TV
సమన్వయంతో పనిచేయండి
హవేళిఘణాపూర్‌(మెదక్‌)/మెదక్‌ కలెక్టరేట్‌: అధికారులు సర్పంచ్‌ ఎన్నికకు నామినేషన్ల ప్రక్రియను పారదర్శకంగా జరపాలని జిల్లా ఎన్నికల అధికారి, కలెక్టర్‌ రాహుల్‌రాజ్‌ అన్నారు. గురువారం హవేళిఘణాపూర్‌ ఎంపీడీఓ కార్యాలయంలో కొనసాగుతున్న నామినేషన్‌ ప్రక్రియను పరిశీలించి వివరాలు తెలుసుకున్నారు. ఈసందర్భంగా ఆయన మాట్లాడుతూ.. నామినేషన్లు రెండో రోజు ప్రక్రియ సజావుగా, పారదర్శకంగా సాగేందుకు పకడ్బందీ చర్యలు తీసుకోవాలని సూచించారు. ఎలాంటి ఇబ్బందులు తలెత్తకుండా సమన్వయం చేసుకోవాలన్నారు. మొదటి విడత నామినేషన్లకు శనివారం చివరి రోజు కావడంతో అభ్యర్థులు పెద్ద సంఖ్యలో నామినేషన్లు దాఖలు చేసే అవకాశం ఉంటుందని, అందుకు తగిన ఏర్పాట్లు చేయాలని ఆదేశించారు. ఆయన వెంట తహసీల్దార్‌ సింధూరేణుక, ఎంపీడీఓ శ్రేయంత్‌, రిటర్నింగ్‌ అధికారులు ఉన్నారు. అనంతరం కలెక్టరేట్‌లో జిల్లాలోని ఎంపీడీఓలు, ఆర్‌ఓ, ఏఆర్‌ఓలతో గూగుల్‌ మీట్‌ నిర్వహించారు. నామినేషన్‌ దాఖలు చేసే ప్రతి అభ్యర్థి తప్పనిసరిగా కొత్త బ్యాంక్‌ అకౌంట్‌ అందజేసేలా చర్యలు చేపట్టాలన్నారు. ప్రతి నామినేషన్‌ను క్షుణ్ణంగా పరిశీలించి టీ–పోల్‌లో అప్‌లోడ్‌ చేయాలని సూచించారు. రెండో ఫేజ్‌ ఎన్నికలకు సిద్ధంగా ఉండాలన్నారు.
కలెక్టర్‌ రాహుల్‌రాజ్‌
