నాణ్యమైన విత్తనాలే విక్రయించాలి

నాణ్యమైన విత్తనాలే విక్రయించాలి

డీఏఓ దేవ్‌కుమార్‌

కౌడిపల్లి(నర్సాపూర్‌): రైతులకు నాణ్యమైన విత్తనాలు, ఎరువులు మాత్రమే విక్రయించాలని డీఏఓ దేవ్‌కుమార్‌ డీలర్లను ఆదేశించారు. గురువారం మండల కేంద్రంలో కౌడిపల్లి, నర్సాపూర్‌ డివిజన్‌ పరిధిలోని ఎరువుల డీలర్లతో సమావేశం నిర్వహించారు. ఈసందర్భంగా ఆయన మాట్లాడుతూ.. రైతుల అభివృద్ధి కోసం అధికారులు, డీలర్లు సమన్వయంతో పనిచేయాలన్నారు. నాణ్యమైన విత్తనాలతోనే అధిక దిగుబడి సాధ్యమని చెప్పారు. జిల్లాలో ఈ యాసంగి సీజన్‌లో 3.17 లక్షల ఎకరాల్లో వివిధ రకాల పంటలు సాగు కానుండగా, అత్యఽధికంగా వరి 2.95 లక్షల ఎకరాల్లో సాగవుతుందని అంచనా వేసినట్లు తెలిపారు. దీనికి గాను 27 వేల మెట్రిక్‌ టన్నుల యూరియా అవసరం అవుతుందని గుర్తించినట్లు చెప్పారు. జిల్లాలో యూరియా కొరత లేదని, రైతులు అందోళన చెందవద్దన్నారు. ఈపాస్‌ మిషన్ల ద్వారానే ఎరువులు అమ్మాలని, అధిక ధరలకు అమ్మితే కఠిన చర్యలు తప్పవని హెచ్చరించారు. సమావేశంలో ఏడీఏలు వినయ్‌, పుణ్యవతి, సంధ్యారాణి, ఏఓలు, డీలర్లు పాల్గొన్నారు.