టీలు సమాయత్తం అవుతున్నాయి. సర్పంచ్‌, వార్డు సభ్యులుగా పోటీ చేసే ఆశావహులు, కార్యకర్తలతో నేతలు విస్తృతంగా సమావేశాలు నిర్వహిస్తున్నారు. ప్రజల్లో మంచి పేరుతో పాటు ఆర్థిక బలం ఉన్న వారిని పోటీలో నిలపాలని ప్యూహ రచన చేస్తున్నారు. గెలుపే లక్ష్యంగా ముందుకు సాగాలని శ్రేణులకు దిశా నిర్దేశం చేస్తున్నారు.

– మెదక్‌జోన్‌

జోరుగా చేరికలు

స్థానిక సంస్థల ఎన్నికల వేళ పార్టీల్లో చేరికలు జోరుగా సాగుతున్నాయి. ఇటీవల రామాయంపేటకు చెందిన బీఆర్‌ఎస్‌ నేతలు, కార్యకర్తలు మాజీ ఎమ్మెల్యే మైనంపల్లి హన్మంతరావు సమక్షంలో కాంగ్రెస్‌ తీర్థం పుచ్చుకున్నారు. మరికొంత మంది బీఆర్‌ఎస్‌ కా ర్యకర్తలు ఈనెల 30న చిన్నశంకరంపేట మండల కేంద్రంలో జరిగే సమావేశంలో కాంగ్రెస్‌లో చేరనున్నట్లు సమాచారం. అలాగే అధికా ర కాంగ్రెస్‌తో పాటు బీజేపీ నుంచి కొందరు ముఖ్య నేతలు నర్సాపూర్‌ ఎమ్మెల్యే సునీతారెడ్డి ఆధ్వర్యంలో మాజీ మంత్రి హరీశ్‌రావు సమక్షంలో బీఆర్‌ఎస్‌ తీర్థం పుచ్చుకున్నారు.

స్థానిక ఎన్నికలపై పార్టీల నజర్‌

● కార్యకర్తలతో జోరుగా సమావేశాలు

● గెలుపే లక్ష్యంగా వ్యూహాలు

జిల్లాలో 21 గ్రామ పంచాయతీలు ఉన్నాయి. మొదటి విడతలో ఆరు మండలాల్లో ఎన్నికల నిర్వహణకు నామినేషన్ల పర్వం కొనసాగుతోంది. ఈక్రమంలో గెలుపే లక్ష్యంగా అన్ని పార్టీల నేతలు ఎమ్మెల్యేలు, ఆయా పార్టీల జిల్లా అధ్యక్షులు, ఇన్‌చార్జిలు, రాష్ట్ర నేతలు ఎన్నికల బరిలో నిలిచే ఆశావహులతో పా టు ముఖ్య కార్యకర్తలతో విస్తృతంగా సమావేశాలు నిర్వహిస్తున్నారు. పార్టీ నుంచి ఒక్కరు మాత్రమే పోటీ చేయాలని, గ్రూపులుగా ఏర్పడి నష్టం చేయొ ద్దని దిశా నిర్దేశం చేస్తున్నారు. సర్పంచ్‌గా అవకాశం దక్కని వారికి పరిషత్‌లో అవకాశం కల్పిస్తామని హామీ ఇస్తున్నారు.

సంక్షేమ పథకాలపై హస్తం ధీమా

రెండేళ్లలో ప్రభుత్వం ప్రవేశపెట్టిన సంక్షేమ పథకాలే కాంగ్రెస్‌ బలపర్చిన అభ్యర్థులను గెలిపిస్తాయని ఆ పార్టీ నేతలు బలంగా నమ్ముతున్నారు. రుణమాఫీ, మహిళలకు ఉచిత బస్సు ప్రయాణం, సబ్సిడీ గ్యాస్‌, సన్న వడ్లకు బోనస్‌, 200 యూ నిట్ల ఉచిత విద్యుత్‌, వడ్డీలేని రుణాలు.. ఇలా సంక్షేమ పథకాలతో లబ్ధిపొందిన వారు కాంగ్రెస్‌ను ఆదరిస్తారని ధీమాగా ఉన్నారు. వీటిని ప్రజలకు వివరించి ఓట్లు అడగాలని అభ్యర్థులకు, కార్యకర్తలకు సూచిస్తున్నారు.

అమలు కాని హామీలపై కారు గురి

కాంగ్రెస్‌ ప్రభుత్వంపై ఉన్న వ్యతిరేకతను తమకు అనుకూలంగా మార్చుకోవాలని బీఆర్‌ఎస్‌ పార్టీ నేతలు భావిస్తున్నారు. మహిళలకు రూ. 2,500, ఆసరా పింఛన్‌ పెంపు, పూర్తిస్థాయిలో కాని రుణమాఫీ, పేదింటి వధువు పెళ్లికి తులం బంగారంతో పాటు స్థానిక సంస్థల ఎన్నికల్లో బీసీలకు 42 శాతం రిజర్వేషన్లు అమలు చేయలేదని, ఈ మోసాన్ని ప్రజలకు వివరించి ఓట్లు అడగాలని కార్యకర్తలకు దిశానిర్దేశం చేస్తున్నారు.

పోటీకి సై అంటున్న కమలం

కాంగ్రెస్‌, బీఆర్‌ఎస్‌లు రెండు ప్రజలను మోసం చేశాయని, బీజేపీతోనే అభివృద్ధి సాధ్యమవుతుందని ఆ పార్టీ నేతలు ప్రచారం చేస్తున్నారు. పంచాయతీల అభివృద్ధితో పాటు కేంద్ర ప్రభుత్వ పథకాలను ప్రజలకు వివరించి ఎన్నికల్లో ఓట్లు అడగాలని కార్యకర్తలకు వివరిస్తున్నారు. మెజార్టీ సర్పంచ్‌ స్థానాలు గెలుచుకుంటామని ధీమా వ్యక్తం చేస్తున్నారు.

1/1

లీడర్‌.. కేడర్‌