సలుపుతున్న రాచపుండు!

సలుపుతున్న రాచపుండు!

● ముందుస్తుగా వ్యాధిని గుర్తించక మృత్యువాత

● చివరి దశలోనే ఆస్పత్రులను ఆశ్రయిస్తున్న రోగులు

మెదక్‌జోన్‌: జిల్లాలో కేన్సర్‌ మహమ్మారి అంతకంతకూ పెరుగుతోంది. ఇప్పటివరకు 614 మంది బాధితులు ఉండగా, వీరిలో 115 మంది నోటి కేన్సర్‌తో బాధపడుతున్నారు. 156 మంది రొమ్ము, 177 మంది సర్వేకల్‌, 166 బ్లడ్‌ కేన్సర్‌తో పోరాటం చేస్తున్నారు. ఇందులో చివరిదశలో కొన ఊపిరితో 157 మంది బాధపడుతున్నారు. ఈ మహమ్మారితో ఏటా జిల్లాలో పదుల సంఖ్యలో మృత్యువాతపడుతున్నారు. అయితే వ్యాధిని ముందస్తుగా గుర్తించకపోవడం.. జిల్లాలో కేన్సర్‌ ఆస్పత్రి లేకపోవడం మరో కారణంగా తెలుస్తోంది.

ఆస్పత్రి నిర్మాణానికి అడుగులు

జిల్లా కేంద్రంలో కేన్సర్‌ ఆస్పత్రి నిర్మాణానికి నిధులు సమకూర్చే బాధ్యత తనదని, ఇందుకోసం వెయ్యి గజాల స్థలం కేటాయించాలని ఎంపీ రఘునందన్‌రావు ఇటీవల జిల్లాలో జరిగిన దిశ సమావేశంలో కలెక్టర్‌ను కోరారు. దీంతో ఆయన సానుకూలంగా స్పందించారు. ఉమ్మడి జిల్లాలోని బీడీఎల్‌, ఐఎస్‌ఎల్‌ ఫ్యాక్టరీల నుంచి సీఎస్‌ఆర్‌ నిధులతో పాటు ఎంపీ నిధులను సైతం కేటాయించనున్నట్లు సమాచారం. కాగా పట్టణానికి కిలోమీటర్‌ దూరంలో గల బోధన్‌– మెదక్‌ ప్రధాన రహదారి హవేళిఘణాపూర్‌ శివారులో గతంలో లెప్రసీ (కుష్టు) నివారణ ఆస్పత్రి నిర్మించారు. ప్రస్తుతం ఇది పూర్తిగా శిథిలావస్థకు చేరింది. ఇది ప్రధాన రహదారికి ఆనుకొని ఉండటంతో ఇక్కడ కేన్సర్‌ ఆస్పత్రి నిర్మిస్తే ప్రజలకు ఎంతో సౌకర్యవంతంగా ఉంటుందని పలువురు అభిప్రాయపడుతున్నారు.

‘చిన్నశంకరంపేట మండలం జంగారాయికి చెందిన సిద్దిరెడ్డి 20 రోజుల క్రితం ఆకలి మందగించిందని, ఆయాసంగా ఉందని వైద్యులను సంప్రదించాడు. అతడికి పరీక్షలు నిర్వహించిన వైద్యులు కేన్సర్‌ నాల్గవ దశలో ఉందని, కిమోథెరపీ తప్ప తాము ఏం చేయలేమని మందులు రాసి ఇచ్చారు. అతడు ఆస్పత్రి నుంచి ఇంటికి వచ్చిన వారంలోనే మృత్యువాత పడ్డాడు. ముందస్తుగా వ్యాధిని గుర్తించినట్లు అయితే మందులతో కొన్నాళ్ల బతికేవాడని వైద్యులు చెబుతున్నారు’.