డీసీసీ అధ్యక్షుడిగా ఆంజనేయులు గౌడ్‌

డీసీసీ అధ్యక్షుడిగా ఆంజనేయులు గౌడ్‌

మెదక్‌ అర్బన్‌: డీసీసీ అధ్యక్షుడిగా శివ్వన్నగారి ఆంజనేయులుగౌడ్‌ను నియమిస్తూ ఆల్‌ ఇండియా కాంగ్రెస్‌ కమిటీ ప్రధాన కార్యదర్శి కేసీ వేణుగోపాల్‌ శనివారం ఉత్తర్వులు జారీ చేశారు. కంఠారెడ్డి తిరుపతిరెడ్డి కాంగ్రెస్‌ను వీడి బీఆర్‌ఎస్‌లో చేరిన తర్వాత ఇన్‌చార్జి డీసీసీ అధ్యక్షుడిగా ఆంజనేయులుగౌడ్‌ పనిచేశారు. ఈ పదవి కోసం ప్రధానంగా నర్సాపూర్‌ ఎమ్మెల్యేగా పోటీ చేసి ఓడిపోయిన ఆవుల రాజిరెడ్డి గట్టి ప్రయత్నం చేసినప్పటికీ, బీసీ సామాజిక వర్గానికి పదవి వరించింది.

బాల్య వివాహాలు చేయం

చిన్నశంకరంపేట(మెదక్‌): బాల్య వివాహాలు చేయమని మహిళా సంఘం సభ్యులు ప్రతిజ్ఞ చేశారు. శనివారం మండలంలోని కొర్విపల్లిలో గ్రామ కార్యదర్శి సమత, ప్రత్యేకాధికారి రాజు ఆధ్వర్యంలో బాల్య వివాహాల నిర్మూలన కోసం గ్రామ సభ నిర్వహించారు. ఈసందర్భంగా విజన్‌ సంస్థ ఆర్గనైజర్‌ యాదగిరి మాట్లాడుతూ.. బాలికలకు 18 ఏళ్లు, బాలురకు 21 ఏళ్లు నిండిన తర్వాతే వివాహం చేయాలని అవగాహన కల్పించారు. బాల్య వివాహాల నిర్మూళనే లక్ష్యంగా ప్రభుత్వం ముందుకు సాగుతుందని తెలిపారు.

అభ్యంతరాలు ఉంటే చెప్పండి

మెదక్‌ కలెక్టరేట్‌: జిల్లాలోని కేజీబీవీలలో ఖాళీగా ఉన్న అకౌంటెంట్‌ (4), ఏఎన్‌ఎం (5) పోస్టులకు దరఖాస్తులు స్వీకరణ పూర్తయ్యిందని జిల్లా విద్యాశాఖ అధికారి విజయ శనివారం ఒక ప్రకటనలో పేర్కొన్నారు. మెరిట్‌ జాబితా జిల్లా విద్యాశాఖ వెబ్‌సైట్‌లో అందుబాటులో ఉంచినట్లు తెలిపారు. ఈ విషయంలో ఏమైనా అభ్యంతరాలు ఉంటే ఈనెల 27వ తేదీలోగా డీఈఓ సమగ్ర శిక్ష కార్యాలయంలో సమర్పించాలని సూచించారు.

నిధుల గోల్‌మాల్‌పై విచారణ

కౌడిపల్లి(నర్సాపూర్‌): మండల కేంద్రంలోని ఉన్నత పాఠశాలలో పీఎంశ్రీ నిధుల గోల్‌మాల్‌పై అధికారులు శనివారం విచారణ చేపట్టారు. గతేడాది పాఠశాలకు రూ. 9.50 లక్షల నిధులు రావడంతో దుర్వినియోగం అయ్యాయని ఆరోపిస్తూ విద్యార్థులు హెచ్‌ఎంను ప్రశ్నించారు. దీంతో జిల్లా విద్యాశాఖ అధికారులు స్పందించారు. ఏఎంఎస్‌ సుదర్శనమూర్తి పాఠశాలకు వచ్చి హెచ్‌ఎం లలితాదేవి, ఇన్‌చార్జి హెచ్‌ఎం పద్మజతో పాటు ఉపాధ్యాయులతో వేర్వేరుగా మాట్లాడి రికార్డులు పరిశీలించారు. విచారణ పూర్తి నివేదికను డీఈఓ, కలెక్టర్‌కు అందజేయనున్నట్లు ఆయన తెలిపారు. ఆయన వెంట ఎంఈఓ బాలరాజు ఉన్నారు.

దరఖాస్తుల ఆహ్వానం

మెదక్‌ కలెక్టరేట్‌: జిల్లా కేంద్రంలోని సఖీ సెంటర్‌లో తాత్కాలికంగా పనిచేసేందుకు సోషల్‌ కౌన్సిలర్‌ 1, మల్టీపర్పస్‌ స్టాఫ్‌ కుక్‌ 1 పోస్టులకు దరఖాస్తులు ఆహ్వానిస్తున్నట్లు ఇన్‌చార్జి డీడబ్ల్యూఓ హేమాభార్గవి శనివారం ఒక ప్రకటనలో పేర్కొన్నారు. స్థానికులకు మొదటి ప్రాధాన్యం ఉంటుందన్నారు. మహిళా అభ్యర్థులు 18 నుంచి 45 ఏళ్ల మధ్య వయస్సు కలిగి ఉండాలన్నారు. సోషల్‌ కౌన్సిలర్‌ పోస్టుకు రూ. 25,000, కుక్‌కు రూ. 12,500 ఇస్తామన్నారు. ఆసక్తి, అర్హత గల అభ్యర్థులు డిసెంబర్‌ 10వ తేదీలోగా కలెక్టరేట్‌లోని సీ్త్ర, శిశు సంక్షేమ శాఖ కార్యాలయంలో దరఖాస్తులు అందజేయాలని సూచించారు.

పర్యావరణ సంరక్షణ

ప్రతి ఒక్కరి బాధ్యత

ములుగు(గజ్వేల్‌): పర్యావరణం కాపాడాల్సిన బాధ్యత ప్రతి ఒక్కరిపై ఉందని తెలంగాణ ఉన్నత విద్యా మండలి చైర్మన్‌ ప్రొఫెసర్‌ వి.బాలకృష్ణారెడ్డి పిలుపునిచ్చారు. రెండు రోజుల పాటుగా ములుగు అటవీ కళాశాల, పరిశోధన సంస్థ (ఎప్‌సీఆర్‌ఐ)లో పర్యావరణం, వ్యర్థాల నిర్వహణ అంశంపై కళాశాల డీన్‌ వి.కృష్ణ అద్యక్షతన నిర్వహించిన జాతీయ సదస్సు శనివారం ముగిసింది. ఈ సందర్భంగా ఆయన మాట్లా డుతూ.. ప్రకృతి వనరులను భవిష్యత్‌ తరాలకు అందించేలా సుస్థిరాభివృద్ధి జరగాలన్నారు.