సొసైటీలో అక్రమాలపై విచారణ

సొసైటీలో అక్రమాలపై విచారణ

చందంపేట పీఏసీఎస్‌ సీఈఓపై ఫిర్యాదుల వెల్లువ

చిన్నశంకరంపేట(మెదక్‌): చందంపేట పీఏసీఎస్‌ లో అక్రమాలపై సోమవారం విచారణ జరిగింది. డీసీఓ కార్యాలయ అసిస్టెంట్‌ రిజిస్టర్‌ తుకారాం వద్దకు చందంపేట, రుద్రారం, ధరిపల్లి గ్రామాలకు చెందిన రైతులు వచ్చి పెద్దసంఖ్యలో ఫిర్యాదు చేశారు. పంట రుణం చెల్లింపు కోసం సీఈఓ పాషా రూ. 50 వేలు వసూలు చేశారని రైతు సిద్దిరామ్‌రెడ్డి ఫిర్యాదు చేశారు. ఏటా సక్రమంగా వడ్డీ చెల్లించినప్పటికీ అధికంగా డబ్బులు తీసుకున్నారని వాపోయారు. రూ. 73 వేలు తీసుకొని రూ. 63 వేలు మా త్రమే రుణ ఖాతాలో జమ చేశారని అదే గ్రామానికి చెందిన మరో రైతు పోచయ్య తెలిపారు. రుణమాఫీ జరిగినా, డబ్బులు వసూలు చేశారని రై తు ప్రవీణ్‌కుమార్‌, డైరెక్టర్‌ రామ్‌రెడ్డి పేర్కొన్నారు. సొసైటీ కార్యాలయంలో విధులు నిర్వర్తించిన విజయ్‌కుమార్‌ అనారోగ్యంతో ఆస్పత్రి పాలు కాగా, వేతనం ఇవ్వకుండానే డబ్బులు కాజేసి సొంతానికి వాడుకున్నారని చెప్పారు. రుద్రారం గ్రామానికి చెందిన మరో ఇద్దరు రైతులు సైతం ఫిర్యాదు చేశారు. రైతుల చెప్పిన వివరాలను రికార్డు చేసుకొని డీసీఓకు నివేదిక ఇవ్వనున్నట్లు విచారణ అధికారి తెలిపారు.

అవినీతి సీఈఓ మాకొద్దు..

సీఈఓ పాషా అవినీతి, అక్రమాలకు పాల్పడి నిధులు గోల్‌మాల్‌ చేశారని డైరెక్టర్లు రామకృష్ణ, రాంరెడ్డి, వెంకటేశం తెలిపారు. సొసైటీ పాలకవర్గానికి తెలియకుండా తీర్మానం పుస్తకంలో నోట్‌ పెట్టి రూ. 2.50 లక్షల నిధులు డ్రా చేసి సొంత అవసరాలకు వాడుకున్నాడని ఫిర్యాదు చేశారు. సొసైటీలో రైతుల షేర్‌ అమౌంట్‌ను కూడా ఇష్టానుసారం డ్రా చేసి వాడినట్లు చెప్పా రు. ఇలాంటి అవినీతి సీఈఓ మాకొద్దంటూ తెలిపారు. ఇదే సమయంలో పలువురు రైతులు సీఈఓ పాషాపై ఆగ్రహం వ్యక్తం చేస్తూ దాడి చేసేందుకు ప్రయత్నించారు. మాజీ ఎంపీటీసీ శివకుమార్‌, రాజశేఖర్‌రెడ్డి తదితరులు సీఈఓపై ఫిర్యాదు చేశారు.