బ్రోకర్ల రాజ్యం.. వసూళ్ల కేంద్రం

బ్రోకర్ల రాజ్యం.. వసూళ్ల కేంద్రం

మెదక్‌, రామాయంపేట, తూప్రాన్‌, నర్సాపూర్‌, పెద్దశంకరంపేట మండలాల్లో సుమారు 30 వరకు బ్రోకర్‌ కార్యాలయాలు ఉన్నాయి. వీరి నుంచి ఆర్టీఏ అధికారుల వాటాలు వసూలు చేయడానికి మెదక్‌లో ఇద్దరు ఏజెంట్లు ఉన్నారు. వారి ద్వారా రోజు వారీగా ఇద్దరు అధికారులకు గుట్టుచప్పడు కాకుండా, నిర్ణయించిన ప్రదేశాల్లో మామూళ్లు ముడుతుంటాయి. కార్యాలయంలో పని చేసే ఇద్దరు అధికారులు కొంత మిగిలించుకొని, మిగితావి వంతుల వారీగా వివిధస్థాయి అధికారులకు పంపకాలు చేస్తున్నట్లు సమాచారం. టూవీలర్‌కు లెర్నింగ్‌, పర్మనెంట్‌ లైసెన్స్‌ కోసం సుమారు రూ. 1,550 చలాన్‌ కట్టాలి, కానీ బ్రోకర్‌ రూ. 3,200 వరకు వసూలు చేస్తున్నారు. అలాగే టూ, ఫోర్‌వీలర్‌ కలిపి డ్రైవింగ్‌ లైసెన్స్‌ తీసుకుంటే రూ. 2,025 చలాన్‌ కట్టాలి. కానీ రూ. 4,200 వరకు తీసుకుంటున్నట్లు తెలుస్తోంది. ఇందులో నుంచి రూ. 300 వరకు బ్రోకర్‌ తీసుకొని, మిగితావి ఏజెంట్లకు, వారి ద్వారా అధికారులకు ముడుతున్నట్లు సమాచారం.