డిపాజిట్‌ దక్కితేనే పరువు!

జహీరాబాద్‌: ఎన్నికల్లో ప్రధానంగా డిపాజిట్‌ అనే అంశం తరచూ చర్చకు వస్తుంది. అసెంబ్లీ, లోక్‌సభ ఎన్నికల్లోనూ ప్రధాన పార్టీల నేతలు డిపాజిట్‌ విషయాన్ని పదే పదే ప్రస్తావిస్తుంటారు. డిపాజిట్‌ దక్కించుకుని అయినా పరువు కాపాడుకో అనే విషయాన్ని ఎదుటి పార్టీల అభ్యర్థులపై సె టైర్లు వేస్తూ ఉంటారు. గ్రామ పంచాయతీ ఎన్నికల్లో సైతం డిపాజిట్‌ అనే పదానికి ప్రాముఖ్యత ఉంది. డిపాజిట్‌ కూడా రాకున్నా ఎన్నికల్లో పోటీకి దిగుతున్నాడంటూ ప్రత్యర్థులు వ్యంగ్యస్త్రాలు సంధిస్తుంటారు. కొందరు ఎన్నికల్లో డిపాజిట్‌ దక్కదని తెలిసినా ఎదుటి వ్యక్తిని ఓడించి ప్రతీకారం తీర్చుకునేందుకు అయినా పోటీకి దిగుతుంటారు. ఎన్నికల్లో గెలువకున్నా కనీసం డిపాజిట్‌ను అయినా దక్కించుకునేందుకు అభ్యర్థులు నానా తంటాలు పడుతుంటారు. డిపాజిట్‌ కథ గురించి తెలుసుకుంటే.. ఎన్నికల్లో పోటీ చేసే అభ్యర్థులు రిటర్నింగ్‌ అధకారికి నగదు రూపంలో కొంత డబ్బు డిపాజిట్‌ పెట్టాల్సి ఉంటుంది. డిపాజిట్‌కు సంబంధించిన రశీదును పొందిన తర్వాత నామినేషన్‌ పత్రానికి జత చేయాలి. లేని పక్షంలో నామినేషన్‌ పత్రాన్ని తిరస్కరిస్తారు. సర్పంచ్‌గా పోటీచేసే జనరల్‌ అభ్యర్థులు రూ.2వేలు, ఎస్సీ, ఎస్టీ, బీసీ అభ్యర్థులు రూ.1,000 వంతున డిపాజిట్‌ చేయాల్సి ఉంటుంది. వార్డు సభ్యులుగా పోటీచేసే జనరల్‌ అభ్యర్థులు రూ.1,000, ఎస్సీ, ఎస్టీ, బీసీ అభ్యర్థులు రూ.500 డిపాజిట్‌ రూపంలో చెల్లించాల్సి ఉంటుంది.

1/6వ వంతు ఓట్లు

రాకుంటే

డిపాజిట్‌ గల్లంతే...

ఎన్నికలు జరిగిన తర్వాత పోటీ చేసిన అభ్యర్థులకు పోలై, చెల్లిన ఓట్లలో 1/6 వంతు ఓట్లు రావాలి. అంతకన్నా తక్కువ వస్తే అతను డిపాజిట్‌ కోల్పోయినట్లు గుర్తిస్తారు. ఉదాహరణకు 500 ఓట్లు పోలై అన్ని చెల్లుబాటు అయ్యాయనుకుంటే పోటీచేసిన వారికి ఒక్కొక్కరికి 1/6వ వంతు అంటే 80 ఓట్లు రావాల్సి ఉంటుంది. అప్పుడు అతడికి డిపాజిట్‌ దక్కినట్లు. లేకపోతే డిపాజిట్‌ దక్కనట్లు అర్థం. 1/6వ వంతు లేదా అంతకన్నా ఎక్కువ ఓట్లు వచ్చిన వారికి ఎన్నికల రిటర్నింగ్‌ అధికారి పోటీ చేసిన సమయంలో డిపాజిట్‌ చేసిన డబ్బులను తిరిగి ఇస్తారు. 1/6వ వంతు కన్నా తక్కువ వచ్చిన వారి డిపాజిట్‌ డబ్బులను ఇవ్వకుండా వాటిని పంచాయతీ డెవలప్‌మెంట్‌ ఫండ్‌లో జమ చేస్తారు.