తిందామంటే

● ఆకాశన్నంటిన కూరగాయల ధరలు

● సామాన్య ప్రజలువిలవిల

నిజాంపేట సంతలో కూరగాయల విక్రయాలు

రామాయంపేట(మెదక్‌): జిల్లాలో కూరగాయల ధరలు కొండెక్కడంతో సామాన్యులు బెంబేలెత్తుతున్నారు. ఏ కూరగాయ ధర చూసినా భగ్గుమంటుంది. దీంతో కొనలేం.. తినలేం అన్నట్లుగా పరిస్థితి మారింది. వరుస వర్షాలు, మొంథా తుపాన్‌తో భారీగా కూరగాయల పంటలకు న ష్టం జరిగింది. దిగుబడి సైతం బాగా తగ్గింది. ఇతర రాష్ట్రాల నుంచి దిగుమతి చేసుకోవడంతో ఖర్చులు పెరిగాయి. ఏ కూరగాయ చూసినా కిలో రూ. 80 నుంచి రూ. 100 వరకు పలుకుతోంది. దీంతో పేద, మధ్య తరగతి ప్రజలు తీవ్ర ఆర్థిక ఇబ్బందులు ఎదుర్కొంటున్నారు. గతంలో కిలో చొప్పున కొనుగోలు చేసిన వారు ప్రస్తుతం అర, పావు కిలోతో సరిపెట్టుకుంటున్నారు. గత నెలలో పచ్చి మిర్చి ధర కిలోకు రూ. 50 వరకు ఉండగా, ప్రస్తుతం రూ. 80కి చేరింది. పెరిగిన ధరలను ఆసరా చేసుకుంటున్న దళారులు గిరిజనుల వద్ద తక్కువ ధరకు కొనుగోలు చేస్తూ వినియోగదారులకు అధిక ధరలకు అంటగడుతున్నారు.

కొండెక్కిన కోడిగుడ్డు

నిరుపేదలకు సైతం అందుబాటులో ఉండే కోడిగుడ్డు ధరలు అమాంతం పెరిగాయి. 15 రోజుల క్రి తం కోడి గుడ్డు ధర రూ. 5 పలుకగా, ప్రస్తుతం ఏడున్నర రూపాయలకు అమ్ముతున్నారు. రిటైల్‌ దుకాణాల్లో వర్తకులు రూ. ఎనిమిది వరకు విక్రయిస్తున్నారు. ఇటీవల కోళ్లకు సంబంధించిన వ్యాధులు పెరగడంతో గుడ్ల ఉత్పత్తి తగ్గింది. దీనికి చలి సైతం తోడైంది. దీంతో కోళ్ల సంఖ్య తగ్గింది. హోల్‌సేల్‌ మార్కెట్‌లో వంద గుడ్ల ధర 15 రోజుల క్రితం రూ. 620 ఉండగా, ప్రస్తుతం రూ. 675కు పెరిగింది. ఉత్తర భారతదేశంలో చలి తీవ్రతతో అక్కడ కోడిగుడ్ల ఎగుమతి పెరగడం ధరల పెరుగుదలకు మరో కారణమని వ్యాపారులు పేర్కొంటున్నారు.