సర్పంచ్‌ రిజర్వేషన్లు ఖరారు

సర్పంచ్‌ రిజర్వేషన్లు ఖరారు

మెదక్‌జోన్‌: ఎప్పుడెప్పుడా అని ఎదురుచూస్తున్న సర్పంచ్‌ రిజర్వేషన్లు ఎట్టకేలకు ఖరారయ్యాయి. గత మూడు రోజులుగా జిల్లా యంత్రాంగం కసరత్తు చేపట్టి సోమవారం మధ్యాహ్నానికి పూర్తి చేసింది. జిల్లావ్యాప్తంగా 492 గ్రామ పంచాయతీలకు గానూ పాత రిజర్వేషన్ల ప్రకారం 50 శాతం మించకుండా రిజర్వేషన్లు ఖరారు చేశారు. బీసీలకు 108 స్థానాలు కేటాయించగా, అందులో మహిళలకు 49 సీట్లు, జనరల్‌కు 59 కేటాయించారు. ఎస్టీలకు మొత్తం 92 స్థానాలను కేటాయించగా, వాటిలో 71 గ్రామాలు వందశాతం గిరిజన పంచాయతీలే ఉన్నాయి. వాటిలో 29 మహిళలకు, 42 స్థానాలను జనరల్‌కు కేటాయించారు. అలాగే మరో 21 స్థానాలు ఎస్టీలకు కేటాయించారు. అందులో 10 సీట్లను మహిళలకు, 11 స్థానాలను జనరల్‌ కేటగిరికి ఇచ్చారు. అలాగే ఎస్సీలకు 77 స్థానాలు కేటాయించగా, వాటిలో 33 సీట్లు మహిళలకు, 44 సీట్లను జనరల్‌కు రిజర్వ్‌ చేశారు.

జిల్లావ్యాప్తంగా మొత్తం 4,220 వార్డులు ఉండగా, వాటిలో ఎస్టీలకు మొత్తం 704 స్థానాలను కేటా యించారు. 100 శాతం ఎస్టీలు ఉన్న 71 గ్రామాల్లో 526 వార్డులను వారికే రిజర్వ్‌ చేశారు. అందులో 263 మహిళలకు, 263 జనరల్‌కు కేటాయించారు. అంతేకాకుండా మరో 21 పంచాయతీల్లో ఇతరవర్గాల ప్రజలు ఉన్న వాటిలో 178 వార్డు సభ్యులను కేటాయించగా, వాటిలో 55 మహిళలకు, 123 జనరల్‌కు కేటాయించారు. అలాగే ఎస్సీలకు 658 సభ్యులను కేటాయించగా, వాటిలో 235 మహిళలకు, 423 జనరల్‌ బీసీలకు కేటాయించారు. 998 సభ్యులకు గానూ 410 మహిళలకు, 588 జనరల్‌కు ఇచ్చారు. అలాగే అన్‌ రిజర్వ్‌డ్‌కు 1,860 సభ్యులను కేటాయించగా, వాటిలో 849 మహిళలకు, 1,011 జనరల్‌కు కేటాయించారు.

జిల్లాలో 492 గ్రామ పంచాయతీలు

బీసీలకు 22.66 శాతమే

జిల్లాలో 492 గ్రామ పంచాయతీలకు గానూ బీసీలకు 108 సీట్లను కేటాయించారు. ఈ లెక్కన బీసీలకు 22.66 శాతం సీట్లు మాత్రమే కేటాయించినట్లు అధికారిక లెక్కలు చెబుతున్నాయి. అలాగే ఎస్టీలకు 92 సీట్లను కేటాయించటంతో 18 శాతం, ఎస్సీలకు 77 సీట్లతో లెక్కిస్తే 15.65 శాతం కాగా, అన్‌రిజర్వ్‌డ్‌కు 215 స్థానాలను లెక్కిస్తే 43.69 శాతం కేటాయించారు. కాగా స్థానిక రిజర్వేషన్లు 50 శాతం మించకూడదని హైకోర్టు చెప్పటంతో పాత రిజర్వేషన్ల ప్రకారం ఖరారు చేశారు. బీసీలకు గణనీయంగా సీట్లు తగ్గటంతో అన్‌రిజర్వ్‌డ్‌ రిజర్వేషన్‌ ఖరారు చేసిన స్థానంలో పార్టీ పరంగా బీసీలు మాత్రమే పోటీచేసే విధంగా చర్యలు తీసుకుంటామని అధికార పార్టీ నేతలు చెబుతున్నారు. అయితే ఇది ఎంతవరకు సాధ్యమవుతుందని పలువురు బహిరంగంగానే విమర్శిస్తున్నారు. ఉదాహరణకు ఓ గ్రామంలో 10 ఏళ్ల నుంచి అన్‌ రిజర్వ్‌డ్‌ (యూఆర్‌) కాలేదు. ప్రస్తుతం ఆ ఊరు అన్‌రిజర్వ్‌డ్‌ అయింది. ఆ గ్రామంలో ఉన్న ఓసీలు ఖచ్చితంగా బరిలో ఉంటారు. అలాంటి గ్రామంలో బీసీలే పోటీ చేయాలనే ప్రతిపాదన కాంగ్రెస్‌ తీసుకువస్తే పార్టీకే తీరని నష్టం జరుగుతుందని నేతలు చెబుతున్నారు. అయితే ఇది ఎంతవరకు సాధ్యమవుతుందో వేచి చూడాల్సిందే.