TV
హైవేపై ప్రమాదాల నివారణకు చర్యలు
పెద్దశంకరంపేట(మెదక్‌): 161వ జాతీయ రహదారిపై జహీరాబాద్‌ ఎంపీ సురేశ్‌ షెట్కార్‌ సూచనల మేరకు డిసెంబర్‌ నెలాఖరులోగా సేఫ్టీ నిబంధనలు ఏర్పాటు చేయనున్నట్లు నేషనల్‌ హైవే పీడీ మాధవి సోమవారం తెలిపారు. ఇటీవల ఎంపీ ప్రమాదాల నివారణకు హైవే అథారిటీకి పలు సూచనలిచ్చారు. దీంతో అధికారులు స్పందించి జాతీయ రహదారిపై సోలార్‌ బ్రింకర్లు, ఎంబీసీబీలు, రబ్బర్‌ స్ట్రిబ్స్‌, స్పీడ్‌ బ్రేకర్లను ఏర్పాటు చేయనున్నట్లు చెప్పారు. ఈ మేరకు నేషనల్‌ హైవే అథారిటీ నుంచి వచ్చిన జీఓ కాపీలను ఎంపీకి అందజేశారు.
నేడు మహిళల ఖాతాల్లో వడ్డీ డబ్బుల జమ
మెదక్‌ కలెక్టరేట్‌: జిల్లాలోని మహిళా సంఘాల సభ్యుల ఖాతాల్లో మంగళవారం రూ. 8.80 కోట్ల వడ్డీ డబ్బులు జమ చేయనున్నట్లు కలెక్టర్‌ రాహుల్‌రాజ్‌ తెలిపారు. సోమవారం కలెక్టరేట్‌లో మహిళా సాధికారతపై జిల్లా అధికారులతో సమీక్ష నిర్వహించారు. ఈసందర్భంగా ఆయన మాట్లాడుతూ.. జిల్లావ్యాప్తంగా 1,37,438 స్వయం సహాయక బృందాల్లో అర్హులైన మహిళలకు వడ్డీ లేని రుణాల కింద రూ. 8.80 కోట్ల వడ్డీని బ్యాంకు లింకేజీపై మహిళల అకౌంట్‌లో జమ చేస్తామని చెప్పారు. ఈ కా ర్యక్రమం విజయవంతంగా నిర్వహించేందుకు అన్ని ఏర్పాట్లు పూర్తి చేయాలని సంబంధిత అధికారులను ఆదేశించారు.
అదనపు కలెక్టర్‌ను
కలిసిన డీఈఓ
మెదక్‌ కలెక్టరేట్‌: ఇటీవల నూతనంగా డీఈఓగా బాధ్యతలు చేపట్టిన విజయ సోమవారం అదనపు కలెక్టర్‌ నగేశ్‌ను మర్యాద పూర్వకంగా కలిశారు. ఆమె వెంట జిల్లా సైన్స్‌ అధికారి రాజిరెడ్డి, సమగ్ర శిక్ష అధికారులు నవీన్‌, రాజు ఉన్నారు.
వేగంగా ధాన్యం కొనుగోళ్లు
మెదక్‌ కలెక్టరేట్‌: జిల్లాలో ధాన్యం కొనుగోళ్లు వేగంగా జరుగుతున్నాయని జిల్లా సివిల్‌ సప్లై అధికారి నిత్యానంద్‌ సోమవారం ఒక ప్రకటనలో పేర్కొన్నారు. గతేడాది ఈ సమయానికి 27,938 మంది రైతుల నుంచి 1,33,664 లక్షల మెట్రిక్‌ టన్నుల ధాన్యం కొనుగోలు చేసి రూ. 117.58 కోట్లు చెల్లించినట్లు చెప్పారు. ప్రస్తుత సీజన్‌లో ఇప్పటివరకు 49,027 మంది రైతుల నుంచి 2.33 లక్షల మెట్రిక్‌ టన్నుల ధాన్యాన్ని సేకరించి రూ. 323.04 కోట్లు రైతుల ఖాతాల్లో జమ చేశామని తెలిపారు. అలాగే 5,008 మంది రైతులకు సన్నధాన్యం బోనస్‌ రూ. 11.56 కోట్లు చెల్లించినట్లు వివరించారు.
‘బీసీలు ఎక్కడ పోటీ చేయాలి’
చిన్నశంకరంపేట(మెదక్‌): మండలంలోని రు ద్రారం పంచాయతీలో వార్డులకు బీసీ రిజర్వేషన్లు కల్పించలేదని గ్రామస్తులు ఆందోళన వ్యక్తం చేస్తున్నారు. గ్రామంలో 1 నుంచి 5 వార్డులలో బీసీ జనాభా అధికంగా ఉంటారని, 5 నుంచి 10 వార్డులలో ఎస్సీ జనాభా ఉంటారని తెలిపారు. పంచాయతీ రిజర్వేషన్‌లో మాత్రం సర్పంచ్‌ జనరల్‌ మహిళకు రిజర్వు కాగా, 1 నుంచి 5 వరకు బీసీ జనాభా ఉండే వార్డులను ఎస్సీలకు కేటాయించారని వాపోయారు. అలాగే 5 నుంచి 10వ వార్డు వరకు ఎస్సీల జనాభా ఉంటారని, ఇక్కడ మాత్రం అన్‌ రిజర్వుడ్‌ కేటాయించారన్నారు. ఇలాగైతే బీసీలు ఎక్కడ పోటీ చేయాలని ప్రశ్నిస్తున్నారు. ఇదే విషయం ఎంపీడీఓ వద్ద ప్రస్తావిస్తే తమకేమి తెలియదని దాటవేస్తున్నారని ఆగ్రహం వ్యక్తం చేశారు. అధికారులు వెంటనే మార్పు చేయకపోతే తాము ఎన్నికలను బహిష్కరించాల్సి ఉంటుందని హెచ్చరించారు.
హైవేపై ప్రమాదాల నివారణకు చర్యలు
